- દિલ્હી ઉપરાંત લખનઉ, ઝાંસી, કાનપુર જેવાં શહેરો પણ ધુમ્મસમાં ઢંકાયાં
- શ્રીનગર, અનંતનાગ, પહેલગામ સહિત અનેક વિસ્તારોમાં પારો ગગડીને માઇનસ પાંચ ડિગ્રી
- ઘણા વિસ્તારોમાં તો 10 પગલાંની આગળનું પણ જોઇ શકાતું ન હતું
દિલ્હી-એનસીઆર, ઉત્તર પ્રદેશ અને હરિયાણા સહિત લગભગ સંપુર્ણ ઊત્તર ભારતમાં ગાઢ ધુમ્મસ છવાયેલું છે. આ ઉપરાંત કાશ્મીરથી લખનઉ સુધીના ક્ષેત્રોમાં ઠંડીનો પારો ગગડી ગયો છે. બુધવારે સવારે દિલ્હીમાં ગાઢ ધુમ્મસ છવાઇ ગયું હતું જેને પગલે 50 મીટરથી પણ ઓછી વિઝિબિલિટી હતી. ઘણા વિસ્તારોમાં તો 10 પગલાંની આગળનું પણ જોઇ શકાતું ન હતું. લખનઉ, ઝાંસી, કાનપુર, પટણા જેવા શહેરોમાં પણ સમાન સ્થિતિ જોવા મળી હતી. ઘેરા ધુમ્મસના કારણે ફ્લાઇટ્સ અને ટ્રેન પર પણ વિપરીત અસર થઇ રહી છે. હિમાલયના ઊંચાણ ધરાવતાં વિસ્તારોમાં બરફછાયું વાતાવરણ છે. જમ્મુ-કાશ્મીરના શ્રીનગર, અનંતનાગ, પહેલગામ સહિત અનેક વિસ્તારોમાં ઠંડીનો પારો માઇનસ પાંચ ડિગ્રી સુધી ગગડી ગયો છે. હવામાન ખાતાના જણાવ્યાનુસાર વર્ષનો અંત વરસાદ સાથે આવશે અને તેને પગલે ઠંડી વધારે કાતિલ બનશે. બુધવારે સવારે ગાઢ ધુમ્મસ હોવાના કારણે અનેક સ્થાન પર અકસ્માતના અહેવાલો છે. બુધવારે ગાઢ ધુમ્મસના કારણે દિલ્હી આવતી 110 ફ્લાઇટ્સ પર અસર થઇ હતી.
એક્સપ્રેસ વે પર ભીષણ અકસ્માત સર્જાયા
દિલ્હી મેરઠ એક્સપ્રેસ વે પર મુરાદાબાદ પાસે સવારે ત્રણ કલાકની આસપાસ શેરડી ભરેલું ટ્રક પલટી ગયાં બાદ 20થી વધારે વાહનો એકબીજા સાથે અથડાયા હતાં. અકસ્માતમાં પાંચથી છ લોકોને સામાન્ય ઈજાઓ થઇ છે. પોલીસ ક્રેનની મદદથી વાહનો હટાવી રહી છે. બીજી તરફ યમુના એક્સપ્રેસ વે પર પણ ભીષણ અકસ્માત સર્જાયો હતો. અંહી 12 વાહનો એકબીજા સાથે અથડાયા હતાં. આ અકસ્માતમાં કોઇ જાનહાનિ થઇ નથી પણ વાહનોને ભારે નુકસાન થયું છે. આગ્રા લખનઉ એક્સપ્રેસ વે પર પણ કેટલાક વાહનો એકબીજા સાથે અથડાયા હોવાના અહેવાલો છે.
