સેન્સેકસ 187 પોઈન્ટ ઘટી 65794

મુંબઈ : પરસનલ લોન્સ સંદર્ભમાં આરબીઆઈએ બેન્કો માટે રિસ્ક વેઈટેજ ધોરણને સખત બનાવતા બેન્ક શેરોની આગેવાની હેઠળ શેરબજારમાં સપ્તાહ અંતે ઘટાડો થયો હતો અને  બે દિવસના સુધારાને બ્રેક લાગી હતી. બેન્કો દ્વારા એનબીએફસીસને  પૂરા પડાતા ધિરાણ માટેના  રિસ્ક વેઈટેજમાં પણ વધારો કરાતા નાણાં સંસ્થાઓના શેરો પણ દબાણ હેઠળ  આવી ગયા હતા. રેલવે સંબંધિત સ્ટોકસમાં લેવાલી નીકળતા ભાવમાં ઉછાળો જોવા મળ્યો હતો. ફાર્મા શેરો ઊંચકાયા હતા.  બે દિવસની સતત રેલી બાદ ઓઈલ અને ગેસ શેરોમાં ઘટાડો જોવા મળ્યો હતો. બીએસઈ સેન્સેકસ ૧૮૭.૭૫ પોઈન્ટ ઘટી ૬૫૭૯૪.૭૩ બંધ રહ્યો હતો જ્યારે નિફટી૫૦ ઈન્ડેકસ ૩૩.૪૦ પોઈન્ટ ઘટી ૧૯૭૩૧.૮૦ બંધ રહ્યો હતો.  મિડકેપ શેરોમાં ટકેલું વાતાવરણ જોવા મળતું હતું.બીએસઈ પર ૧૯૨૬ શેરના ભાવ વધ્યા હતા જ્યારે ૧૮૧૩ના ભાવ ઘટયા હતા. 

નિફટી બેન્ક ઈન્ડેકસમાં ૫૫૦થી વધુનું ગાબડું

તાત્કાલિક રીતે અમલમાં આવે તે રીતે બેન્કો માટે અનસિકયોર્ડ લોન્સ જેમ કે વ્યક્તિગત લોન્સ, ક્રેડિટ કાર્ડસ પરની લોન માટેના રિસ્ક વેઈટેજને ૧૦૦ ટકા પરથી વધારી ૧૨૫ ટકા કરાતા બેન્ક શેરોમાં ગાબડાં પડયા હતા. નવા ધોરણને કારણે બેન્કોએ વધુ નાણાંની જોગવાઈ કરવાની રહેશે, જે તેમના નફા પર અસર કરશે તેવી ગણતરી મુકાઈ રહી છે. એસબીઆઈ રૂપિયા ૨૧.૬૦ ઘટી રૂપિયા ૫૬૩.૦૫, આઈડીએફસી ફર્સ્ટ બેન્ક રૂપિયા ૩.૩૦ વધી રૂપિયા ૮૫.૧૦, એક્સિઝ બેન્ક રૂપિયા ૩૨ ઘટી રૂપિયા ૯૯૪.૩૫  બંધ રહ્યો હતો.

રેલવે સંબંધિત શેરો ઝળકયા 

 આગામી ચાર પાંચ વર્ષમાં સરકાર ૩૦૦૦ નવી ટ્રેનો દાખલ કરવાની યોજના ધરાવતી હોવાના અહેવાલે રેલ સંબંધિત સ્ટોકસને ટેકો મળ્યો હતો. ઊતારૂ ક્ષમતા જે હાલમાં ૮૦૦ કરોડ છે તે વધારી ૧૦૦૦ કરોડ કરવાની દરખાસ્ત છે. ટીટાગઢ, ઈરકોન, રેલટેલ કોર્પ, આઈઆરએફસી, રેલ વિકાસ નિગમ, જ્યુપિટર વેગન ૫થી ૧૬ ટકા ઊંચકાયા  હતા. રેલ વિકાસ રૂપિયા ૮.૪૦ વધી રૂપિયા ૧૬૬.૮૫, રેલટેલ રૂપિયા ૨૩.૧૫ વધી રૂપિયા ૨૭૧.૧૫, ટીટાગઢ રૂપિયા ૧૩૬.૪૦ વધી રૂપિયા ૯૭૪.૬૫ બંધ રહ્યો હતો. 

ફાર્મા શેરોમાં નોંધપાત્ર ઉછાળો

રશિયા તથા યુક્રેન યુદ્ધ બાદ હવે ઈઝરાયલ અને હમાસ યુદ્ધને કારણે દવા માટેની માગમાં વધારો થવાની શકયતાએ ફાર્મા શેરોમાં કરન્ટ આવ્યો હતો. ઓરોબિન્દો ફાર્મા રૂપિયા ૩૦.૮૦ વધી રૂપિયા ૧૦૦૭.૮૦, ટોરન્ટ ફાર્મા રૂપિયા ૪૨.૮૦ વધી રૂપિયા ૨૦૮૨.૩૫, સન ફાર્મા રૂપિયા ૫.૦૫ વધી રૂપિયા ૧૧૯૪.૬૦, સિપ્લા રૂપિયા ૧૩.૪૦ વધી રૂપિયા ૧૨૪૮.૨૦ રહ્યા હતા.

એફઆઈઆઈ તથા ડીઆઈઆઈની વેચવાલી

ડીઆઈઆઈએ   રૂપિયા ૬૮૪૯.૦૪ કરોડની ખરીદી સામે રૂપિયા ૭૪૧૪.૫૨ કરોડની વેચવાલી કરી હતી. આમ ડીઆઈઆઈની કુલ ૫૬૫.૪૮ કરોડની નેટ વેચવાલી આવી હતી. એફઆઈઆઈ પણ  રૂપિયા ૧૧૫૫૭.૬૫ કરોડની ખરીદી સામે  રૂપિયા ૧૨૦૩૫.૪૧ કરોડનો માલ વેચ્યો હતો. આમ એફઆઈઆઈની પણ રૂપિયા ૪૭૭.૭૬ કરોડની નેટ વેચવાલી રહી હતી.