સાગઠિયાના ભાઇ દિલીપ સાગઠિયાના નામે સૌ પ્રથમ રૂપિયા પ૧,,૭,પ૦૦ની કિમતના થયા છે દસ્તાવેજ: રજીસ્ટ્રેશન સહિતની કીંમત પ૪,પ૭,૮૮૦ ઓનની કિંમત અલગ
સાગઠિયાના ભાઇ દિલીપે ખુદ મનસુખ સાગઠિયાના નામે કરી આપ્યા છે પાવર ઓફ એટર્ની !
ખુદ સાગઠિયાના પાન કાર્ડના આધારે સ્ટેમ્પ ડયુટી ભરાઇ હોવા છતાં એ.સી.બી,ઇન્કમટેકસ,ઇ.ડી. હાથ જોડીને શા માટે બેઠું છે ? સીટની જાણ બહાર રહી ગઇ આ પ્રોપર્ટી ?
ટવીન સ્ટારના સી.સી ટીવી કબજે કરી તપાસ કરવામાં આવે તો સીટને મળી શકે છે ચોંકાવનારા પૂરાવા
રાજકોટ મહાનગરપાલિકામાં કોઇ મોટા નેતાની કૃપાથી છેલ્લા દસેક વર્ષથી ચીફ ટાઉન પ્લાનર તરીકે ૭પ હજાર રૂપિયાના અંદાજીત માસિક પગારથી નોકરી કરતાં સાગઠિયાએ તેમને મળેલી સતાનો દૂર ઉપયોગ કરી બિલ્ડરોને દબાવી અને કરોડો રૂપિયાની કાળી કમાણી કરી ધંધામાં લગાવી છે. પેટ્રોલ પંપોમાં રોકાણ કર્યુ છે. વૈભવી ફાર્મ હાઉસ ખડા કર્યા છે. વૈભવી બંગલા બનાવ્યા હોવાના અહેવાલ છે. એક તરફ સાગઠિયાને એસીબીની અને સીટની તપાસ હેઠળ રિમાન્ડ ઉપર લેવાયા છે ત્યારે બીજી બાજુ સાગઠિયાની વધુને વધુ બેનંબરી કમાણીથી ખરીદેલી સંપતિની વિગતો બહાર આવી રહી છે. અગ્ર ગુજરાતને મળેલા પૂરાવા રાજકોટ મનપાના પૂર્વ ચીફ ટાઉનપ્લાનર મનસુખ સાગઠિયાના નામે શહેરના ૧પ૦ ફૂટ રોડ ઉપર નાના મવા ચોકથી આગળ વૈભવી ટવીનસ્ટાર ટાવરના નોર્થ બ્લોકમાં વૈભવી ઓફિસ છે. આ ઓફિસનો દસ્તાવે જ સાગઠિયાના સગા ભાઇ દિલીપ સાગઠિયાના નામે થયો હતો. જેની ખરીદ દસ્તાવેજી કિંમત રૂપિયા પ૧,૭પ૦૦ની છે. ઓનની રકમ અલગ ગણવાની. આ ઓફિસ ખરીદી લીધા બાદ દિલીપે મનસુખ સાગઠિયાના નામે પાવર ઓફ એટર્ની કરી નવું તિકડમ કર્યુ છે. કાયદાની આંખમાં,ઇન્કમટેકસની આંખમાં અને જનતાની આંખમાં ધુળ નાંખવાની પણ ચેષ્ટા કરી છે.
અગ્ર ગુજરાતને પ્રાપ્ત થયેલા દસ્તાવેજ મુજબ ૪ ડિસેમ્બર ર૦ર૦ના રોજ શહેરના ૧પ૦ ફૂટ રોડ ઉપર નાના મવા ચોકથી આગળ મવડિ તરફ આવેલાં ટવીન સ્ટાર ટાવરના નોર્થ બ્લોકમાં નવમા માળે ૯૦૧ નંબરની ઓફિસ મનસુખ સાગઠિયાના ભાઇ દિલીપ સાગઠિયાએ ખરીદી અને દસ્તાવેજ કર્યા છે. આ દસ્તાવેજ દિલીપ સાગઠિયાના નામે થયો હતો. જેની દસ્તાવેજની ખરીદ કિંમત રૂપિયા પ૧,૭પ૦૦ દર્શાવાઇ છે. મજા એ છે કે ૪ ડિસેમ્બર ર૦ર૦ના રોજ દિલીપ સાગઠિયાના નામે ખરીદવામાં આવેલી મિલ્કતના ૧૯મી ફેબ્રુઆરી ર૦ર૧ના રોજ મનસુખ સાગઠિયા તત્કાલીન ચીફ ટાઉનપ્લાનરના નામે પાવર ઓફ એટર્ની થઇ ગયા છે. માત્ર ત્રણસો રૂપિયાના સ્ટેમ્પ પેપર ઉપર થયેલા પાવર ઓફ એટર્નીમાં ન તો પાન નંબર દર્શાવવાની જરૂર છે. ન અન્ય કોઇ વિગત . આમ લાખો રૂપિયાની સંપતિ પાવર ઓફ એટર્નીથી સાગઠિયાએ બખુબી પોતાની તરફેણમાં કરી લીધી છે.
