- અવકાશમાં 55 દિવસથી ફસાયેલા સુનિતા વિલિયમ્સ અને બુચ વિલ્મોર ટૂંકમાં આવે તેવી શક્યતા
- અમેરિકાની અવકાશ સંસ્થા નાસાએ બંનેના ધરતી પર આવવા અંગે આપ્યા સમાચાર
- નાસા ટૂંક સમયમાં તારીખની જાહેરાત કરે તેવી શક્યતા
ભારતીય મૂળના અવકાશયાત્રી સુનિતા વિલિયમ્સને લઈ અમેરિકી સ્પેસ એજન્સીએ એક મોટા ગુડ ન્યૂઝ આપ્યા છે. આશરે 55 દિવસથી અવકાશમાં ફસાયેલી સુનિતા વિલિયમ્સ અને તેના સાથી બુચ વિલ્મોરનું ધરતી પર આવવાનું હવે થોડાક ડગલાં દૂર છે.
નાસા તરફથી મળેલી નવીન માહિતી પછી સુનિતા વિલિયમ્સ અને બુચ વિલ્મોર ધરતી પર કુશળતાથી પરત ફરવાની આશા વધી ગઈ છે. એવું મનાઈ રહ્યું છે કે હવે માત્ર કેટલાક દિવસોમાં નાસા બંનેને પરત લાવવાના મિશનની તારીખ નક્કી કરી શકે છેય. જો કે ઈન્ટરનેશનલ સ્પેસ સ્ટેશનમાં સુનિતા વિલિયમ્સ સહિત ઘણા અવકાશયાત્રીઓ હાલ મોજુદ છે. તાજેતરમાં નાસાએ પેરિસ ઓલિમ્પિકને લઈ એક વીડિયો સંદેશ પણ જાહેર કર્યો હતો. જેમાં તમામ અવકાશયાત્રીઓ ઓલિમ્પિક મશાલની ઈલેકટ્રોનિક વર્ઝનને લઈ દેખાતી નજરે પડી હતી.
પાંચ જૂને સુનિતા વિલિમ્યસ અને બુચ વિલ્મોર સ્ટારલાઈનર એરક્રાફટથી ઈન્ટરનેશનલ સ્પેસ સ્ટેશન ગયા હતા. બંને આઠ દિવસથી પોતાના મિશનને પૂર્ણ કરવા 13 જૂને ધરતી પર આવવાનું હતું. પરંતુ સ્ટારલાઈનર વિમાનમાં આવેલી ટેક્નિકલ ક્ષતિને લીધે બંનેનું પરત આવવું મુશ્કેલ થયું. આખરે મજબૂર થઈ નાસાએ બંનેના પરત આવવાના મિશનને ટાળવો પડયો હતો.
નાસાએ બંને અવકાશયાત્રીને લઈ આપ્યા ગુડ ન્યૂઝ
નાસાએ 27 જુલાઈએ સ્ટારલાઈનર એરક્રાફટના ડોક્ટ હોટ ફાયરનું ટેસ્ટ કર્યું. ત્યારબાદ પરિણામ અંગે જાણકારી આપતા નાસાએ જણાવ્યું કે ટેસ્ટ કરેલા તમામ થ્રસ્ટર્સ અને ચેમ્બર દબાણના આધારે શરૂઆતના સ્તરે પરત આવી ગયા છે. આ ઉપરાંત એન્જિનિયરની ટીમ સ્ટારલાઈનર એરક્રાફટમાં હીલિયમ ગૅસના પુરવઠાનું ગળતરની પણ તપાસ કરશે. આ દરમિયાન બંને અવકાશયાત્રીના પરત ફરવા અંગે જરૂરી માર્જિનની પુષ્ટિ પણ કરી. માત્ર આઠ દિવસનું મિશન..મહિનાઓ સુધી પ્રતીક્ષા
ભારતીય મૂળના સુનિતા વિલિયમ્સને વર્ષ-1998માં નાસાના એસ્ટ્રોનોટ તરીકે પસંદ કરવામાં આવ્યા હતા. વર્ષ-1965માં અમેરિકામાં જન્મેલી સુનિતા વિલિયમ્સના પિતા દીપક પંડયા ભારતીય હતા જે વર્ષ-1958માં ગુજરાતના અમદાવાદથી અમેરિકા જઈને વસ્યા હતા. આ કોઈ પ્રથમ અવસર નહોતો કે, જ્યારે સુનિતા વિલિયમ્સ મિશન પર ગઈ હોય. તે અગાઉ બે વાર અવકાશની યાત્રા કરી ચુકી છે. સુનિતા આની પહેલા વર્ષ-2006 અને 2012માં અવકાશમાં જઈ ચુકી છે.
જો કે, આ વખતે તેનું મિશન માત્ર આઠ દિવસનું હતું પરંતુ હવે આને આશરે 55 દિવસ થઈ ગયા છે. હવે જોવું એ રહ્યું કે સુનિતા વિલિયમ્સ અને બુચ વિલ્મોરની ઘરવાપસી માટે હજી કેટલા દિવસની પ્રતીક્ષા કરવી પડશે ?
