- રામમંદિર પ્રાણપ્રતિષ્ઠાને હવે માત્ર 2 દિવસ બાકી
- ‘રામમંદિર સનાતન ધર્મની શાશ્વત પ્રકૃતિનું પ્રતીક’
- ‘લાંબા સમય બાદ અયોધ્યામાં બનશે રામનું મંદિર’
અયોધ્યામાં રામમંદિરની પ્રાણપ્રતિષ્ઠા કાર્યક્રમને હવે માત્ર બે જ દિવસ વાર છે ત્યારે દેશભરમાં તમામ મોટી હસ્તીઓને કાર્યક્રમ માટે આમંત્રણ મોકલી દેવામાં આવ્યું છે. અમેરિકામાં પણ રામમંદિર મહોત્સવને લઈને લોકોમાં ખાસ્સો ઉત્સાહ જોવા મળી રહ્યો છે. અમેરિકામાં આવેલ હિન્દુ મંદિરોમાં આગામી સપ્તાહ સુધી જુદા જુદા કાર્યક્રમોનું આયોજન કરવામાં આવશે જેમાં લાખોની સંખ્યામાં ભારતીય મૂળના અમેરિકન નાગરિકો સામેલ થવાની શક્યતા છે.
‘રામમંદિર સનાતન ધર્મની શાશ્વત પ્રકૃતિનું પ્રતીક’
અમેરિકાની હિંદુ યુનિવર્સિટીના પ્રમુખ કલ્યાણ વિશ્વનાથને સોશિયલ મીડિયા પોસ્ટમાં લખ્યું છે કે અયોધ્યા ઉપેક્ષા અને વિનાશમાંથી ફરી ઉભરી રહી છે. રામમંદિર સનાતન ધર્મની શાશ્વત પ્રકૃતિનું પ્રતિક છે. રામલલ્લા 550 વર્ષ બાદ મંદિરમાં બિરાજમાન થશે. ઉલ્લેખનીય છે કે, 22 જાન્યુઆરીએ અયોધ્યામાં રામ મંદિરની પ્રાણપ્રતિષ્ઠા સમારોહનું આયોજન કરવામાં આવ્યું છે.
લાંબા સમય બાદ અયોધ્યામાં બનશે રામનું મંદિર: કપિલ
ટેક્સાસમાં શ્રી સીતા રામ ફાઉન્ડેશનના કપિલ શર્માએ કહ્યું કે વર્ષોના વર્ષો રાહ જોયા બાદ અયોધ્યામાં ભગવાન શ્રી રામનું મંદિર બનાવવામાં આવ્યું છે. વિશ્વભરના હિંદુઓ માટે વિશ્વાસ અને ઉજવણીનો આ મહત્વપૂર્ણ દિવસ છે. હ્યુસ્ટનના મંદિરોમાં રામમંદિર પ્રાણ પ્રતિષ્ઠા સમારોહને લઈને ભારે ઉત્સાહ જોવા મળી રહ્યો છે. કાર્યક્રમના દિવસે મંદિરોમાં સુંદરકાંડનું આયોજન કરવામાં આવશે. ગીત સંગીતના સાંસ્કૃતિક કાર્યક્રમો યોજાશે. હવન અને ભગવાન રામનો પટ્ટાભિષેક કરવામાં આવશે. તેમજ ભગવાન રામની શોભાયાત્રા કાઢવામાં આવશે અને પ્રસાદનું પણ વિતરણ કરવામાં આવશે. તેમણે કહ્યું કે અયોધ્યા ધામથી પ્રસાદ અને રજનું વિતરણ કરવું એ પણ અમારા માટે સન્માનની વાત છે.
અમેરિકન મંદિરોમાં પ્રાણપ્રતિષ્ઠાને લઈને ઉત્સાહ: મિત્તલ
મેરીલેન્ડના ગવર્નર વેસ મૂર શનિવારે વોશિંગ્ટન ડીસીના એક ઉપનગરમાં રામ મંદિર પ્રાણપ્રતિષ્ઠાના કાર્યક્રમમાં હાજરી આપવાના છે. અમેરિકામાં રાષ્ટ્રવ્યાપી ઉજવણીનું નેતૃત્વ કરતી સંસ્થા વિશ્વ હિન્દુ પરિષદ ઓફ અમેરિકાના અમિતાભ મિત્તલે જણાવ્યું હતું કે ભગવાન શ્રી રામના લાખો અનુયાયીઓનું લાંબા સમયથી રાહ જોવાતું સ્વપ્ન સાકાર થવાનું છે. USAમાં લગભગ 1000 મંદિરો છે અને તેમાંથી લગભગ તમામ આ સપ્તાહના અંતમાં શરૂ થતા આ ઐતિહાસિક પ્રસંગની ઉજવણી કરી રહ્યા છે.
