મુખ્ય સુત્રધાર સહિત ત્રણ હજી પોલીસ પકડથી દૂર
અગ્ર ગુજરાત, ગોંડલ
સૌરાષ્ટ્રમાં સોલાર પેનલ લગાડવાના બહાને નિર્દોષ નાગરિકોને નિશાન બનાવતી એક મોટી ગેંગનો પર્દાફાશ થયો છે. ગોંડલના જેતપુર રોડ પર રહેતા એક નાગરિક સાથે રૂ. 1.66 લાખની છેતરપિંડી આચરનાર ‘ઇન્ટીફાય સોલાર પ્રાઇવેટ લિમિટેડ’ કંપનીના પાંચ આરોપીઓનો પોલીસે જેલમાંથી કબજો મેળવી રિમાન્ડ પર લેવામાં આવ્યા છે.
ફરિયાદી હસમુખભાઈ નારણભાઈ કોટડીયાએ સોશિયલ મીડિયા પ્લેટફોર્મ ફેસબુક પર ‘ઇન્ટીફાય સોલાર’ (INTIFY SOLAR PVT. LTD.) ની આકર્ષક જાહેરાત જોઈ હતી. જેમાં સસ્તા દરે અને સારી ગુણવત્તાની સોલાર પેનલ આપવાનો વાયદો કરવામાં આવ્યો હતો.
જાહેરાતના આધારે સંપર્ક કરતા, મુસ્કાન પટેલ નામની મહિલા અને તેના સાગરીતોએ હસમુખભાઈને વિશ્વાસમાં લીધા હતા. 3.5 કિલો વોટની સોલાર પેનલ માટે કુલ રૂ. 1,49,000 ની લોન અને અન્ય રૂ. 17,465 રોકડા મળી કુલ રૂ. 1,66,465 કંપનીના બેંક એકાઉન્ટમાં ટ્રાન્સફર કરાવ્યા હતા.
પૈસા ચૂકવ્યાના મહિનાઓ બાદ પણ સોલાર પેનલ ન લાગતા હસમુખભાઈએ છેતરપિંડીની ફરિયાદ નોંધાવી હતી. તપાસ દરમિયાન બહાર આવ્યું કે આ ગેંગ માત્ર ગોંડલ જ નહીં, પણ ગુજરાતના અન્ય શહેરોમાં પણ સક્રિય છે. આ ટોળકી સામે જામનગર સાયબર પોલીસ, જામનગર સી-ડિવિઝન, પાટણવાવ અને પડધરી પોલીસ સ્ટેશનમાં પણ ગુના નોંધાઈ ચૂક્યા છે. આ સમગ્ર કૌભાંડનો મુખ્ય આરોપી કાનાભાઈ હોવાનું સામે આવ્યું છે, જ્યારે અન્ય આરોપીઓ પગારદાર કર્મચારી તરીકે કામ કરતા હતા.
ગોંડલ બી-ડિવિઝન પોલીસે આ મામલે જામનગર જિલ્લા જેલમાંથી 5 આરોપીઓ (હિરેન લાઠીયા, ચેતન પાણખાણીયા, રાહુલ ભટ્ટ, રામજી લોધી અને અભય પરમાર) ની ટ્રાન્સફર વોરંટથી ધરપકડ કરવામાં આવી છે. પોલીસ દ્વારા આરોપીઓને કોર્ટમાં રજૂ કરતા 3 દિવસના રિમાન્ડ મંજૂર કરવામાં આવ્યા છે. મુસ્કાન પટેલ, ફજલ દોશાણી અને મુખ્ય સૂત્રધાર કાનાભાઈ બૈયડીયાવદરા હજુ પોલીસ પકડથી દૂર છે.
