ઇન્તજારની ઘડીઓ પૂરી થઈ છે. લાંબા સમયથી જેની રાહ જોવાઈ રહી હતી, તે એલન મસ્કની સેટેલાઇટ ઇન્ટરનેટ સર્વિસ Starlink આખરે ભારતમાં આવી પહોંચી છે. કંપનીએ પોતાની વેબસાઇટ પર ભારતીય પ્લાન્સની જાહેરાત કરી દીધી છે, જે ટેક જગતમાં ચર્ચાનો વિષય બન્યો છે. જોકે તેના પ્લાન્સની કિંમત જાણીને તમારા હોશ ચોક્કસથી ઉડી જશે.
શું ઈન્ટરનેટ પ્લાનની કિંમત?
જે ગ્રાહકો આશા રાખીને બેઠા હતા કે, Starlink ભારતમાં સસ્તો ઇન્ટરનેટ આપશે, તેમને કદાચ નિરાશા મળી શકે છે. Starlink Indiaની વેબસાઇટ પર ઉપલબ્ધ માહિતી મુજબ, ભારતમાં આ સેવા મેળવવાનો ખર્ચ ઊંચો છે. Starlink India નો માસિક પ્લાન રૂપિયા 8,600 થી શરૂ થાય છે. હાર્ડવેર કિટ માટે યુઝર્સે રૂપિયા 34,000 અલગથી ચૂકવવા પડશે. આ કિટમાં એન્ટેના, વાયર, અને વાઇફાઇ રાઉટરનો સમાવેશ થાય છે. એટલે કે, પ્રથમ વખત જોડાવા માટે ગ્રાહકોને એક મોટી રકમ ખર્ચવી પડશે.
સરળ સેટઅપ અને મોટા દાવાઓ
કંપનીનો દાવો છે કે, હાર્ડવેર કિટ ખરીદ્યા પછી યુઝર્સ તેને પોતે જ (Self-Setup) સરળતાથી સેટઅપ કરી શકે છે, અને ઇન્ટરનેટ તરત શરૂ થઈ જશે. Starlink કંપની દાવો કરે છે કે, ઇન્ટરનેટ ડિસરપ્શનનો સવાલ જ નથી, અને સેવામાં શાનદાર સ્થિરતા (સ્ટેબિલિટી) રહેશે. એલન મસ્કની આ સેવા સેટેલાઇટ આધારિત હોવાથી, તેને દેશના કોઈપણ ખૂણામાં લગાવી અને ઉપયોગ કરી શકાય છે.
30 દિવસની ટ્રાયલ અને અનલિમિટેડ ડેટા
શરૂઆતમાં ગ્રાહકોને 30 દિવસનો ટ્રાયલ પીરિયડ મળશે, જેમાં તેઓ અનલિમિટેડ ડેટાનો ઉપયોગ કરી શકશે. Starlink Indiaની વેબસાઇટ પર જઈને તમે તમારી લોકેશન (પિન કોડ) અનુસાર પ્લાન અને ઉપલબ્ધતા ચેક કરી શકો છો. નોંધનીય છે કે, આ પ્લાન્સ મુખ્યત્વે રેસિડેન્શિયલ યુઝર્સ માટે છે. Starlink બીજા દેશોમાં ‘Roam’ જેવા પ્લાન્સ પણ ઓફર કરે છે, જેના હેઠળ યુઝર્સ પોતાની એન્ટેના કિટને સાથે લઈને ગમે ત્યાં જઈ શકે છે અને કારની ઉપર પણ માઉન્ટ કરી શકે છે. જોકે, ભારતમાં કઈ કઈ સર્વિસ ઉપલબ્ધ થશે, તે હજુ સંપૂર્ણપણે સ્પષ્ટ નથી.
શું તમારા વિસ્તારમાં સેવા શરૂ થઈ?
કંપનીએ પ્લાન્સ જાહેર કરી દીધા છે, પરંતુ હાલમાં આ સેવા મર્યાદિત સ્થળો પર જ ઉપલબ્ધ છે. અમે કેટલાક પિન કોડ્સ ટ્રાય કર્યા, અને લગભગ બધામાં હાલમાં એવું દર્શાવવામાં આવી રહ્યું છે કે, તમારા લોકેશન પર અત્યારે સર્વિસ ઉપલબ્ધ નથી. જોકે, તમે તમારું ઇમેઇલ આઈડી વેબસાઇટ પર આપી શકો છો, જેથી તમારા વિસ્તારમાં સેવા શરૂ થતાં જ કંપની તમને નોટિફિકેશન દ્વારા જાણ કરી શકે. Starlinkનું ભારતમાં આગમન એક મોટી વાત છે, જે રિમોટ એરિયામાં ઇન્ટરનેટ કનેક્ટિવિટીની સમસ્યાને ક્રાંતિકારી રીતે હલ કરી શકે છે, ભલે તે પ્રીમિયમ કિંમતે હોય!
