આઇસીસી ચેમ્પિયન્સ ટ્રોફી 2025 શરૂ થવામાં હવે ગણતરીના કલાકો બાકી રહી ગયા છે. આઇસીસી ઇવેન્ટ હાઇબ્રિડ મોડેલ હેઠળ પાકિસ્તાન અને દુબઇમાં રમાશે.
સુરક્ષાના કારણોસર ભારતીય ટીમ પોતાની તમામ મેચો દુબઇમાં રમશે. ભારત જો ફાઇનલ માટે ક્વોલિફાય થાય અને પાકિસ્તાન પણ તેની સામે હશે તો પણ ટાઇટલ મુકાબલા લાહોર કે રાવલપિંડીમાં નહીં પરંતુ દુબઇમાં જ રમાશે. 50 ઓવર્સની વ્હાઇટબોલ ફોર્મેટમાં આઠ ટીમ ભારત, પાકિસ્તાન, ઇંગ્લેન્ડ, ઓસ્ટ્રેલિયા, સાઉથ આફ્રિકા, ન્યૂઝીલેન્ડ, બાંગ્લાદેશ અને અફઘાનિસ્તાન રમશે. આઈસીસી વન-ડે રેન્કિંગમાં કટઆઉટ ટાઇમ વખતે જે ટોપની આઠ ટીમો હતી તેમને ચેમ્પિયન્સ ટ્રોફીમાં ભાગ લેવાની તક મળી છે. વેસ્ટ ઇન્ડિઝ અને શ્રીલંકા ક્વોલિફાય થઇ નથી. ગ્રૂપ-એમાં ભારત, ન્યૂઝીલેન્ડ, પાકિસ્તાન અને બાંગ્લાદેશ છે.
ભારતે 29માંથી 18 મેચ જીતી છે
આઇસીસી ચેમ્પિયન્સ ટ્રોફીમાં ભારતીય ટીમ ઓવરઓલ ચાર વખત ફાઇનલમાં પહોંચી છે અને બે વખત ટાઇટલ જીત્યું હતું. ભારતીય ટીમ અન્ય ટીમો કરતાં વધારે બેલેન્સવાળી જણાય છે અને તે ત્રીજી વખત ટાઇટલ જીતવાના ઇરાદા સાથે મેદાનમાં ઊતરશે. 23મી ફેબ્રુઆરીએ દુબઇમાં ભારત અને પાકિસ્તાનનો હાઇવોલ્ટેજ મુકાબલો રમાશે. સિનિયર બોલર જસપ્રીત બુમરાહ ઇજાના કારણે આ ઇવેન્ટમાં રમી શકે તેમ નથી. તેની ગેરહાજરીમાં મોહમ્મદ શમી નવા બોલનું આક્રમણ સંભાળશે. ભારતે છેલ્લે 2013માં ધોનીના નેતૃત્વમાં ટાઇટલ જીત્યું હતું અને વરસાદના કારણે 2002માં શ્રીલંકા સાથે સંયુક્ત વિજેતા બન્યું હતું.
ભારતનું મજબૂત પાસું
બેટિંગ અને સ્પિન બોલિંગના આધારે ભારતીય ટીમ સાઉથ આફ્રિકા અને પાકિસ્તાનની સાથે ટ્રોફી જીતવા માટેની દાવેદાર રહેશે. ચેમ્પિયન્સ ટ્રોફી પહેલાં ભારતે પોતાના ઘરઆંગણે ઇંગ્લેન્ડને 3-0થી હરાવીને પોતાની તૈયારીઓનો સંકેત આપી દીધો હતો. સુકાની રોહિતે સદી ફટકારીને ફોર્મમાં પરત ફરવાનો સંકેત આપ્યો હતો. કોહલી પણ પોતાના જૂના ટચ અને આત્મવિશ્વાસમાં જણાતો હતો. યુવા બેટ્સમેન શુભમન ગિલ ફોર્મમાં છે. હાર્દિક પંડયા અને શ્રોયસ ઐયર મિડલ ઓર્ડરને વધારે મજબૂત બનાવી રહ્યા છે. સ્પિન વિભાગમાં રવીન્દ્ર જાડેજા. અક્ષર પટેલ તથા કુલદીપ યાદવની સાથે વરુણ ચક્રવર્તી ઘાતક બનાવી રહ્યા છે.
ભારતનું નબળું પાસું
પેસ બોલર બુમરાહની ગેરહાજરી ભારતને મોટો ફટકો પહોંચાડશે. છેલ્લા કેટલાક સમયથી બુમરાહ ત્રણેય ફોર્મેટમાં ભારતનો સૌથી મોટો મેચવિનર સાબિત થયો છે. શમી ટીમનો સૌથી વધારે અનુભવી બોલર રહેશે. લાંબા સમય બાદ તે ક્રિકેટમાં પાછો ફર્યો હોવાના કારણે તેના ફોર્મ અંગે અનિશ્ચિતતા છવાયેલી રહેશે.
