ભગવાન આગળ કિંગ નતમસ્તક, કોહલીએ સદી બાદ સચિન માટે કહી ખાસ વાત

• ભારતે સાઉથ આફ્રિકાને 243 રને હરાવ્યું
  
• વિરાટ કોહલીએ ODIમાં 49મી સદી ફટકારી
  
• સચિન તેંડુલકર જેટલો સારો ક્યારેય નહીં બની શકું: કોહલી
  

ક્રિકેટના ભગવાન તરીકે ઓળખાતા સચિન તેંડુલકરે વિરાટ કોહલીને 49 સદી ફટકારવા બદલ અભિનંદન પાઠવ્યા હતા. જો કે મેચ બાદ જ્યારે કોહલીને આ વિશે કહેવામાં આવ્યું ત્યારે તે ભાવુક થઈ ગયો હતો. તેણે કહ્યું કે હું ક્યારેય સચિન તેંડુલકરની સરખામણી નહીં કરી શકું. સચિને X પર પોસ્ટ કરીને કહ્યું, ‘વિરાટ શાનદાર રીતે રમ્યો. મને આ વર્ષે 49 થી 50 (ઉંમરમાં) સુધી પહોંચવામાં 365 દિવસ લાગ્યા. હું આશા રાખું છું કે આગામી થોડા દિવસોમાં તમે 49 થી 50 (સદીઓ) સુધી પહોંચી જશો અને મારો રેકોર્ડ તોડી નાખશો. અભિનંદન.’

હીરોના રેકોર્ડની બરાબરી કરવી ખૂબ જ ખાસ

વિરાટ કોહલીને પ્લેયર ઓફ ધ મેચનો એવોર્ડ આપવામાં આવ્યો હતો. વિરાટે એવોર્ડ સમારોહમાં સચિનના મેસેજનો જવાબ આપ્યો હતો. તેણે કહ્યું, ‘મારા હીરોના રેકોર્ડની બરાબરી કરવી મારા માટે ખૂબ જ ખાસ છે. બેટિંગની વાત આવે તો તે (સચિન) પરફેક્ટ છે. આ મારા માટે ખૂબ જ ભાવનાત્મક ક્ષણ છે. હું તેમના જેટલો સારો ક્યારેય નહીં બની શકું. તેના બેટમાંથી પરફેક્શન નીકળ્યું હતું. તે હંમેશા મારો હીરો રહેશે. હું જાણું છું કે હું ક્યાંથી આવું છું. હું તે દિવસોને જાણું છું જ્યારે મેં તેમને (સચિન તેંડુલકર) ટીવી પર જોયા હતા. તેમની પાસેથી આવી પ્રશંસા મેળવવી એ મારા માટે ઘણું અર્થપૂર્ણ છે. આ એક મોટી મેચ હતી. ટુર્નામેન્ટની સંભવત સૌથી મુશ્કેલ ટીમ રમવી પડકારજનક હતી. આ મેચ, આ ઇનિંગ્સે મને વધુ સારું કરવા માટે પ્રેરણા આપી હતી. કારણ કે તે (સદી) મારા જન્મદિવસ પર બની હતી, તે ખાસ બની હતી અને લોકોએ તેને મારા માટે વધુ ખાસ બનાવી હતી.

ધીમી ઈનિંગ્સ રમવા અંગે કોહલીનું નિવેદન

ધીમી ઈનિંગ્સ રમવા અંગે કોહલીએ કહ્યું, ‘લોકો રમતને અલગ રીતે જુએ છે. જ્યારે ઓપનરો સારી શરૂઆત કરે છે, ત્યારે તમને લાગે છે કે તે એક સરળ પીચ છે અને દરેકને તે પ્રમાણે રમવું પડશે. પરંતુ જેમ જેમ બોલ જૂનો થતો ગયો તેમ તેમ વિકેટ ઘણી ધીમી થતી ગઈ. મારા તરફથી અન્ય બેટ્સમેનોને સ્પષ્ટ સંદેશ હતો, મારી આસપાસ બેટિંગ કરતા રહો. હું એ પરિપ્રેક્ષ્યથી ખુશ હતો. એકવાર અમે 315 થી વધુ સ્કોર કર્યા પછી, અમે જાણતા હતા કે અમે સારો સ્કોર બનાવ્યો છે.

સદીને લઈને વિરાટે કહ્યું, ‘હું ક્રિકેટ રમવાની મજા લઈ રહ્યો છું, તે મારા માટે વધુ મહત્વનું છે. હું ખુશ છું કે ભગવાને મને એ સુખ આપ્યું છે. હું ખુશ છું કે હું વર્ષોથી જે કરી રહ્યો છું તે કરવા સક્ષમ છું.

ભારતે સાઉથ આફ્રિકાને હરાવ્યું

વિરાટે 101 રનની અણનમ ઇનિંગ રમી હતી. તેની ઇનિંગ્સ અને શ્રેયસ ઐયરના 77 રનની મદદથી ભારતે 50 ઓવરમાં પાંચ વિકેટ ગુમાવીને 326 રન બનાવ્યા હતા. જવાબમાં દક્ષિણ આફ્રિકા 27.1 ઓવરમાં 83 રનમાં ઓલઆઉટ થઈ ગયું હતું. ભારતે આ મેચ 243 રને જીતી લીધી હતી.