કપડવંજ તાલુકા કોંગ્રેસના અનેક હોદ્દેદારો કાર્યકરો કમલમ્ ખાતે ભાજપમાં જોડાયા

•  ગાંધીનગર કમલમ્ ખાતે કપડવંજ તાલુકા કોંગ્રેસ પૂર્વ પ્રમુખ
• તાલુકા પંચાયત પૂર્વ પ્રમુખ વગેરેએ કેસરિયો ધારણ કર્યો
  
• આગેવાનો ભાજપમાં જોડાતાં રાજકારણ ગરમાયું છે
  

લોકસભાની ચુંટણીના પડઘમ વાગી રહ્યા છે. ઉમેદવારોની સેન્સ પ્રક્રિયા પણ નિરિક્ષકો દ્વારા લેવાઇ રહી છે. ત્યારે પાટનગર ગાંધીનગરના કમલમ ખાતે પ્રદેશ અધ્યક્ષ સી.આર.પાટીલની ઉપસ્થિતિમાં કપડવંજ ધારાસભ્ય રાજેશ ઝાલાના પ્રયત્નોથી કપડવંજ તાલુકાના કોંગ્રેસના હોદ્દેદારો, કાર્યકરો, સરપંચો સહિત અનેક કોંગી આગેવાનો ભાજપમાં જોડાતાં રાજકારણ ગરમાયું છે.

આ અંગે વધુ માહિતી આપતાં એપીએમસીના પૂર્વ ચેરમેન નિલેશ એમ.પટેલે આ અંગે માહિતી આપતા જણાવ્યું હતું કે કપડવંજ તાલુકાના કોંગ્રેસના હોદ્દેદારો, કાર્યકરોમાં એલ.એસ.ઝાલા (તાલુકા પંચાયત પૂર્વ પ્રમુખ), કિશનસિંહ ઝાલા (તાલુકા પંચાયત પ્રમુખના સુપુત્ર તથા કોસમ સરપંચ), મંગુબેન ઝાલા(તાલુકા પંચાયત પૂર્વ પ્રમુખ), જયદીપસિંહ ઝાલા (એપીએમસી, કપડવંજના પૂર્વ વાઈસ ચેરમેન), પ્રભાતસિંહ પરમાર (ઉપપ્રમુખ, કપડવંજ તાલુકા કોંગ્રેસ), ઈન્દ્રસીજતસિંહ ચૌહાણ (મંત્રી ખેડા જિલ્લા કોંગ્રેસ), પી.ટી.ઝાલા (ઉપપ્રમુખ, કપડવંજ તાલુકા કોંગ્રેસ), બળવંતસિંહ ચાવડા (ઉપપ્રમુખ સરપંચ એસો. તથા લાલાતેલીના સરપંચ), ડૉ.તખતસિંહ સોઢા (પ્રદેશ કોંગ્રેસ સમિતિ સભ્ય), અલ્પેશસિંહ બિહોલા (કપડવંજ તાલુકા યુવા મોરચા), ઘનશ્યામસિંહ ઝાલા (સોશિયલ મીડીયા ઈન્ચાર્જ) સહિત દશેક જેટલા સરપંચો ભાજપમાં જોડાયા હતા. કપડવંજ ધારાસભ્ય રાજેશ ઝાલા, જિલ્લા મંત્રી ધુળસિંહ સોલંકી, ભાજપ અગ્રણી નિલેશ પટેલ સહિત ભાજપ સંગઠને કેસરીયો ખેસ પહેરાવી આવકાર્ય હતા.