ભૂજમાં નિવૃત મહિલા PSIને ડિજીટલ એરેસ્ટ કરી ૮3.૪૪ લાખ પડાવતા ગઠીયા
બે મહિના બંધક બનાવી સીમકાર્ડની સંડોવણી અને બેંક ખાતામાં છ કરોડના વ્યવહાર મામલે પૈસા પડાવ્યા
અગ્ર ગુજરાત, ભૂજ
સાયબર માફિયાઓ લોકોને પોલીસ અને સીબીઆઈના નામે ડરાવી ધમકાવી રૂપિયા પડાવતા હોવાના અનેક કિસ્સાઓ સામે આવી ચુક્યા છે તેવામાં હવે ભુજમાં રહેતા 60 વર્ષીય નિવૃત મહિલા પીએસઆઈ સાયબર માફિયાઓની જાળમાં ફસાઈ ગયા હોવાની ઘટના સામે આવી છે ! આરોપીઓએ સીમકાર્ડની સંડોવણી અને બેંક ખાતામાં 6 કરોડના વ્યવહાર મામલે મની લોંડરીંગનો કેસ થયો હોવાનું કહી બે મહિના સુધી ડિજિટલ અરેસ્ટ રાખી સુપ્રીમ કોર્ટના જજ, સીબીઆઈ ચીફ અને મુંબઈ પોલીસના નામે ડરાવ્યા બાદ રૂપિયા 83.44 લાખ પડાવી લીધા હતા.
પ્રાપ્ત વિગતો મુજબ કોડકી રોડ પર વિનાયકી રેસીડેન્સીમાં એકલા રહેતા ફરિયાદી નિવૃત મહિલા પીએસઆઈ રાજ્યલક્ષ્મી ચિદંબરમ જોષીએ બોર્ડર રેન્જ સાયબર પોલીસ મથકે અજાણ્યા મોબાઈલ નંબરના ધારકો સામે ગુનો નોધાવ્યો છે. ફરિયાદીના જણાવ્યા મુજબ 26 નવેમ્બર 2025 ના સાડા નવેક વાગ્યાના અરસામાં અજાણ્યા નંબર પરથી ફોન આવ્યો હતો અને TRAI ડીપાર્ટમેન્ટમાંથી બોલતો હોવાનું કહી ફરિયાદીનો સીમકાર્ડ ગેરકાયદેસર પ્રવૃત્તિમાં સંડોવાયેલો હોવાથી બંધ થઇ જશે તેમ કહ્યું હતું.
જે બાદ મુંબઈના કોલાબા પોલીસ તરફ કોલ કનેક્ટ કર્યો હતો. જેમાં આરોપીએ મની લોંડરીંગના કેસ બાબતે મુંબઈ આવવા કહ્યું હતું. જેથી ફરિયાદીએ ફોન કટ કરી નાખ્યો હતો. ત્યારબાદ આરોપીઓએ વોટ્સએપ પર વિડીયો કોલ કર્યો અને પોલીસ યુનિફોર્મમાં રહેલા આરોપીએ ફરિયાદીના કેનેરા બેંકના ખાતામાં 6 કરોડનો વ્યવહાર થયેલો હોવાનું કહી મુખ્ય આરોપી નરેશ ગોયલ સાથે કનેક્શન ખુલ્યો હોવાનું કહ્યું હતું. જે બાદ વિડીયો કોલમાં સીબીઆઈનો ચીફ બનેલો આરોપી જોડાયો હતો
અને કેસથી બચવા માટે રૂપિયા આપવા પડશે તેવું કહ્યું હતું. ત્યારબાદ ત્રીજો આરોપી સુપ્રીમ કોર્ટનો જજ બની વિડીયો કોલમાં જોડાયો હતો અને ફરિયાદીને હાઉસ અરેસ્ટ કર્યા હતા. ડરી ગયેલા વૃદ્ધા કેસથી બચવા માટે આરોપીઓએ આપેલા બેંક ખાતાઓમાં 26 નવેમ્બરથી 23 જાન્યુઆરી સુધીના બે મહિનામાં અલગ અલગ સમયે કુલ રૂપિયા 84,44,047 ટ્રાન્સફર કરી દીધા હતા. સમગ્ર મામલે પોલીસે ગુનો દાખલ કરી આરોપીઓને ઝડપી લેવા ચક્રો ગતિમાન કર્યા છે.
સતત બે મહિનાથી આરોપીઓની નજર સામે રહેલા ફરિયાદી ડરેલા હતા અને આરોપીઓએ જે કહ્યું તે કરી રહ્યા હતા. બેંકમાં પણ વિડીયો મારફતે તેમની પર નજર રખાઈ રહી હતી. જે બાદ 24 જાન્યુઆરીના અચાનક પોલીસ ફરિયાદીના ઘરે પહોચી હતી અને તેમની સાથે ઠગાઈ થઇ હોવાનું કહી ડિજિટલ અરેસ્ટમાંથી છોડાવ્યા હતા. આ મામલે તપાસ કરનાર બોર્ડર રેન્જ સાયબર પોલીસ મથકના પીઆઈ કે.એમ.રાઠોડ સાથે વાત કરતા તેમણે જણાવ્યું કે,વૃદ્ધા સાથે ફ્રોડ થવા મામલે અમને ઉપરી એજન્સીઓએ જાણ કરી હતી જેથી તાત્કાલિક તેમના ઘરે જઈ ડિજિટલ અરેસ્ટમાંથી છોડાવ્યા હતા.
ફરિયાદીએ ટુકડે ટુકડે 43 લાખ આપી દીધા બાદ પણ આરોપીઓએ રૂપિયાની માંગણી કરી હતી. જેથી ફરિયાદીએ પોતાના અને તેમની બહેનના નામે પોસ્ટમાં જોઈન્ટ ખાતામાં 40 લાખ પડેલા હોવાની વાત કરી હતી. જેથી આરોપીઓએ ફરિયાદીને દિલ્હી જવા પરવાનગી આપી હતી અને ફરિયાદી દિલ્હી જઈ પોતાની બહેનને તેડી આવ્યા હતા અને 40 લાખ રૂપિયા આરોપીઓના ખાતામાં નંખાવી દીધા હતા.
