- WTC 2023-25માં ટીમ ઈન્ડિયાનું શાનદાર પ્રદર્શન
- 8માંથી 5 મેચ જીતીને પોઈન્ટ ટેબલમાં બીજા સ્થાને
- રોહિત શર્મા WTCમાં સૌથી વધુ રન બનાવનાર ઓપનર
વર્લ્ડ ટેસ્ટ ચેમ્પિયનશિપ 2023-25માં ટીમ ઈન્ડિયાનું શાનદાર પ્રદર્શન ચાલુ છે. 8માંથી 5 મેચ જીત્યા બાદ તે પોઈન્ટ ટેબલમાં બીજા સ્થાને છે. ટીમ ઈન્ડિયા હાલ ઈંગ્લેન્ડ સામે 5 મેચની સીરીઝ રમી રહી છે. ટીમ ઈન્ડિયાએ આ સીરિઝમાં 3-1ની અજેય સરસાઈ મેળવી લીધી છે. આ સીરીઝની વચ્ચે ટીમ ઈન્ડિયાના કેપ્ટન રોહિત શર્માએ એક ખાસ યાદીમાં દુનિયાના તમામ ઓપનરોને પાછળ છોડી દીધા છે.
રોહિત શર્મા WTCમાં નંબર-1 ઓપનર
વર્લ્ડ ટેસ્ટ ચેમ્પિયનશિપની શરૂઆત વર્ષ 2019માં થઈ હતી. હાલમાં વર્લ્ડ ટેસ્ટ ચેમ્પિયનશિપની ત્રીજી સિઝન રમાઈ રહી છે. આ સિઝનમાં રોહિત શર્માએ એક ખાસ રેકોર્ડ બનાવ્યો છે. તે વર્લ્ડ ટેસ્ટ ચેમ્પિયનશિપના ઈતિહાસમાં સૌથી વધુ રન બનાવનાર ઓપનર બની ગયો છે. રોહિત શર્માએ ઓપનર તરીકે WTCમાં 31 મેચ રમી છે. આ દરમિયાન તેણે 48.98ની એવરેજથી 2449 રન બનાવ્યા છે. તેણે આ યાદીમાં ડેવિડ વોર્નરને પાછળ છોડી દીધા છે. ડેવિડ વોર્નરે WTCમાં ઓપનર તરીકે 2423 રન બનાવ્યા હતા.
WTCમાં સૌથી વધુ રન બનાવનાર ઓપનર
- 2449 રન – રોહિત શર્મા
- 2423 રન – ડેવિડ વોર્નર
- 2238 રન – ઉસ્માન ખ્વાજા
- 2078 રન – દિમુથ કરુણારત્ને
- 1935 રન – ડીન એલ્ગર
રાંચી ટેસ્ટ મેચમાં કપ્તાની ઇનિંગ રમી
રોહિત શર્માએ રાંચી ટેસ્ટ મેચની બીજી ઇનિંગમાં શાનદાર બેટિંગ કરી હતી. આ મેચમાં ઈંગ્લેન્ડની ટીમે ભારતને જીતવા માટે 192 રનનો ટાર્ગેટ આપ્યો હતો. ચોથી ઈનિંગમાં આ લક્ષ્યનો પીછો કરવા માટે ટીમ ઈન્ડિયાને સારી શરૂઆતની જરૂર હતી. આવા અવસર પર રોહિત શર્માએ કપ્તાની ઇનિંગ રમી હતી. 81 બોલનો સામનો કરીને તેણે 5 ફોર અને 1 સિકસની મદદથી 55 રન બનાવ્યા અને ટીમને જીત તરફ દોરી ગયો હતો. ખાસ વાત એ હતી કે એક કેપ્ટન તરીકે તેણે ટેસ્ટની પ્રથમ ઇનિંગ અને ચોથી ઇનિંગમાં 50+ રન બનાવ્યા હતા.
