મુંબઈ : અમેરિકી શેર બજારોમાં ગઈકાલે રિકવરી બાદ આજે ઈઝરાયેલ-હમાસ યુદ્વમાં બંધકો મામલે સમાધાન કરાવવાની કતારની પહેલ અને ચાઈના દ્વારા સ્ટીમ્યુલસના નવા પગલાંની અસરે વૈશ્વિક બજારોમાં ખાસ એશીયાના બજારોમાં રિકવરીથી વિપરીત ભારતીય શેર બજારોમાં અવિરત ગાબડાં પડયા હતા. જીઓપોલિટીકલ ટેન્શન વચ્ચે ક્રુડ ઓઈલના આંતરરાષ્ટ્રીય ભાવ વધી આવ્યા બાદ ઘટાડા તરફી રહ્યા છતાં મોંઘવારી-ફુગાવાનું પરિબળ ભારત માટે જોખમી બની રહેવાની શકયતા અને ઓપરેટરો, ફંડો સ્મોલ, મિડ કેપ શેરોમાં મંદીમાં આવ્યાની ચર્ચા વચ્ચે શેરોમાં ધબડકો ચાલુ રહ્યો હતો. બેંકિંગ-ફાઈનાન્સ, આઈટી-સોફ્ટવેર સર્વિસિઝ, કેપિટલ ગુડઝ, ઓટો, કન્ઝયુમર ડયુરેબલ્સ શેરોમાં ઓફલોડિંગે સેન્સેક્સ ૫૨૨.૮૨ પોઈન્ટ તૂટીને ૬૪૦૪૯.૦૬ અને નિફટી સ્પોટ ૧૫૯.૬૦ પોઈન્ટ ગબડીને ૧૯૧૨૨.૧૫ બંધ રહ્યા હતા. ક્રુડ ઓઈલના આંતરરાષ્ટ્રીય ભાવ ઘટી સાંજે બ્રેન્ટ ક્રુડના ૮૮.૧૫ ડોલર અને નાયમેક્ષ-ન્યુયોર્ક ક્રુડ ૮૩.૭૧ ડોલર નજીક રહ્યા હતા.બીએસઈમાં કુલ ટ્રેડીંગ થયેલી ૩૭૯૫ સ્ક્રિપોમાંથી વધનારની સંખ્યા ૧૧૪૦ અને ઘટનારની સંખ્યા ૨૫૫૧ રહી હતી.
આઈટી ઈન્ડેક્સ ૩૫૨ પોઇન્ટ તૂટયો
આઈટી-સોફ્ટવેર સર્વિસિઝ, ટેકનોલોજી શેરોમાં આજે ફંડોની મોટાપાયે વેચવાલી થતાં બીએસઈ આઈટી ઈન્ડેક્સ ૩૫૨.૫૩ પોઈન્ટ તૂટીને ૩૦૯૦૨.૫૧ બંધ રહ્યો હતો. તાન્લા પ્લેટફોર્મ રૂ.૫૨.૫૦ તૂટીને રૂ.૯૫૮, ૬૩ મૂન્સ ટેકનોલોજી રૂ.૧૨.૭૦ તૂટીને રૂ.૨૫૨.૧૦, ક્રેસાન્ડા સોલ્યુશન ૮૬ પૈસા તૂટીને રૂ.૨૨.૬૦, જેનિસીસ રૂ.૧૦.૮૦ તૂટીને રૂ.૩૧૨.૯૫, સોનાટા રૂ.૩૦.૪૦ તૂટીને રૂ.૧૦૪૬.૮૦, ઈન્ફોસીસ રૂ.૩૭.૧૦ તૂટીને રૂ.૧૩૭૧.૮૫, સિએન્ટ રૂ.૧૫ ઘટીને રૂ.૧૬૦૨, સાસ્કેન રૂ.૭.૧૫ ઘટીને રૂ.૧૧૩૩.૭૫, ટીસીએસ રૂ.૧૫.૦૫ ઘટીને રૂ.૩૩૯૩.૯૫, કેપીઆઈટી ટેકનોલોજી રૂ.૪.૯૫ ઘટીને રૂ.૧૧૪૯.૧૦ રહ્યા હતા.