સૌથી મોટું જોખમ : ગયા વર્ષના ટી20 વર્લ્ડ કપને બાદ કરતાં ભારત છેલ્લા કેટલાક વર્ષોમાં આઇસીસી ઇવેન્ટની ફાઇનલમાં વિખેરાઇ જાય છે. ભૂતકાળના આંકડાને ધ્યાનમાં રાખીને ભારતે સાવચેતી રાખવી પડશે.
પાકિસ્તાનનું સકારાત્મક પાસું
યજમાન પાકિસ્તાન પાસે સ્ફોટક બેટ્સમેનો છે અને તેઓ પોતાના દિવસે વધારે ખતરનાક સાબિત થઇ શકે છે. ફખર ઝમાને 2017ની ફાઇનલમાં ભારતને પરેશાન કર્યું હતું. તે બાબર કરતાં વધારે જોખમી બની શકે છે. સુકાની મોહમ્મદ રિઝવાન અને ફિનિશર સલમાન અલી આગા શાનદાર ફોર્મમાં છે. પાકિસ્તાનને પોતાના ઘરઆંગણે રમવાનો ફાયદો થશે. યજમાન ટીમ પાસે ઘાતક પેસ બોલિંગ આક્રમણ છે પરંતુ કરાચી અને રાવલપિંડીની પિચો ઉપરથી મદદ મળવી પણ જરૂરી છે. પેસ બોલિંગની ત્રિપુટી શાહિન શાહ આફ્રિદી, નસીમ શાહ તથા હેરિસ રઉફ ઉપર ટીમની સફળતાનો મદાર રહેશે.
પાકિસ્તાનનો નેગેટિવ પોઇન્ટ
સેમ અયૂબની અકાળે થયેલી ઇજાએ પાકિસ્તાનની ઓપનિંગને નબળી પાડી દીધી છે. બાબર આઝમના ફોર્મ અંગે પાકિસ્તાન ટીમ મેનેજમેન્ટ ચિંતિત છે. કામરાન ગુલામ, ખુશદીલ શાહ તથા તૈયબ તાહિરે તેમને મળતી તકનો ફાયદો ઉઠાવવો પડશે. ખુશદીલ અને ફહીમ અશરફ પાકિસ્તાન ટીમની સૌથી નબળી કડી છે.
સૌથી મોટું જોખમ : અબરાર એહમદના સ્વરૂપે ટીમમાં એકમાત્ર નિષ્ણાત સ્પિનર છે જે જોખમી બની શકે છે. ઓલરાઉન્ડર ફહીમ અશરફની બેટિંગ સરેરાશ કે બોલિંગનો ઇકોનોમી રેટ આત્મવિશ્વાસ વધારતો નથી.
ન્યૂઝીલેન્ડનું સકારાત્મક પાસું
ન્યૂઝીલેન્ડની ટીમ પાસે ડેવોન કોનવે તથા ટોમ લાથામના સ્વરૂપે બે વિશ્વાસપાત્ર બેટ્સમેનો છે. કેન વિલિયમ્સન પણ આધારસ્તંભ બની શકે છે. મધ્યમ ક્રમમાં ડેરિલ મિચેલ અને ગ્લેન ફિલિપ્સ મેચ વિનર સાબિત થઇ શકે છે. ત્રિકોણીય શ્રોણીની ફાઇનલમાં તેમણે પાકિસ્તાનને પરાજય આપ્યો હતો. ન્યૂઝીલેન્ડ ટોચની ચાર પ્રબળ દાવેદાર ટીમોમાંની એક છે. તેની પાસે મિચેલ સાન્તેનરના સ્વરૂપે કુશળ સુકાની છે. ઘણા બધા ખેલાડીઓને વિશ્વની અલગ અલગ લીગમાં રમવાનો અનુભવ છે જે તેમને 50 ઓવરની ફોર્મેટમાં ઉપયોગી સાબિત થશે. ઉપખંડની પિચથી તેઓ માહિતગાર પણ છે. બેટિંગ સૌથી મજબૂત પાસું છે.
કિવિ ટીમની નેગેટિવ સાઇડ
લાંબા સમય બાદ ન્યૂઝીલેન્ડની ટીમ બે સિનિયર બોલર ટિમ સાઉથી અને ટ્રેન્ટ બાઉલ્ટ વિના કોઇ આઇસીસી ઇવેન્ટમાં રમતા જોવા મળશે. ઉપખંડ અને દુબઇની પિચો ઉપર બોલિંગ કરવાની કુશળતા અન્ય દેશો કરતાં અલગ સાબિત થશે. વિલિયમ્સન સ્ટ્રાઇક રોટેટ કરી શકે છે પરંતુ તે સ્ટ્રાઇકિંગ રેટ વન-ડેમાં સામાન્ય રહેતો હોય છે.
સૌથી મોટું જોખમ : મિડલ ઓવર્સમાં ન્યૂઝીલેન્ડ હરીફ સ્પિનર્સને કેવું રમે છે તે રસપ્રદ બનશે. ભારતમાં ટેસ્ટ મેચો દરમિયાન વિલ યંગ સ્પિનર્સને ઘણું સારું રમ્યો હતો. એશિયન સ્પિનર્સને રમવા માટે કુશળતાની જરૂર રહેશે.
