ટેન્ડર પ્રક્રિયામાં પક્ષપાત રખાયો હોવાની ફરિયાદ પહોંચતા હાઇકોર્ટ દ્વારા નવેસરથી ટેન્ડર બહાર પાડવા સરકાર અને ટુરીઝમ ડિપાર્ટમેન્ટને સૂચના આપી છે
કચ્છની ઓળખ વિશ્વમાં પર્યટન સ્થળ તરીકે હવે થઇ રહી છે. માતાનું મઢ દેશભરમાં વિખ્યાત છે. તેની સાથે સરકારે શરૂ કરેલી ટેન્ટ સિટી ટૂર પણ હવે લોકોમાં આકર્ષણનું કેન્દ્ર બની છે. ચાર માસ સુધી આ ટેન્ટ સિટીનો લ્હાવો દેશના અનેક લોકો માણી રહ્યા છે. નવેમ્બરથી શરૂ થતી આ ટુર ફેબ્રુઆરી સુધી ચાલુ રહે છે. ત્યારે આ વર્ષે પણ ટેન્ટ સિટી શરૂ કરવાનું હોય તે માટેની ટેન્ડર પ્રક્રિયામાં પક્ષપાત રાખી નીતિ નિયમો નેવે મુકી લેભાગુ તત્વોએ ઓળખાણના કારણે ટેન્ડર મેળવી લીધુ હોવાની ફરિયાદ હાઇકોર્ટ સુધી પહોંચી હતી. ત્યારે હાઇકોર્ટે જે પાર્ટીને ટેન્ડર દેવાયુ છે તે ટેન્ડર રદ બાતલ કરતા હુકમ કરતાં સરકાર અને ટુરીઝમ વિભાગને મોટો ફટકો લાગ્યો છે. હાઇકોર્ટે નવી ટેન્ડર પ્રક્રિયા શરૂ કરવા સૂચન કરેલ હોવાથી આગામી દિવસોમાં ફરી ટેન્ડર પ્રક્રિયા સરકાર દ્વારા હાથ ધરાશે.
અરજદારપક્ષ તરફથી એવી રજૂઆત કરવામાં આવી હતી કે, ટેન્ટસીટી સહિતની સેવાઓ મામલે અરજદાર અને બીજી કંપની દ્વારા ટેન્ડર ભરવામાં આવ્યા હતા. જે દિવસે અન્ય કંપનીનું ટેન્ડર મંજૂર થવાનું હતું એ જ દિવસે અરજદાર તરફથી ટુરીઝમ ડિપાર્ટમેન્ટનું ધ્યાન દોરાયું હતું કે, બીજી કંપની દ્વારા જે ટેન્ડર બીડ ભરવામાં આવ્યું છે, તેમાં ભારે વિસંગતતાઓ અને ક્ષતિઓ છે. જેથી ટુરીઝમ ડિપાર્ટમેન્ટ તરફથી એ જ રાત્રે અન્ય કંપનીને ઈ-મેલ કરી જાણ કરી દેવાઈ હતી અને તેથી પેલી કંપનીએ ફાયનાન્શીયલ બીડની વિસંગતતાઓ દૂર કરી નવેસરથી બીડ ટુરીઝમ ડિપાર્ટમેન્ટને મોકલી દીધુ હતું. અરજદારપક્ષ તરફથી હાઇકોર્ટનું ધ્યાન દોરાયું હતું કે, ટેન્ડરની શરતોમાં સ્પષ્ટ લખ્યું છે કે, જો કોઈપણ વિસંગતતા હોય તો તે સંજોગોમાં ટેન્ડર મંજૂર ના થઈ શકે તેમછતાં ટુરીઝમ ડિપાર્ટમેન્ટ દ્વારા પ્રસ્તુત કેસમાં પક્ષપાત કરી બારોબાર પાછલા બારણે ટેન્ડર મંજૂર કરી દેવાયું હતું.
ટેન્ડર મેળવનાર કંપની દ્વારા બચાવ કરાયો હતો કે, ટેન્ડર બીડમાં સામાન્ય ભૂલ વિસંગતતા હતી, તે દૂર કરી દેવાઈ હતી. જયાં સુધી રેટની વાત છે, રેટ તો બધા સરખા જ છે. તેથી ટેન્ડર રદ કરવાનો કોઈ પ્રશ્ન ઉપસ્થિત થતા નથી. તમામ પક્ષકારોને સાંભળ્યા બાદ હાઈકોર્ટે ટુરીઝમ ડિપાર્ટમેન્ટ દ્વારા અપાયેલું ટેન્ડર રદબાતલ ઠરાવ્યું હતું. હાઇકોર્ટે ટકોર કરી હતી કે એવી તો શું મજબૂરી હતી કે નિયમો-શરતોને બાજુએ રાખીને ટુરીઝમ ડિપાર્ટમેન્ટ દ્વારા ટેન્ડર આપી દેવાયું અને ખુદ ટેન્ડરની શરતો કે નિયમોની પરવા ના કરાઇ. હાઇકોર્ટે ટુરીઝમ ડિપાર્ટમેન્ટના નિર્ણયને અયોગ્ય અને ગેરવાજબી ગણાવી તેને રદબાતલ ઠરાવ્યો હતો અને નવેસરથી ટેન્ડર પ્રક્રિયા હાથ ધરવા હુકમ કર્યો હતો.