બેંકિંગ શેરોમાં ફંડોની વેચવાલી
બેંકિંગ-ફાઈનાન્સ શેરોમાં પણ ફંડોની નફારૂપી વેચવાલી સતત રહી હતી. ઈન્ડસઈન્ડ બેંક રૂ.૨૫.૬૦ ઘટીને રૂ.૧૪૧૨.૭૦, આઈસીઆઈસીઆઈ બેંક રૂ.૧૩.૭૦ ઘટીને રૂ.૯૧૬.૦૫, ફેડરલ બેંક રૂ.૧.૮૦ તૂટીને રૂ.૧૪૧.૫૦, એક્સિસ બેંક પરિણામ પૂર્વે રૂ.૮.૧૦ ઘટીને રૂ.૯૫૫.૩૫, એચડીએફસી બેંક રૂ.૯.૨૫ ઘટીને રૂ.૧૪૯૬.૫૫, કોટક મહિન્દ્રા બેંક રૂ.૧૦.૮૫ ઘટીને રૂ.૧૭૨૯.૧૦ રહ્યા હતા. જ્યારે સ્ટેટ બેંક ઓફ ઈન્ડિયા રૂ.૩.૩૦ વધીને રૂ.૫૫૬.૩૫, એયુ સ્મોલ બેંક રૂ.૧૨.૭૫ વધીને રૂ.૭૦૬.૮૦ રહ્યા હતા.
FPI/FIIની રૂ.૪૨૩૬ કરોડની ચોખ્ખી વેચવાલી
ફોરેન પોર્ટફોલિયો ઈન્વેસ્ટરો-એફપીઆઈઝ, એફઆઈઆઈઝની આજે-બુધવારે કેશમાં રૂ.૪૨૩૬.૬૦ કરોડના શેરોની જંગી ચોખ્ખી વેચવાલી થઈ હતી. કુલ રૂ.૯૦૭૫.૬૧ કરોડની ખરીદી સામે કુલ રૂ.૧૩,૩૧૨.૨૧ કરોડની વેચવાલી થઈ હતી. જ્યારે ડીઆઈઆઈ-સ્થાનિક સંસ્થાકીય રોકાણકારોની રૂ.૩૫૬૯.૩૬ કરોડના શેરોની ચોખ્ખી ખરીદી થઈ હતી. કુલ રૂ.૯૬૩૮.૫૫ કરોડની ખરીદી સામે કુલ રૂ.૬૦૬૯.૧૯ કરોડની વેચવાલી થઈ હતી.
રોકાણકારોની સંપતિ રૂ.૨.૦૮ લાખ કરોડ ઘટી
સેન્સેક્સ, નિફટીમાં કડાકા સાથે ઘણાં સ્મોલ, મિડ કેપ, રોકડાના શેરોમાં અવિરત ગાબડાં પડતાં રોકાણકારોની સંપતિ એટલે કે બીએસઈમાં લિસ્ટેડ કંપનીઓનું એક્ત્રિત માર્કેટ કેપિટલાઈઝેશન આજે એક દિવસમાં રૂ.૨.૦૮ લાખ કરોડ ધોવાઈ જઈને રૂ.૩૦૯.૨૨ લાખ કરોડ રહી ગયું હતું.
વૈશ્વિક બજારોમાં રિકવરી : નિક્કી ૨૦૮, હેંગસેંગ ૯૪ પોઈન્ટ વધ્યા
ઈઝારાયેલ-હમાસ યુદ્વમાં સમાધાનની કતારની પહેલ વચ્ચે આજે વૈશ્વિક બજારોમાં રિકવરી જોવાઈ હતી. જાપાનનો નિક્કી ૨૨૫ ઈન્ડેક્સ ૨૦૭.૫૭ પોઈન્ટ વધીને ૩૧૨૬૯.૯૨, હોંગકોંગનો હેંગસેંગ ૯૩.૮૦ પોઈન્ટ વધીને ૧૭૦૮૫.૩૩, ચાઈનાનો સીએસઆઈ ૩૦૦ ઈન્ડેક્સ ૧૭.૩૩ પોઈન્ટ વધીને ૩૫૦૪.૪૬ રહ્યા હતા. યુરોપના બજારોમાં સાંજે ઘટયમમથાળેથી બજારો પોઝિટીવ થઈ ગયા હતા. અલબત અમેરિકી શેર બજારોમાં આલ્ફાબેટ ઈન્ક.ના પરિણામ બાદ નાસ્દાકમાં ફયુચર્સમાં નરમાઈ રહી હતી. જ્યારે ડાઉ જોન્સમાં મજબૂતી જોવાઈ હતી.
