ફેન્સ માટે સારા સમાચાર, ભારતના વિસ્ફોટક બેટ્સમેન શ્રેયસ અય્યરને ટીમમાં મળ્યું સ્થાન

• શ્રેયસ અય્યર રણજી ટ્રોફીમાં મુંબઈ તરફથી રમશે
  
• અફઘાનિસ્તાન સામેની સિરીઝમાં ટીમમાં સ્થાન ન મળ્યું
  
• અય્યર ઓસ્ટ્રેલિયા સામેની સિરીઝમાં હતો વાઈસ કેપ્ટન
  

ભારતના વિસ્ફોટક બેટ્સમેન શ્રેયસ અય્યર લાંબા સમયથી ટીમની સાથે છે. ઐયરે ICC વર્લ્ડ કપ 2023માં એક સદી ફટકારી હતી. આ પછી અય્યરને સાઉથ આફ્રિકા સામે સફેદ બોલની ક્રિકેટ સિરીઝ માટે પણ ટીમમાં જગ્યા મળી. આટલું જ નહીં, અય્યરને સાઉથ આફ્રિકા સામેની ટેસ્ટ સિરીઝ માટે પણ ટીમમાં સામેલ કરવામાં આવ્યો હતો, જોકે તે પોતાના પ્રદર્શનથી ટીમને પ્રભાવિત કરી શક્યો નહોતો. હવે ભારતે અફઘાનિસ્તાન સામે 3 મેચની T20 સિરીઝ રમવાની છે. આ સિરીઝ 11 જાન્યુઆરીથી શરૂ થવા જઈ રહી છે. અય્યરને આ સિરીઝમાં સ્થાન મળ્યું નથી. લાંબા સમયથી ટીમ સાથે હોવા છતાં અય્યરને ટીમમાંથી બહાર કરી દેવામાં આવ્યો છે.

અય્યર 12 જાન્યુઆરીથી ટીમ સાથે જોડાશે

અફઘાનિસ્તાન સામેની સિરીઝમાંથી બહાર થયા પછી પણ અય્યરે પોતાને આરામ આપ્યો ન હતો અને રણજી ટ્રોફી રમવાનું નક્કી કર્યું હતું. મુંબઈની ટીમે રણજી ટ્રોફી માટે અય્યરને પોતાની ટીમમાં સામેલ કર્યો છે. આવી સ્થિતિમાં, બેટ્સમેન 12 જાન્યુઆરીથી 15 જાન્યુઆરી વચ્ચે રણજી ટ્રોફીમાં આંધ્રપ્રદેશ સામે રમતા જોવા મળશે. અય્યરે પોતાને આરામ ન આપવાનો નિર્ણય લીધો છે. અય્યર સારી રીતે જાણે છે કે અફઘાનિસ્તાન બાદ ભારતે ઈંગ્લેન્ડ સામે 5 ટેસ્ટ મેચોની સિરીઝ રમવાની છે. આવી સ્થિતિમાં જો અય્યર રણજી રમવાનું ચાલુ રાખે છે તો તેને ફરીથી ટીમમાં જગ્યા મળી શકે છે.

ટીમ સિલેક્ટર્સના નિર્ણયથી આશ્ચર્યચકિત

અફઘાનિસ્તાન સામેની T20 સિરીઝમાં શ્રેયસ અય્યરને સામેલ ન કરવો એ ટીમ સિલેક્ટરનો આશ્ચર્યજનક નિર્ણય છે. ઘણા પૂર્વ ક્રિકેટરો પણ આ અંગે ટીકા કરી રહ્યા છે. આકાશ ચોપરાએ પણ અય્યરને ટીમમાં સામેલ ન કરવા પર સવાલ ઉઠાવ્યા છે. તેણે કહ્યું કે ઓસ્ટ્રેલિયા સામેની 5 મેચની T20 સીરીઝ માટે ઐયરને પહેલા ટીમમાં સામેલ કરવામાં આવ્યો હતો. એટલું જ નહીં પરંતુ તેને વાઈસ કેપ્ટન પણ બનાવવામાં આવ્યો હતો. આ પછી અય્યરને સાઉથ આફ્રિકા સામેની ટીમમાં પણ જગ્યા આપવામાં આવી હતી અને હવે અય્યરને સીધો જ ટીમમાંથી બહાર કરી દેવામાં આવ્યો છે. આ આશ્ચર્યજનક છે.