T20 વર્લ્ડ કપ 2026નું કાઉન્ટડાઉન શરૂ થઈ ગયું છે. 7 ફેબ્રુઆરી, 2026થી શરૂ થનારા આ ટુર્નામેન્ટ માટે ભારતીય ટીમની પસંદગી આજે થવાની છે. પસંદગી સમિતિ 4 બેટ્સમેન, 2 વિકેટકીપર, 4 ઓલરાઉન્ડર અને 5 બોલરની સાથે ટીમ ઉતારશે એવું માનવામાં આવે છે. પરંતુ ટીમ જાહેર થવા પહેલાં કેટલાક એવા પ્રશ્નો છે, જેનો જવાબ આજે મળી શકે છે.
ખરાબ ફોર્મ છતાં સૂર્યકુમાર યાદવ પર પસંદગીકારો વિશ્વાસ કરશે?
સૂર્યકુમાર યાદવ છેલ્લા એક વર્ષથી પોતાના શ્રેષ્ઠ ફોર્મમાં નથી. છતાં તે ભારતીય T20 ટીમનો કેપ્ટન છે અને સતત ટીમનો ભાગ રહ્યો છે. 35 વર્ષની ઉંમરે આ વર્લ્ડ કપ તેને કેપ્ટન તરીકે છેલ્લી મોટી તક માનવામાં આવે છે. હવે જોવાનું એ રહેશે કે પસંદગીકારો ફોર્મ કરતાં અનુભવ અને નેતૃત્વને મહત્વ આપે છે કે નહીં.
શું શુભમન ગિલ ટીમમાં ફિટ બેસે છે?
શુભમન ગિલની T20 રમવાની શૈલીને લઈને સતત ચર્ચા થાય છે. તે ઇનિંગ્સની શરૂઆતમાં સમય લે છે, જે ઝડપી રન રેટ માંગતા T20 ફોર્મેટમાં પડકારરૂપ બની શકે છે. તેની છેલ્લી 18 T20 ઇનિંગ્સમાં માત્ર 377 રન (સરેરાશ 25.13) બનાવ્યા છે. ગિલની હાજરી સંજુ સેમસનની ઓપનિંગ પોઝિશન અને સમગ્ર ટીમ કોમ્બિનેશનને અસર કરી શકે છે.
યશસ્વી જયસ્વાલ ફરી એકવાર બહાર રહેશે?
યશસ્વી જયસ્વાલને T20 માટે એક આક્રમક અને મેચ-વિનર બેટ્સમેન તરીકે જોવામાં આવે છે. પરંતુ ગિલને ઉપ-કપ્તાન બનાવવાની ચર્ચા અને ઓપનિંગ માટેની સ્પર્ધા તેના માર્ગમાં અવરોધ બની શકે છે. શક્યતા છે કે જયસ્વાલને મુખ્ય ટીમ બદલે સ્ટેન્ડબાય તરીકે રાખવામાં આવે.
સંજુ સેમસનને મળશે ખરેખર તક?
સંજુ સેમસન હાલમાં રિઝર્વ ઓપનર અને વિકેટકીપરની ભૂમિકામાં છે. જીતેશ શર્મા વિકેટકીપર તરીકે અને ગિલ ઓપનર તરીકે પસંદ થતા સંજુ માટે ટીમમાં સ્થાન બનાવવું મુશ્કેલ બની શકે છે. વર્લ્ડ કપ નજીક હોવાથી પસંદગી સમિતિ મોટા ફેરફારો કરવા ઇચ્છશે નહીં, જે સંજુ માટે પડકારરૂપ છે.
રિંકુ સિંહ સામે વોશિંગ્ટન સુંદર – કોને મળશે પ્રાધાન્ય?
રિંકુ સિંહ મિડલ ઓર્ડરના વિશ્વસનીય ફિનિશર તરીકે ઓળખાય છે. બીજી તરફ, ટીમ મેનેજમેન્ટ અને કોચ ગૌતમ ગંભીરે ઓલરાઉન્ડરો પર વધુ ભાર મૂક્યો છે, જેના કારણે વોશિંગ્ટન સુંદરને ફાયદો મળી શકે છે. સુંદરનો T20 રેકોર્ડ સામાન્ય છે, છતાં તેને સતત તકો આપવામાં આવી રહી છે.
ભારતની સંભવિત T20 વર્લ્ડ કપ ટીમ (2026)
સૂર્યકુમાર યાદવ (કેપ્ટન), શુભમન ગિલ (વાઈસ-કેપ્ટન), અભિષેક શર્મા, તિલક વર્મા, હાર્દિક પંડ્યા, શિવમ દુબે, જીતેશ શર્મા (વિકેટકીપર), અક્ષર પટેલ, જસપ્રિત બુમરાહ, અર્શદીપ સિંહ, વરુણ ચક્રવર્તી, કુલદીપ યાદવ, હર્ષિત રાણા, વોશિંગ્ટન સુંદર, સંભવિત સ્ટેન્ડબાય ખેલાડીઓ, યશસ્વી જયસ્વાલ, રિંકુ સિંહ, રિયાન પરાગ, શાહબાઝ અહેમદ / નીતિશ કુમાર રેડ્ડી, પ્રસિદ્ધ કૃષ્ણ.
આ પણ વાંચો : Hardik Pandyaનો ફિફ્ટી બાદ પ્રેમભર્યો અંદાજ, માહિકા શર્માને આપી ફ્લાઈંગ કિસ
