ક્રિકેટની સર્વોચ્ચ સંસ્થા ઈન્ટરનેશનલ ક્રિકેટ કાઉન્સિલ એટલે કે ICC એ ભૂતપૂર્વ ભારતીય કેપ્ટન મહેન્દ્ર સિંહ ધોનીને ICC હોલ ઓફ ફેમમાં સામેલ કર્યો છે. મહેન્દ્ર સિંહ ધોની ICC હોલ ઓફ ફેમમાં સામેલ થનારો 11મા ભારતીય ક્રિકેટર છે.
મહેન્દ્ર સિંહ ધોની પહેલા બિશન સિંહ બેદી, કપિલ દેવ, સુનીલ ગાવસ્કર, અનિલ કુંબલે, સચિન તેંડુલકર, વિનુ માંકડ, વીરેન્દ્ર સેહવાગ, રાહુલ દ્રવિડ, નીતુ ડેવિડ અને ડાયના એડુલજીને ICC હોલ ઓફ ફેમમાં સામેલ કરવામાં આવ્યા છે.
મહેન્દ્ર સિંહ ધોનીની કેપ્ટનશીપમાં ટીમ ઈન્ડિયાએ ત્રણ ICC ટ્રોફી જીતી હતી. કેપ્ટન તરીકે ધોનીએ 2007નો T20 વર્લ્ડકપ, 2011નો વનડે વર્લ્ડકપ અને 2013ની ચેમ્પિયન્સ ટ્રોફી જીતી હતી. તે દુનિયાનો પહેલો એવો કેપ્ટન છે, જેને ICCની ત્રણ અલગ અલગ ICC ટ્રોફી પોતાને નામ કરી છે. ધોનીની ગણતરી માત્ર ભારતમાં જ નહીં પરંતુ દુનિયાના સૌથી સફળ કેપ્ટનોમાં થાય છે.
2019માં રમી છેલ્લી ઈન્ટરનેશનલ મેચ
મહેન્દ્ર સિંહ ધોનીએ ભારત માટે 350 વનડે રમી, જેમાં 50.57ની એવરેજથી 10773 રન બનાવ્યા. આ દરમિયાન તેને 10 સદી અને 73 અડધી સદી પણ ફટકારી. તેને 90 ટેસ્ટ મેચ પણ રમી, જેમાં તેની એવરેજ 38 થી વધુ હતી. તેને 6 સદી સાથે ટેસ્ટમાં 4876 રન બનાવ્યા. તેને 2019 ના વર્લ્ડકપ સેમિફાઈનલમાં ન્યુઝીલેન્ડ સામે પોતાની છેલ્લી ઈન્ટરનેશનલ મેચ રમી અને પછીના વર્ષે ઓગસ્ટ 2020માં ઈન્ટરનેશનલ ક્રિકેટને અલવિદા કહ્યું.
મહેન્દ્ર સિંહ ધોની સિવાય ઓસ્ટ્રેલિયાના દિગ્ગજ બેટ્સમેન મેથ્યુ હેડન અને દક્ષિણ આફ્રિકાના ભૂતપૂર્વ ક્રિકેટર હાશિમ અમલાને પણ ICC હોલ ઓફ ફેમમાં સ્થાન આપવામાં આવ્યું છે. ICC હોલ ઓફ ફેમ મહાન ક્રિકેટ ખેલાડીઓની સિદ્ધિઓને માન્યતા આપે છે. વર્ષ 2009માં તેની શરૂઆત કરવામાં આવી હતી, ત્યારથી અત્યાર સુધીમાં 122 ખેલાડીઓનો તેમાં સમાવેશ કરવામાં આવ્યો છે.
