રશિયન સેનાના એક વરિષ્ઠ અધિકારીને ફિલ્મી અંદાજમાં વિસ્ફોટ કરીને મારી નાખવામાં આવ્યા છે. આ હુમલાની શંકા યુક્રેન પર વ્યક્ત કરવામાં આવી રહી છે. તપાસ એજન્સીઓ આ મામલે તપાસ કરી રહી છે. નોંધનીય છે કે રશિયન સેનાના અનેક અધિકારીઓ આ પ્રકારના હુમલાઓમાં મૃત્યુ પામ્યા છે
રશિયામાં એક સૈન્ય જનરલની ફિલ્મી શૈલીમાં હત્યા કરવામાં આવી છે. તપાસકર્તાઓના જણાવ્યા અનુસાર, સોમવારે સવારે દક્ષિણ મોસ્કોમાં એક રશિયન જનરલની કારની નીચે લગાવવામાં આવેલા વિસ્ફોટક ઉપકરણના ફાટવાથી તેમનું મૃત્યુ થયું. રશિયાની તપાસ સમિતિની અધિકૃત પ્રવક્તા સ્વેતલાના પેટ્રેન્કોએ જણાવ્યું કે રશિયન સેનાના જનરલ સ્ટાફના ઓપરેશનલ ટ્રેનિંગ નિર્દેશાલયના વડા, લેફ્ટિનેન્ટ જનરલ ફાનિલ સરવારોવ, આ દરેક હુમલામાં માર્યા ગયા હતા.
પાર્કિંગમાં થયો વિસ્ફોટ
રશિયન જનરલની હત્યાની શંકા યુક્રેન પર કરવામાં આવી રહી છે. પેટ્રેન્કોએ કહ્યું, તપાસકર્તાઓ હત્યાના મામલે અનેક દિશાઓથી તપાસ કરી રહ્યા છે. તેમાંની એક દિશા એ છે કે આ ઘટનાને યુક્રેનની ગુપ્તચર સેવાઓ દ્વારા અંજામ આપવામાં આવ્યો હોઇ શકે છે. રશિયન મીડિયાએ જણાવ્યું કે મોસ્કોની યાસેનેવા સ્ટ્રીટ પર આવેલા એક પાર્કિંગમાં સવારે લગભગ 7 વાગ્યે કારમાં વિસ્ફોટ થયો હતો, જેમાં રશિયન જનરલ ફાનિલ સરવારોવનું મોત થયું. રાષ્ટ્રપતિ વ્લાદિમિર પુતિનને સરવારોવની હત્યાની જાણ કરવામાં આવી છે. રક્ષા મંત્રાલયે કહ્યું કે સરવારોવ અગાઉ ચેચન્યામાં લડી ચૂક્યા હતા અને સીરિયામાં મોસ્કોના સૈન્ય અભિયાનનો ભાગ પણ રહ્યા હતા.
રશિયન સેનાના એક અન્ય જનરલની પણ આવી જ રીતે હત્યા કરાઇ હતી
ઉલ્લેખનીય છે કે યુક્રેનની સુરક્ષા સેવાએ ડિસેમ્બર 2024માં આવા જ એક હુમલામાં એક ઉચ્ચ પદસ્થ રશિયન જનરલની હત્યા કરી હતી. રશિયન સેનાના પરમાણુ, જૈવિક અને રાસાયણિક સુરક્ષા દળોના પ્રમુખ લેફ્ટનેન્ટ જનરલ ઇગોર કિરિલોવનું તેમના એપાર્ટમેન્ટ બિલ્ડિંગની બહાર ઇલેક્ટ્રિક સ્કૂટરમાં છુપાડવામાં આવેલા બોમ્બના વિસ્ફોટથી મૃત્યુ થયું હતું. આ હુમલામાં ઇગોરના સહાયક ઇલ્યા પોલિકાર્પોવનું પણ મોત નીપજ્યુે હતું. આ મામલે એક ઉઝબેક વ્યક્તિની તાત્કાલિક ધરપકડ કરવામાં આવી હતી અને તેના પર યુક્રેનની સુરક્ષા સેવા તરફથી કિરિલોવની હત્યાનો આરોપ મૂકવામાં આવ્યો હતો.
