- સાઉથ આફ્રિકા સામે ભારતની શાનદાર જીત
- ભારતીય ટીમ પોઈન્ટ ટેબલમાં ટોપ પર
- પોઈન્ટ ટેબલમાં 2 સ્થાન માટે થશે જંગ
ભારતીય ક્રિકેટ ટીમ વર્લ્ડકપમાં સતત 8મી મેચ જીતી છે. આજે વર્લ્ડ કપની 37મી મેચ પોઈન્ટ ટેબલની ટોચની બે ટીમો સામે રમાઈ હતી, તેમાં પણ ભારતે શાનદાર જીત નોંધાવી હતી અને નંબર-1 પર પોતાનું સ્થાન નિશ્ચિત કર્યું હતું. ટીમ ઈન્ડિયાએ આ મેચમાં સાઉથ આફ્રિકાને 243 રનના વિશાળ અંતરથી હરાવ્યું છે. આ જીત સાથે ભારતીય ટીમે બતાવી આપ્યું કે, આ વર્લ્ડકપમાં ટીમ ઈન્ડિયા કેવા ફોર્મમાં છે.
ભારતીય ટીમ પોઈન્ટ ટેબલમાં નંબર વન રહેશે
ભારતીય ક્રિકેટ ટીમ પોઈન્ટ ટેબલમાં નંબર-1 પર યથાવત છે, અને હવે નંબર વન પર જ રહેશે. કારણ કે ટીમ ઈન્ડિયાએ તેની 8 મેચમાંથી તમામ 8 જીતીને 16 પોઈન્ટ મેળવ્યા છે અને તે હજુ એક મેચ રમશે. આવી સ્થિતિમાં અન્ય કોઈ ટીમ આ ટૂર્નામેન્ટમાં 16 પોઈન્ટ સુધી પહોંચી શકશે નહીં. જેથી ટીમ ઈન્ડિયા હવે પોઈન્ટ ટેબલમાં નંબર-1 પર રહીને લીગ સ્ટેજ ખતમ કરશે.
પોઈન્ટ ટેબલમાં ભારત પછી કોણ?
ભારત બાદ સાઉથ આફ્રિકાની ટીમ પોઈન્ટ ટેબલમાં બીજા સ્થાને છે. સાઉથ આફ્રિકાએ અત્યાર સુધી 8 મેચમાંથી 6 મેચ જીતી છે અને 2 મેચ હારી છે. સાઉથ આફ્રિકાની ટીમ 12 પોઈન્ટ સાથે પોઈન્ટ ટેબલમાં નંબર-2 પર છે. તેના પછી ત્રીજા સ્થાને ઓસ્ટ્રેલિયા છે. ઓસ્ટ્રેલિયાએ અત્યાર સુધી રમાયેલી તેમની 7 મેચમાંથી 5 જીતી છે અને બેમાં હારનો સામનો કરવો પડ્યો છે.
ડિફેન્ડિંગ ચેમ્પિયન નંબર 10 પર
પોઈન્ટ ટેબલમાં અત્યારે નંબર-4 પર ન્યૂઝીલેન્ડની ટીમ છે. જે એક સમયે પ્રથમ 4 મેચ જીતીને પોઈન્ટ ટેબલમાં ટોચ પર હતી, પરંતુ તે પછી આ ટીમ સતત 4 મેચ હારી છે અને હવે 8 પોઈન્ટ અને +0.398 નેટ રનરેટ સાથે નંબર 4 પર છે. આ ટીમે તેની છેલ્લી લીગ મેચ ઈંગ્લેન્ડ સામે રમવાની છે. જે બાદ પાકિસ્તાનની ટીમ નંબર-5 પર છે. આ ટીમે પણ 8 મેચમાંથી 4 જીતી છે. જે બાદ અફઘાનિસ્તાનની ટીમ નંબર-6 પર છે. અફઘાનિસ્તાન પાસે 8 પોઈન્ટ છે, પરંતુ તેનો નેટ રનરેટ પાકિસ્તાન કરતા ઓછો છે. જેથી અફઘાનિસ્તાનની ટીમ ટીમ નંબર-6 પર હાજર છે. જો કે અફઘાનિસ્તાને હજુ ઓસ્ટ્રેલિયા અને સાઉથ આફ્રિકા સામે 2 મેચ રમવાની છે. જે બાદ નંબર-7 પર શ્રીલંકા, નંબર-8 પર નેધરલેન્ડ,નંબર-9 પર બાંગ્લાદેશ અને નંબર-10 પર ડિફેન્ડિંગ ચેમ્પિયન ઇંગ્લેન્ડ છે. અત્યાર સુધી બાંગ્લાદેશ અને ઈંગ્લેન્ડ આ ટૂર્નામેન્ટમાંથી સત્તાવાર રીતે બહાર થઈ છે.
