હવામાં જ ખતમ થશે દુશ્મન, ભારતની આ મિસાઈલથી ચીન-પાકિસ્તાન ફફડી ગયા

• ભારતે ન્યૂ જનરેશન મિસાઈલ સિસ્ટમ વિકસાવી
  
• ચીન-પાકિસ્તાનના સંભવિત હુમલા સામે મળશે રક્ષણ
  
• સ્વદેશી સિસ્ટમ હોવાથી ઉત્પાદનમાં વધારો કરી શકાય છે
  

ભારતીય વાયુસેનાએ રવિવારે SAMAR (સરફેસ ટુ એર મિસાઇલ ફોર એશ્યોર્ડ રિટેલિયેશન) એર ડિફેન્સ મિસાઇલ સિસ્ટમનું સફળતાપૂર્વક પરીક્ષણ કર્યું હતું. તમને જણાવી દઈએ કે સમર એર ડિફેન્સ મિસાઈલ સિસ્ટમ ભારતમાં જ વિકસિત કરવામાં આવી છે અને તે સ્વદેશી ડિઝાઇન પર આધારિત છે. આ સપાટીથી હવામાં પ્રહાર કરતી મિસાઈલ પ્રણાલી ભારતીય વાયુસેના દ્વારા જ વિકસિત કરવામાં આવી છે. વાયુસેનાને આત્મનિર્ભર બનાવવાની દિશામાં આ એક મહત્વપૂર્ણ પગલું છે.

વાયુસેનાએ એક નિવેદન જારી કરીને જણાવ્યું હતું કે ભારતમાં ડિઝાઇન અને વિકસિત SAMAR એર ડિફેન્સ મિસાઇલ સિસ્ટમનું એક્સરસાઇઝ એસ્ટ્રાશક્તિ-2023 દરમિયાન સફળતાપૂર્વક પરીક્ષણ કરવામાં આવ્યું હતું. આ પરીક્ષણ એરફોર્સ સ્ટેશન સૂર્યલંકામાં કરવામાં આવ્યું હતું. એર ડિફેન્સ સિસ્ટમ એરફોર્સના મેઇન્ટેનન્સ કમાન્ડના એક યુનિટ દ્વારા વિકસાવવામાં આવી છે. આ એર ડિફેન્સ સિસ્ટમનું પ્રથમ વખત ફિલ્ડ ટેસ્ટિંગ કરવામાં આવ્યું હતું. પરીક્ષણ દરમિયાન મિસાઇલ સિસ્ટમે વિવિધ પરિસ્થિતિઓમાં તેના તમામ લક્ષ્યોને સફળતાપૂર્વક પૂર્ણ કર્યા. આ એક ન્યૂ જનરેશન મિસાઈલ સિસ્ટમ છે. તેનાથી ચીન અને પાકિસ્તાન અથવા તો કોઈ પણ દેશ તરફથી ભારત તરફ હવામાં કરવામાં આવેલા હુમલાને રોકીને તે હવામાં હોય ત્યારે જ તેને નષ્ટ કરવામાં સફળતા મળે છે. આમ ચીન-પાકિસ્તાનના સંભવિત મિસાઈલ કે રોકેટ હુમલા સામે આ મિસાઈલ ભારતની રક્ષણ ઢાલ તરીકેનું કાર્ય કરશે. ઉપરાંત આ મિસાઈલ સિસ્ટમ સ્વદેશી હોવાથી દેશમાંજ તેનું ઉત્પાદન શક્ય બનશે અને આ મામલે ભારત આત્મનિર્ભર બની શકશે.

વાયુસેનાના અધિકારીઓએ જણાવ્યું કે આ મિસાઈલ દ્વારા 2 થી 2.5 મેકની સ્પીડ રેન્જ ધરાવતી મિસાઈલોને નષ્ટ કરી શકાય છે. આ ડિફેન્સ સિસ્ટમમાં બે લોન્ચિંગ પ્લેટફોર્મ અને સેન્સિંગ રેડાર છે, બંને મિસાઈલોને એકસાથે લોન્ચ કરી શકાય છે. વાયુસેનાના વડા વીઆર ચૌધરી અને ડેપ્યુટી ચીફ એપી સિંહે પણ આ મિસાઇલ સિસ્ટમના સફળ ટ્રાયલના સાક્ષી બન્યા હતા. આ કવાયત દરમિયાન, વાયુસેનાએ અન્ય શસ્ત્રોની ક્ષમતાઓનું પ્રદર્શન પણ જોયું. તમને જણાવી દઈએ કે ભારતીય વાયુસેના પણ ઝડપથી આત્મનિર્ભરતા તરફ આગળ વધી રહી છે.

એરફોર્સના મેન્ટેનન્સ કમાન્ડના 7 BRD યુનિટે આ એર ડિફેન્સ સિસ્ટમને વિકસાવી છે. મેન્ટેનન્સ કમાન્ડ ફાઇટર જેટ, ટ્રાન્સપોર્ટ એરક્રાફ્ટ, હેલિકોપ્ટર અને જમીન આધારિત શસ્ત્રોના ઘણા મહત્વપૂર્ણ યુનિટ્સના ઉત્પાદનમાં સફળ રહી છે. મેન્ટેનન્સ કમાન્ડ હાલમાં સુખોઈ-30 અને મિગ-29 જેટની ક્ષમતા સુધારવા માટે HAL સાથે કામ કરી રહી છે.

અસ્ત્રશક્તિની ડ્રીલના ભાગરૂપે, વાયુસેનાએ અન્ય સ્વદેશી એર ડિફેન્સ સિસ્ટમ, આકાશનું પણ પરીક્ષણ કર્યું. આ દરમિયાન આકાશ એર ડિફેન્સ સિસ્ટમે અદ્ભુત ક્ષમતાનું પ્રદર્શન કર્યું અને એક સાથે ચાર લક્ષ્યોને નિશાન બનાવી તેમને વીંધી બતાવ્યા. સરફેસ-ટુ-એર આકાશ એર ડિફેન્સ સિસ્ટમ એક સાથે ચાર માનવરહિત લક્ષ્યોને નષ્ટ કરવામાં સફળ રહી. વાયુસેનાના અધિકારીઓએ જણાવ્યું કે આ ડ્રીલ દરમિયાન ચાર લક્ષ્યો એક જ દિશામાંથી આવી રહ્યા હતા, જેના પર આકાશ એર ડિફેન્સ સિસ્ટમના ફાયરિંગ લેવલ રડારે ચારેય લક્ષ્યોને ટ્રેક કર્યા અને ચારેયને એક સાથે હવામાં નષ્ટ કરી દીધા. તમને જણાવી દઈએ કે DRDOએ આકાશ મિસાઈલ સિસ્ટમ વિકસાવી છે અને તેને ડિફેન્સ પબ્લિક સેક્ટર દ્વારા અન્ય કંપનીઓ સાથે મળીને બનાવવામાં આવી છે.