- મુખ્યમંત્રીએ કહ્યું, યુવા અધિકારીઓ ઇનોવેટિવ આઇડિયાઝ આપે
- વિઝન ડૉક્યુમેન્ટ કેન્દ્રીય નીતિ આયોગના સહયોગ-માર્ગદર્શનમાં તૈયાર કરશે
- વીડિયો કોન્ફરન્સ મારફતે તમામ જિલ્લા કલેક્ટરો તથા ડીડીઓને જોડવામાં આવ્યા
ગુજરાત સરકાર 2047 સુધીના 25 વર્ષમાં રાજ્ય કેવું હશે તે સંદર્ભે વિઝન ડૉક્યુમેન્ટ કેન્દ્રીય નીતિ આયોગના સહયોગ-માર્ગદર્શનમાં તૈયાર કરશે. બુધવારે બપોરે આ અંગે ગાંધીનગરમાં મુખ્યમંત્રી ભૂપેન્દ્ર પટેલના વડપણ હેઠળ ઉચ્ચ સ્તરીય વર્કશોપ યોજાયો હતો, જેમાં નીતિ આયોગના સિનિયર એડવાઇઝર અન્ના રોય, મુખ્યસચિવ રાજકુમાર, તમામ વિભાગોના અધિક મુખ્ય સચિવો, અગ્ર સચિવો તથા સચિવો સામેલ થયા હતા, જ્યારે વીડિયો કોન્ફરન્સ મારફતે તમામ જિલ્લા કલેક્ટરો તથા ડીડીઓને જોડવામાં આવ્યા હતા.
મુખ્યમંત્રીએ વર્કશોપમાં જણાવ્યું હતું કે, કેન્દ્ર સરકારે વિકસિત ભારત @ 2047ના આપેલ વિઝન માટે ગુજરાત @2047નું લક્ષ્ય નિર્ધારિત સમય પહેલાં જ પાર પાડવાનું વિઝન જિલ્લા કલેક્ટરો-ડીડીઓએ રાખવું જોઈએ. એમણે કહ્યું કે, દરેક જિલ્લા તંત્ર વિકાસના દરેક ક્ષેત્રનું વિઝન તૈયાર કરે અને એ રીતે રાજ્યનું વિઝન તૈયાર કરવામાં ગુજરાત નંબર વન બને તેવી આપણી નેમ છે. આવનારા 25 વર્ષ એટલે કે અમૃતકાળમાં વિકાસનો રોડ મેપ કેવો હોય તેવું મંથન-ચિંતન કરવા માટે આ વર્કશોપ યોજાયો હતો, જેમાં મહેસાણા, વલસાડ, દાહોદ અને ભાવનગર જિલ્લા તંત્રોએ તેમના પ્રારંભિક વિઝન ડૉક્યુમેન્ટનો સારાંશ રજૂ કર્યો હતો.
મુખ્યમંત્રીએ જણાવ્યું હતું કે, વિઝન ડૉક્યુમેન્ટ તૈયાર કરવામાં યુવા અધિકારીઓ તેમના ઇનોવેટિવ આઇડિયાઝ આપે અને અત્યારથી જ એવું મિકેનિઝમ વિકસાવવામાં આવે કે જેથી યોજનાઓના 100 ટકા લક્ષ્યાંક, ગ્રીથ ગ્રોથ, બેક યુ બેઝિક, મિશન લાઇફના સંકલ્પો પાર પડે.
મુખ્ય સચિવે જણાવ્યું હતું કે, આવનારા વર્ષોનો વિકાસ મેપ તૈયાર કરતા હોઈએ ત્યારે વીતેલા વર્ષો તરફ પણ દૃષ્ટિપાત કરવો જરૂરી છે, જેમ કે, 1997-98ના વર્ષમાં 91 હજાર કરોડ જીએસડીપી હતું તે અત્યારે 22.61 લાખ કરોડે પહોંચ્યું છે, એટલે કે અંદાજે 11 ગણો વધારો જીએસડીપીમાં થયો છે. મુખ્યમંત્રીના સલાહકાર ડૉ.હસમુખ અઢિયાએ જણાવ્યું હતું કે, નીતિ આયોગે મોડલ ડૉક્યુમેન્ટેશન સ્ટેટ તરીકે ગુજરાત અને આંધ્રપ્રદેશની પસંદગી કરી છે. નીતિ આયોગના સુશ્રી અન્ના રોયે વિઝન ડૉક્યુમેન્ટમાં નીતિ આયોગની ભૂમિકા અને રાજ્યો તરફથી અપેક્ષા પ્રસ્તુત કરી હતી.
