- આ હરાજી દુબઈના જ કોકા કોલા એરેનામાં થવાની છે
- ઋષભ પંત પ્રથમ વર્તમાન કેપ્ટન હશે જે ઓક્શન હોલમાં બેઠેલા જોવા મળશે
- આ પહેલા ક્યારેય ફ્રેન્ચાઇઝીએ પોતાના કેપ્ટનને હરાજીમાં મોકલ્યો નથી
IPL 2024 માટે આજે યોજાનારી હરાજીમાં દિલ્હી કેપિટલ્સનો કેપ્ટન ઋષભ પંત પણ જોવા મળશે. તે દુબઈ પહોંચી ગયો છે. આ હરાજી દુબઈના જ કોકા કોલા એરેનામાં થવાની છે. ઋષભ પંત પ્રથમ વર્તમાન કેપ્ટન હશે જે ઓક્શન હોલમાં બેઠેલા જોવા મળશે. આ પહેલા ક્યારેય ફ્રેન્ચાઇઝીએ પોતાના કેપ્ટનને હરાજીમાં મોકલ્યો નથી. દિલ્હી કેપિટલ્સ હવે આ પ્રથાને તોડી રહી હોય તેવું લાગે છે.
ઋષભ પંત હરાજીના આયોજનનો એક ભાગ રહ્યો છે
ઋષભ પંત દિલ્હી કેપિટલ્સના કોચ રિકી પોન્ટિંગ સાથે ઓક્શન હોલમાં બેઠેલા જોવા મળશે. ઓક્શન હોલમાં તેની હાજરી વિશે દિલ્હી કેપિટલ ઓનરશિપ ગ્રૂપના એક સભ્ય દ્વારા માહિતી આપવામાં આવી છે. આ સભ્યએ એમ પણ કહ્યું છે કે ઋષભ IPL 2024માં ટીમની કપ્તાની સંભાળશે. ઋષભ પંત છેલ્લા કેટલાક સમયથી દિલ્હી કેપિટલ્સની હરાજીના આયોજનનો મહત્વનો ભાગ છે. તેણે કોચ પોન્ટિંગ સાથે ફ્રેન્ચાઈઝીની લગભગ દરેક મીટિંગમાં હાજરી આપી છે.
ક્રિકેટના મેદાનથી એક વર્ષનું અંતર
ઋષભ પંત ગયા વર્ષના અંતમાં કાર અકસ્માતમાં ગંભીર રીતે ઘાયલ થયો હતો. ત્યારથી તે ક્રિકેટના મેદાનથી અંતર જાળવી રહ્યો છે. આ વર્ષની શરૂઆતમાં તેમની કેટલીક સર્જરીઓ થઈ હતી એવું માનવામાં આવે છે કે તે ફેબ્રુઆરીના છેલ્લા અઠવાડિયા સુધીમાં તેની મેચ ફિટનેસ પાછી મેળવી લેશે.
આ મોટા ચહેરાઓ ઓક્શન હોલમાં જોવા મળશે
પૂર્વ ભારતીય ક્રિકેટર ગૌતમ ગંભીર પણ દુબઈ પહોંચી ગયા છે. તેમણે તાજેતરમાં કોલકાતા નાઈટ રાઈડર્સના મેન્ટર તરીકેની ભૂમિકા સંભાળી છે. અગાઉ તે લખનૌ સુપર જાયન્ટ્સમાં આ ભૂમિકા ભજવી રહ્યા હતા. મુંબઈ ઈન્ડિયન્સના આકાશ અંબાણી, પંજાબ કિંગ્સ તરફથી નેસ વાડિયા, નાઈટ રાઈડર્સના જય મહેતા પણ દુબઈ પહોંચી ગયા છે. આ મોટા ચહેરાઓ સાથે અન્ય ફ્રેન્ચાઈઝી માલિકો પણ આ હરાજીમાં જોવા મળશે.
