વિંછીયાના નાના માત્રામાં કાર નીચે કચડી યુવકની નિર્મમ હત્યા, 10 વર્ષની દીકરી ગંભીર
માતાનો હાથ પકડવા મુદ્દે થયેલી અદાવતમાં વાડીએ કામ કરતા પિતા–પુત્રી પર સ્વિફ્ટ ચડાવી
અગ્ર ગુજરાત, રાજકોટ
વિંછીયા તાલુકાના નાના માત્રા ગામની સીમમાં કૌટુંબિક અદાવતે લોહિયાળ વળાંક લીધો છે. વાડીએ ખેતી કામ કરી રહેલા 40 વર્ષીય યુવકને તેના જ કૌટુંબિક ભાઈએ કાર નીચે કચડીને મોતને ઘાટ ઉતારી દીધો, જ્યારે સાથે રહેલી 10 વર્ષની માસૂમ દીકરીને પણ કારથી હડફેટે લઈ ગંભીર રીતે ઘાયલ કરી હતી. બનાવથી સમગ્ર પંથકમાં શોક અને રોષની લાગણી ફેલાઈ ગઈ છે.
નાના માત્રા ગામે રહેતા ગાબાભાઈ ઉર્ફે ગભરૂભાઈ મેરાભાઈ ગરાભડીયા ગઇકાલે પોતાની દીકરી કૈલાશ અને પુત્ર રોહિત સાથે રણછોડભાઈ ગરાભડિયાની વાડીમાં દવા છાંટવા માટે બાઈક પર ગયા હતા. તે દરમિયાન સવારના સમયે ગભરૂભાઈનો કૌટુંબિક ભાઈ ભગા મનસુખ ગરાભડીયા સફેદ રંગની સ્વિફ્ટ કાર લઈને ત્યાં ધસી આવ્યો હતો. આરોપીએ પૂર્વયોજિત ઈરાદા સાથે પાછળથી ગભરૂભાઈ પર કાર ચડાવી દીધી અને સાથે તેમની દીકરી કૈલાશને પણ અડફેટે લીધી હતી. બનાવ બાદ આરોપી કાર સ્થળ પર જ મૂકી ફરાર થઈ ગયો હતો.
બનાવની જાણ થતાં પરિવારજનો વાડીએ દોડી આવ્યા હતા. પિતા–પુત્રીને તાત્કાલિક વિંછીયા સરકારી હોસ્પિટલ ખસેડવામાં આવ્યા, જ્યાં ફરજ પરના તબીબે ગભરૂભાઈને મૃત જાહેર કરતા મામલો હત્યામાં ફેરવાયો હતો. ગંભીર રીતે ઇજાગ્રસ્ત દીકરી કૈલાશને વધુ સારવાર માટે બોટાદની હોસ્પિટલ ખસેડવામાં આવી છે, જ્યાં તેની હાલત ચિંતાજનક હોવાનું જાણવા મળે છે. મૃતકની પત્ની રમીલાબેન ઉર્ફે જશુબેનની ફરિયાદ મુજબ, આશરે ત્રણ મહિના અગાઉ આરોપીની માતા મધુબેને એવો આક્ષેપ કર્યો હતો કે ગભરૂભાઈએ તેમનો હાથ પકડ્યો હતો. આ મુદ્દે તે સમયે બંને પરિવારો વચ્ચે ઉગ્ર ઝઘડો થયો હતો અને આરોપી ભગાએ ગભરૂભાઈને જાનથી મારી નાખવાની ધમકી પણ આપી હતી. જોકે કુટુંબીઓ વચ્ચે સમાધાન થતાં મામલો તે વખતે ઠંડો પડ્યો હતો.
ફરિયાદમાં વધુમાં જણાવાયું છે કે આરોપી ગઇ તા.27ના રાત્રે નવેક વાગ્યે સ્વિફ્ટ કાર લઈને ગામે આવ્યો હતો અને મૃતકના ઘરની નજીક કાર પાર્ક કરી આખી રાત તેની બહાર આવવાની રાહ જોતો રહ્યો હતો. સવારે ગભરૂભાઈ બાઈક લઈને નીકળતા જ આરોપીએ કારથી પીછો કરી તેમને વાડીએ જઈ કચડી નાખ્યા હતા.
મૃતક ગભરૂભાઈ ચાર સંતાનોના પિતા હતા, એક પુત્ર અને ત્રણ પુત્રી. ખેતી કામ કરીને પરિવારનું ગુજરાન ચલાવતા આ યુવકની હત્યાથી ચારેય સંતાનોએ પિતાની છત્રછાયા ગુમાવી છે અને પરિવારમાં હૈયાવિખૂટું વાતાવરણ છવાઈ ગયું છે. બનાવ અંગે વિંછીયા પોલીસ મથકના પીઆઈ એ.સી. ડામોરના માર્ગદર્શન હેઠળ પોલીસે હત્યાની કલમ હેઠળ ગુનો નોંધી આરોપી ભગા મનસુખ ગરાભડીયાને ઝડપી લઈ કાયદેસરની કાર્યવાહી શરૂ કરી છે.
