- યુપી સીએમએ 22 જાન્યુઆરીને લઇને આપ્યો આદેશ
- યુપીમાં શાળા-કોલેજ બંધ રહેશે અને દારૂનુ વેચાણ નહી થાય
- આજે યોગી આદિત્યનાથે અયોધ્યામાં તૈયારીઓની કરી હતી સમીક્ષા
અયોધ્યામાં 22 જાન્યુઆરીએ રામમંદિરની પ્રાણ પ્રતિષ્ઠાનો સમારોહ યોજાશે. ત્યારે યુપી સીએમ યોગી આદિત્યનાથે મહત્વનો આદેશ આપ્યો છે. તેઓએ જણાવ્યું કે 22 જાન્યુઆરીએ શૈક્ષણિક સંસ્થાઓમાં રજા રહેશે. તેમજ આ દિવસે રાજ્યમાં દારૂનુ વેચાણ નહી થાય.
સીએમ યોગીએ શું આપ્યો આદેશ
મુખ્યમંત્રીએ આદેશમાં કહ્યું કે અયોધ્યામાં મુલાકાતીઓને અવિસ્મરણીય આતિથ્ય મળશે. તેમજ 22 જાન્યુઆરીએ તમામ સરકારી ઈમારતોને શણગારવામાં આવે અને ફટાકડા ફોડવાની પણ વ્યવસ્થા કરવામાં આવે. અયોધ્યામાં સ્વચ્છતાનું ‘કુંભ મોડલ’ લાગુ કરો.
સુરક્ષા-સ્વચ્છતા સાથે બાંધછોડ નહી- સીએમ યોગી
મહત્વનું છે કે મુખ્યમંત્રી 14 જાન્યુઆરીએ અયોધ્યામાં સ્વચ્છતા અભિયાનની શરૂઆત કરશે. તેઓ આજે પ્રાણ પ્રતિષ્ઠા મહોત્સવની તૈયારીઓની સમીક્ષા કરવા અયોધ્યા પહોંચ્યા હતા. તેમણે કહ્યું કે સ્વચ્છતા અને સુરક્ષા સાથે બાંધછોડ કરવામાં આવશે નહીં. તેમણે નિર્દેશ આપ્યો કે વીવીઆઈપીના વિશ્રામ સ્થાનો અગાઉથી નક્કી કરવામાં આવે. અયોધ્યાધામમાં આવતા ભક્તો/પ્રવાસીઓને પર્યટક માર્ગદર્શિકાઓ તૈનાત કરવા પણ કહેવામાં આવ્યું છે જે યાત્રીઓને દિવ્ય અને ભવ્ય અયોધ્યાની મહિમાનો પરિચય કરાવશે.
જિલ્લા વહીવટી તંત્ર વ્યસ્ત
22 જાન્યુઆરીએ રામ મંદિરના અભિષેક માટે દેશ અને દુનિયાના તમામ મહેમાનો અયોધ્યા આવશે. તેને જોતા અયોધ્યા જિલ્લા વહીવટીતંત્ર જિલ્લાની તમામ હોટલોમાં મહેમાનોના રહેવાની વ્યવસ્થા કરવામાં વ્યસ્ત છે. બીજી તરફ અયોધ્યાને અડીને આવેલા લખનૌના હોટેલ સંચાલકો પણ મહેમાનોના સ્વાગતની તૈયારી કરી રહ્યા છે.
