- નવસારીની બે વિદ્યાર્થીનીએ ચશ્મા બનાવ્યાં
- ઊંઘ આવતાં જ વાગશે એલાર્મ, થંભી જશે પૈડા
- રૂ. 3000 માં તૈયાર થશે ઈનોવેટિવ ચશ્મા
નવો અકસ્માત કાયદો
કેન્દ્ર સરકારે હિટ એન્ડ રનના ગુનાને લઈને નવો કાયદો બનાવ્યો છે. જે અંતર્ગત જો કોઈ ટ્રક અથવા ડમ્પર ચાલક કોઈને અકસ્માત કરીને ભાગી જાય તો તેને 10 વર્ષની જેલ થઈ શકે છે અને રૂ. 7 લાખનો દંડ પણ ભરવો પડશે. અગાઉ આ કેસમાં આરોપી ડ્રાઈવરને થોડા દિવસોમાં જ જામીન મળી જતા હતાં અને તે પોલીસ સ્ટેશનમાંથી જ બહાર આવી જતો હતો. જો કે આ કાયદા હેઠળ બે વર્ષની જેલની જોગવાઈ પણ હતી.
કેન્દ્ર સરકાર જાગૃતિ અભિયાન ચલાવે છે
ભારત દેશની આર્થિક વ્યવસ્થામાં કરોડરજ્જુ સમાન ટ્રાન્સપોર્ટેશન અકસ્માતના નવા કાયદાને કારણે જોખમમાં મુકાયું છે. દેશના હાઇવે પર થતા અકસ્માતોનો આંકડો અન્ય કોઈ બીમારીથી મૃત્યુ પામેલા દર્દીઓ કરતાં વધુ છે. આ સમસ્યાને નિવારવા માટે રાજ્ય સરકાર સહિત કેન્દ્ર સરકાર જાગૃતિ અભિયાનો ચલાવે છે. જેની ખાસ કોઈ અસર જોવા મળતી નથી. ભારતમાં હાઇવે સહિત આંતરિક માર્ગો ઉપર થતા અકસ્માત સરકાર માટે ચિંતા ઉપજાવે છે. અનેક કલાકોથી વાહન હાંકતા ચાલકોને આંખમાં ઝબકી આવવી સ્વભાવિક છે પણ આ ઝબકી ભૂતકાળમાં અનેકો ના જીવ લઈ ચૂકી છે.
ટીશા પટેલ અને કાવ્યા પટેલે ચશ્મના બનાવ્યા
આ સમસ્યા નિવારવા માટે નવસારી જિલ્લાના ખારેલ ગામની હાઈસ્કૂલની વિદ્યાર્થીનીઓએ સાયન્સ પ્રોજેક્ટ દરમ્યાન એક એવા ચશ્મા બનાવ્યા છે જેના થકી અકસ્માત રોકવામાં મદદ મળશે. નવસારી જિલ્લાના ગણદેવી તાલુકા પાસે આવેલી ખારેલ ગામની SSRH પ્રાથમિક શાળામાં સાતમા ધોરણમાં અભ્યાસ કરતી બે વિદ્યાર્થીનીઓ ટીશા પટેલ અને કાવ્યા પટેલે વિજ્ઞાન વિષયના શિક્ષકોની મદદથી ઇનોવેટિવ ચશ્મા તૈયાર કર્યા છે.
ડ્રાઈવરને ઊંઘ નહીં આવે, આવશે તો વાહન થંભી જશે
ટીશા પટેલ અને કાવ્યા પટેલે બનાવલે ચશ્મા પહેરતાં જ વાહન ચાલકોની આંખમાં ઊંઘ આવતા આંખ બંધ થશે તો ચશ્મા એલાર્મ વગાડશે. જેના થકી વાહન ચાલકો એલર્ટ બની જશે. તેમ છતાં આંખ બંધ રહેવાનો સમય ગાળો વાહન ચાલકનો લંબાશે તો વાહનના પૈંડા થંભી જશે. એટલે કે વાહન બંધ થઈ જશે અને અકસ્માતને ટાળી શકાશે.
આઈઆર સેન્સર વાળા ચશ્મા
હાઈવે ઉપર થતા મોટા ભાગના અકસ્માતોમાં ચાલકને ઊંઘની ઝબકી આવતા તે ડિવાઈડર કૂદાવી સામેના ટ્રેક પર પહોંચી જાય છે અને તે ટ્રેક પર આવતા વાહનને પણ અડફેટે લે છે. આવા અકસ્માતોમાં મોતનો આંકડો ચોંકાવનારો છે અને ચિંતા ઉપજાવનારો હોય છે. આ રાષ્ટ્રીય સમસ્યાને હળવી કરવા માટે નવસારીની વિદ્યાર્થીનીઓએ એક અદભુત ચશ્મા બનાવ્યા છે. પોતાની શાળા પાસેથી પસાર થતા હાઇવે નંબર 48 ઉપરથી દરરોજ મોટી સંખ્યામાં પસાર થતા વાહનો જોઈને તેમને આ આઈડીયા આવ્યો હતો. હાલમાં આર્ટિફિશિયલ ઇન્ટેલિજન્સની બોલબાલા ચારેકોર છે. તેવામાં આ ચશ્મામાં પણ IR સેન્સર લગાવી આંખમાં ઊંઘ લઇ વાહન હંકારતા ડ્રાઇવરો માટે ચશ્મા ઉપયોગી સાબિત થશે.
ચશ્માનો ખર્ચ કેટલો?
હવે સવાલ એ થાય છે કે ચશ્મા બનાવવા કેટલો સમય લાગ્યો અને કેટલાનો ખર્ચો થયો હતો. આ પ્રોજેક્ટમાં વિદ્યાર્થીનીઓને ત્રણ હજારનો ખર્ચો થયો છે અને આ પ્રોજેક્ટ તૈયાર કરવામાં ત્રણ મહિના જેટલો સમય લાગ્યો હતો.
