અમદાવાદની 131 સરકારી પ્રાથમિક શાળામાં 751 ઓરડાની ઘટ

• શાળાઓમાં વિદ્યાર્થીઓને બેસવા પૂરતા ઓરડા ન હોવાનો ઘટસ્ફોટ
• શહેરની 87 શાળામાં 619, જિલ્લાની 44 શાળામાં 132 ઓરડા ખૂટે છે
  
• અમદાવાદ જિલ્લાની સ્કૂલોમાં વર્ગ વધારાની 12 દરખાસ્ત મંજૂર
  

સરકારી પ્રાથમિક શાળાઓમાં વિદ્યાર્થીઓને બેસવા પૂરતા ઓરડા ન હોવાનો વિધાનસભાની પ્રશ્નોત્તરીમાં ઘટસ્ફોટ થયો છે. એક ધારાસભ્ય દ્વારા પૂછાયેલ લેખીત સવાલમાં સામે આવેલી વિગત મુજબ અમદાવાદ શહેર અને જિલ્લાની કુલ 131 સરકારી પ્રાથમિક શાળામાં 751 ઓરડાની ઘટ છે. જેમા અમદાવાદ શહેરની 87 શાળામાં 619 અને જિલ્લાની 44 શાળામાં 132 ઓરડાની ઘટ છે.

રાજ્યના શિક્ષણ વિભાગ દ્વારા ચાલુ વર્ષે શાળાઓમાં નવા ઓરડા બનાવવાની જાહેરાત કરવામાં આવી છે. પરંતુ ઓરડાની ઘટના કારણે વિદ્યાર્થીઓએ ભારે મુશ્કેલીનો સામનો કરવો પડે છે. માત્ર અમદાવાદ જિલ્લામા જ 131 સરકારી પ્રાથમિક શાળામાં 751 ઓરડાની ઘટ હોવાનું સામે આવ્યું છે. જેમાં અમદાવાદ શહેરના સૈજપુર, કોતરપુર, સાબરમતી, રાણીપ, અમરાઈવાડી, ઓઢવ, ખોખરા, અસારવા, બેહરામપુરા, બાપુનગર, દાણીલીમડા, નારણપુરા, સરદારનગર, કાલુપુર, કુબેરનગર, દાણીલીમડા, વાડજ, વટવા, દૂધેશ્વર, સરસપુર સહિતના વિવિધ વિસ્તારની 87 જેટલી સરકારી પ્રાથમિક શાળામાં 619 ઓરડાની ઘટ હોવાનું સામે આવ્યું છે. આ સિવાય અમદાવાદ જિલ્લાની વાત કરવામાં આવે તો, બાવળાની 1 સ્કૂલ, દસ્ક્રોઈની 7, દેત્રોજની 5, ધંધુકાની 1, ધોલેરાની 1, ધોળકાની 8, માંડલની 1, સાણંદની 6, વિરમગામની 14 સરકારી પ્રાથમિક શાળા મળી જિલ્લાની કુલ 44 શાળાઓમાં 132 ઓરડાની ઘટ છે.

બે સરકારી હાઈસ્કૂલમાં 21 ઓરડાની ઘટ

શહેરની બે સરકારી હાઈસ્કૂલમાં જ 21 ઓરડાની ઘટ હોવાનું સામે આવ્યું છે. જેમાં જુહાપુરા વિસ્તારમાં આવેલી સરકારી માધ્યમિક અને ઉચ્ચત્તર માધ્યમિક શાળામાં 12 ઓરડાની ઘટ છે જ્યારે બાવળા તાલુકાના દેવધોલેરા ખાતે આવેલી RMSA અને ઉચ્ચતર માધ્યમિક શાળામાં 9 ઓરડાની ઘટ હોવાનું સરકાર દ્વારા સ્વીકારવામાં આવ્યું છે.

અમદાવાદ જિલ્લાની સ્કૂલોમાં વર્ગ વધારાની 12 દરખાસ્ત મંજૂર

અમદાવાદ : અમદાવાદ જિલ્લામાં બિનસરકારી ગ્રાન્ટ ઈન એઈડ ઉચ્ચતર માધ્યમિક શાળાઓમાં વર્ગ વધારાની 31મી ડિસેમ્બર 2023ની સ્થિતિએ વર્ષ 2022-23માં વર્ગ વધારાની 17 દરખાસ્તો મળી હતી, તે પૈકી 12 દરખાસ્તો મંજૂર કરવામાં આવી છે. વિધાનસભામાં એક લેખિત સવાલના જવાબમાં રાજ્યના શિક્ષણ મંત્રીએ આ માહિતી આપી હતી.