આશ્ચર્યની વાત એ છે કે બિલ્ડરો ઉપર દરોડા પાડતી વખતે આવકવેરા ખાતા ચોકીદારોની ઝુંપડીના સી.સી. ટીવી વગેરે સુધી પહોંચી જાય છે. પરંતુ સાગઠિયા સામે એસીબીમાં સતત ફરીયાદો,જાહેરમાં મર્સીડીઝ ગાડીમાં હરવું ફરવું મનપા કચેરીએ આવવું છતાં ઇડી.એસીબી,ઇન્કમટેકસ તંત્રના ધ્યાને કોઇ આર્થિક બાબતો ન આવવી એ પણ નોંધનિય બાબત બની રહેશે.જેમના આવકવેરાના જયુરીડિકશનમાં સાગઠિયાની પ્રોપર્ટી આવતી હોય તે અધિકારીની નિષ્ક્રિયતા, એસીબીની અત્યાર સુધીની નિષ્ક્રિયતા પણ અનેક સંદેહ જગાવે છે. હવે જયારે સાગઠિયાની અનેક પ્રોપર્ટીના વ્યહવારો બહાર આવી ગયા છે ત્યારે તે કબજે કરી સમગ્ર કેસ ફાસ્ટ ટ્રેકમાં ચલાવી તેની તમામ પ્રોપર્ટી શ્રીસરકાર કરી ટી.આર.પી કાંડના મૃતકોના પરિવારને આપી દેવા સહિતના પગલાં લેવાવા જોઇએ .
સાગઠિયાને દર વરસે તેની આવકનું પ્રમાણપત્ર સરકારને આપવાનું
હોય છે, તેમાં આવક જે આવક દર્શાવી હશે તેનુ સોગંદનામુ પણ છેતરપિંડી કહેવાય
દરેક સરકાર કર્મચારી અને અધિકારીને તેમની વાર્ષિક આવકનું રીટર્ન ભરવાનું હોય છે. અને પ્રમાણિત આવકનું સોગંદનામુ કરવાનું હોય છે. મનસુખ સાગઠિયાના સરકારી પગારની આવક સિવાય તેમણે આવકના કોઇ સ્ત્રોત દેખાડયા ન હોય તો તેમની પાસે કરોડો અબજોની મિલ્કતો કયાંથી અવી એ સવાલ થાય. તેમની ગેરકાયદે મિલ્કતો તેમની જ છે એ સ્થાપિત કરવાનું કામ હવે આવકવેરા ,ઇ.ડી. અને એસીબી તથા પોલીસનું છે. પણ સરકારને તેમણે આવકનું ખોટુ સોગંદનામુ કરી છેતરપિંડી કરી તે પણ ગુનો બને છે. જેની અલગથી સજા થવી જોઇએ.
છોટે મિંયા તો છોટે મિંયા બડે મિંયાભી……
મનસુખના મોટા ભાઇ કિશોર સાગઠિયા છે
ગાંધીનગર ખાતે એડિશનલ ચીફ ટાઉનપ્લાનર
રાજકોટમાં ચીફ ટાઉન પ્લાનર તરીકે બિલ્ડરોને લૂંટી આડો આંક વાળી દેનાર મનસુખ સાગઠિયાને પાંચ ભાઇઓ છે. જેમાં તેના એક ભાઇ કિશોર સાગઠિયા ગાંધીનગર ખાતે એડિશ્નલ ચીફ ટાઉનપ્લાનર હોવાની વિગતો જાણમાં આવી છે. આ ભાઇઓ વચ્ચેના વ્યહવારોની તપાસ પણ થવી જોઇએ અને જે સત્ય હોય તે સીટ સહિતની તમામ એજન્સીઓ,ઇન્કડટેકસ,ઇડી.સી.બી.આઇ.પોલીસ વગેરેની સંયુકત એજન્સીએ તપાસ કરવી જોઇએ. કારણ કે મનસુખ સાગઠિયાનો કાર્યકાળ લાંબો છે. તેની બેનામી સંપતિ વગેરે પણ અનેક ક્ષેત્રોમાં પથરાયેલી છે. આથી તમામ સરકારી એજન્સીઓની મોટી ટીમ બહાર આવશે ત્યારે તપાસને યોગ્ય સ્કેલ ઉપર લઇ જઇ શકાશે.
