જો કે ખાનગી લોકમેળાએ પોલીસમાં લાયસન્સ માટે કરેલી અરજી હજુ સુધી મંજૂર કરાઇ નથી, સોઇલ ટેસ્ટના રિપોર્ટની રાહ
રાજકોટમાં એક તબક્કે ભાતીગળ લોકમેળો રાઇડસ વગર યોજાય તેવી સ્થિતિ હતી, સરકારની નવી એસ.ઓ.પી.માં રાઇડસના કડક નિયમોને લઇને ખાનગી લોકમેળા યોજાય કે નહીં તે પણ છેલ્લે સુધી નક્કી ન હતુ. અંતે રાજકોટવાસીઓને રેસકોર્સમાં યોજાનાર અને અન્ય ખાનગી જગ્યાએ યોજાનાર એમ કુલ આઠ લોકમેળાનો લાભ મળશે. જો કે ખાનગી લોકમેળાના સંચાલકોએ હજુ પાંચેક દિવસ પહેલા જ લાયસન્સ આપવા માટેની કરેલી અરજી હજુ મંજૂર થઇ નથી. હજુ પ્રક્રિયા ચાલી રહી છે. રાઇડસની મંજૂરી પણ સોઇલ ટેસ્ટનો રિપોર્ટ આવ્યા પછી જ મળવાની છે.
જન્માષ્ટમીનો તહેવાર રાજકોટમાં ઉજવવાનો એક અનેરો આનંદ હોય છે. સૌરાષ્ટ્રને બાદ કરતા ગુજરાત બાજુ જન્માષ્ટમી પર મેળા જેવો માહોલ ઓછો હોય છે. એટલા માટે જ ગુજરાત તરફના મુળ સૌરાષ્ટ્રીઓ જન્માષ્ટમીના તહેવારમાં રાજકોટ આવવાનું જ પસંદ કરે છે. જો કે આ વખતે લોકમેળાની આ રંગત અંગે છેલ્લે સુધી અવઢવભર્યો માહોલ રહ્યો હતો. રાઇડસ વગરનો મેળો હશે તેવુ નક્કી મનાતુ હતુ. રાઇડસ એ લોકમેળાનો જીવ છે. તેના વગર લોકમેળો માણવાની મજા કેમ આવે એવી પરિસ્થિતિ વચ્ચે અંતે રાઇડસ સાથે આઠ લોકમેળાની મોજ રાજકોટવાસીઓને મળશે.
આટલી જગ્યાએ યોજાશે મેળો
- રેસકોર્સનો મુખ્ય લોકમેળો
- દોઢસો ફૂટ રિંગરોડ
- બાલભવન
- નાના મવા ચોક
- વિરાણી હાઇસ્કુલના મેદાનમાં
- રતનપર
હજુ સુધી મંજૂરી મળી નથી છતા ખાનગી મેળાની તૈયારી શરૂ
સરકારની નવી એસ.ઓ.પી. મુજબ જયા રાઇડસ ઉભી કરવાની હોય ત્યા જમીનની મજબૂતાઇ માટેનો સોઇલ ટેસ્ટ ફરજિયાત છે. જમીન હાર્ડરોક હોય ત્યા જ રાઇડસ ઉભી કરવાની રહેશે. જ્યા જમીન પોલાસ અથવા તો કાચી હોય ત્યા રાઇડસને મંજૂરી આપવામા આવશે નહીં તેવુ તંત્ર કહે છે ત્યારે ખાનગી લોકમેળાના સંચાલકોએ પાંચેક દિવસ પહેલા જ પોલીસ પરમીનશનની લાયસન્સ માટે અરજી કરી છે. જો કે અરજી હજુ સુધી મંજૂર કરવામા આવી નથી. સોઇલ ટેસ્ટના રિપોર્ટની રાહ જોવાઇ રહી છે. આમછતા ખાનગી લોકમેળાના સંચાલકોએ રાઇડસ ઉભી કરવા સહિત તૈયારી શરૂ કરી દીધી છે.
