10 ઈંચ કરતા વધુ વરસાદ ખાબકતા સાવચેતીના ભાગરૂપે લેવાયો નિર્ણય
અગ્ર ગુજરાત ભાવનગર
સૌરાષ્ટ્રમાં ચોમાસાની ધોધમાર એન્ટ્રી થઈ ચુકી છે. બે દિવસથી ભાવનગર પર મેઘરાજા મહેરબાન થયા છે. સતત પડી રહેલા વરસાદને પગલે ભાવેણાવાસીઓને આકરી ગરમીમાંથી રાહત મળી છે. જો કે વરસાદને પગલે ઠેર-ઠેર પાણી ભરાઈ જવાની સમસ્યા પણ થઈ છે, જેને લીધે જનજીવન અસ્તવ્યસ્ત થઈ ગયું છે. ભારે વરસાદને ધ્યાનમાં લઈને જિલ્લા કલેકટરે ભાવનગરમાં આજે અને આવતીકાલે શાળા-કોલેજ બંધ રાખવાનો આદેશ જાહેર કર્યો છે.
ભાવનગર જિલ્લામાં ભારે વરસાદની સ્થિતિને લઈને શાળા-કોલેજ બંધ રહેશે. જિલ્લા શિક્ષણ અધિકારી દ્વારા શાળા કોલેજ બંધ રાખવા આદેશ આપવામાં આવ્યા છે. ભારે વરસાદને પગલે બે દિવસ સુધી ભાવનગર શહેર અને જિલ્લાની શાળા કોલેજો બંધ રહેશે. જિલ્લામાં પડી રહેલા અવિરત વરસાદના પગલે આવો નિર્ણય લેવામાં આવ્યો છે.
ભાવનગર જિલ્લામાં ધોધમાર વરસાદ સાથે જ ચોમાસાની શરૂઆત થઈ ગઈ છે. વરસાદના લીધે જળાશયોમાં નવા નીર આવ્યા આવ્યા સાથે જ વાતાવરણમાં ઠંડક પ્રસારાઈ ગઈ છે. જેથી ખેડૂતોમાં આનંદનો માહોલ છે. ભાવનગર જિલ્લામાં જેસર તાલુકામાં મેઘરાજા મન મૂકીને વરસ્યા છે. જેસર તાલુકામાં સવા 9 ઇંચ વરસાદ નોંધાયો છે. આ સિવાય શાંતિનગર, તાતણીયા, ઈટીયા, કરલા, સરેરા, કોટામોઈ, બિલા, અયાવેજ, રાણપડા, છાપરીયાળી, દેપલા સહિતના ઘણા ગામોમાં પણ વરસાદ આવ્યો છે. ભાવનગર જિલ્લાના પાલિતાણા અને શિહોરમાં 12 ઇંચ, જયારે જેશર અને ઉમરાળામાં 11 ઇંચ વરસાદ પડ્યો છે. આ સતત વરસતા વરસાદના કારણે અનેક નિચાણવારા વિસ્તારોમાં પાણી ભરાવાની પરિસ્થિતિ સર્જાઈ છે. તંત્ર દ્વારા લોકોને સુરક્ષિત રહેવા અને જાહેર સુચનાઓનું પાલન કરવા અનુરોધ કરવામાં આવ્યા છે. લોકોને સલામતી માટે ઘરની અંદર જ રહેવાની તેમજ બિનજરૂરી રીતે બહાર ન નીકળવાની સલાહ આપવામાં આવી છે.
