- ઈબ્રાહિમ રઈસીના મૃત્યુથી ભારત-ઈરાનના સંબંધો પર પણ અસર પડી શકે
- એશિયન બજારોમાં કારોબાર દરમિયાન તેલના ભાવમાં વધારો થયો
- ઈરાનના રાષ્ટ્રપતિના નિધન બાદ સોનું સર્વકાલીન ઉચ્ચ સ્તરે પહોંચી ગયું
હેલિકોપ્ટર દુર્ઘટનામાં ઈરાનના રાષ્ટ્રપતિ ઈબ્રાહિમ રઈસી અને વિદેશ મંત્રી હુસૈન અમીર અબ્દુલ્લાહિયાના મોતથી સમગ્ર દેશ આઘાતમાં છે. ઈરાનના રાષ્ટ્રપતિના આકસ્મિક નિધન બાદ અનેક સવાલો ઉઠવા લાગ્યા છે. ઇસ્લામિક રિપબ્લિકની રાજનીતિ અને અન્ય દેશો સાથેના સંબંધો અને વેપાર પર આ મૃત્યુની અસરનું મૂલ્યાંકન કરવામાં આવી રહ્યું છે. નિષ્ણાતો અનુમાન લગાવી રહ્યા છે કે રાયસીના મૃત્યુની અસર ક્યાં જોવા મળશે? નિષ્ણાતોના મતે ઈરાનના રાષ્ટ્રપતિના મૃત્યુની અસર તેલની કિંમતથી લઈને સોના અને શેરબજાર પર જોવા મળી શકે છે. ઈબ્રાહિમ રાયસીના મૃત્યુથી ભારત-ઈરાનના સંબંધો પર પણ અસર પડી શકે છે.
તેલની કિંમતોમાં મોટો વધારો થઈ શકે
ઈરાનના રાષ્ટ્રપતિના આકસ્મિક નિધનથી અનિશ્ચિતતાનું વાતાવરણ છે. આ અનિશ્ચિતતાની અસર તેલ બજાર પર દેખાવા લાગી છે. રોકાણકારો ઈરાનના તેલ ઉત્પાદન અને નિકાસ પર સંભવિત અસરનું મૂલ્યાંકન કરી રહ્યા છે. સોમવારે તેની અસર દેખાવા લાગી હતી. ઈરાનના રાષ્ટ્રપતિના હેલિકોપ્ટરના દુર્ઘટનાના સમાચાર સાથે સોમવારે એશિયન બજારોમાં કારોબાર દરમિયાન તેલના ભાવમાં વધારો થયો હતો.
ઈરાન એક મોટો તેલ ઉત્પાદક દેશ
રઈસીના મૃત્યુ બાદ તેલની કિંમતો પર અસર થવાની સંભાવના નિષ્ણાતોએ વ્યક્ત કરી છે. સોમવારે જુલાઈમાં સમાપ્ત થતા બ્રેન્ટ ઓઈલના વાયદા 0.3 ટકા વધીને બેરલ દીઠ $84.19 થયા હતા જ્યારે ક્રૂડના વાયદા 0.2 ટકા વધીને $79.70 પ્રતિ બેરલ થયા હતા. વૈશ્વિક સ્તરે વાતાવરણને જોતા અનુમાન લગાવવામાં આવી રહ્યું છે કે તેલની કિંમતોમાં મોટો વધારો થઈ શકે છે. ઈરાનના રાષ્ટ્રપતિના મૃત્યુથી ઓઈલ સપ્લાય ચેઈનને અસર થવાની ધારણા છે. ઈરાન એક મોટો તેલ ઉત્પાદક દેશ છે સપ્લાય ચેઈનમાં વિક્ષેપ તેલના ભાવને અસર કરી શકે છે.
સોનાના ભાવ પર અસર
સોનું હંમેશા સુરક્ષિત રોકાણ તરીકે જાણીતું છે. વૈશ્વિક અસ્થિરતા વચ્ચે રોકાણકારો સુરક્ષિત રોકાણ તરફ આકર્ષાયા છે. સોનાની માંગ વધવાને કારણે કિંમતો વધી શકે છે. ઈરાનના રાષ્ટ્રપતિના નિધન બાદ સોનું સર્વકાલીન ઉચ્ચ સ્તરે પહોંચી ગયું છે. ઈરાનમાં સ્થિરતા આવે ત્યાં સુધી સોનાના ભાવમાં વધારો થવાની શક્યતા છે.
શેરબજાર પર અસર
ઈરાનના રાષ્ટ્રપતિના મૃત્યુની અસર શેરબજાર પર પણ જોવા મળશે. રઈસીના મૃત્યુને કારણે ઈરાનની રાજનીતિમાં અસ્થિરતા અને આર્થિક નીતિઓને લઈને મૂંઝવણની અસર શેરબજાર પર પડી શકે છે. રઈસીના મોતની અસર ઈરાનના અન્ય દેશો સાથેના સંબંધો પર પણ જોવા મળી શકે છે.
ભારત પર શું થશે અસર?
ઈબ્રાહિમ રઈસી જૂન 2021માં હસન રુહાનીના સ્થાને ઈરાનના રાષ્ટ્રપતિ તરીકે ચૂંટાયા હતા. રાયસીની ભારત સાથે મિત્રતા સારી હતી. બંને નેતાઓ ગયા વર્ષે મળ્યા હતા. હાલમાં ઈરાને ચાબહાર પોર્ટ માટે ભારત સાથે દસ વર્ષનો કરાર કર્યો હતો. આ ડીલ બાદ ભારતને આગામી 10 વર્ષ માટે ચાબહાર ચલાવવાનો અધિકાર મળ્યો. અમેરિકાની નારાજગી છતાં ભારતે ઈરાન સાથે ડીલ ચાલુ રાખી હતી. રઈસીના શાસનકાળ દરમિયાન ભારત અને ઈરાન વચ્ચેની મિત્રતા ગાઢ બની હતી. રાયસી બાદ બંને દેશોના સંબંધો કઈ દિશામાં જશે તે જોવું રહ્યું.
