આબુથી ધરપકડ કર્યા બાદ કોર્ટમાં રજૂ કરતા ૧3 દિવસના રિમાન્ડ મંજૂર
ટીઆરપી ગેમ ઝોન આગકાંડમાં પોલીસ દ્વારા આબુથી આરોપી ધવલ ઠક્કરની ધરપકડ કરવામાં આવી હતી અને તેને રાજકોટ ક્રાઇમ બ્રાંચને સોંપવામાં આવ્યો હતો. જેમાં ગેમઝોનનું લાયસન્સ ધવલ ઠક્કરની પેઢીના નામે હોવાનું ખુલ્યું છે. ક્રાઇમ બ્રાંચે આરોપી ધવલ ઠક્કરને કોર્ટમાં રજૂ કરવામાં આવ્યો હતો અને રિમાન્ડની મંજૂરી માંગવામાં આવી હતી. જેના ૧3 દિવસના રિમાન્ડ કોર્ટ દ્વારા મંજૂર કરવામાં આવ્યા છે.
તાલુકા પોલીસમાં જે એફઆઈઆર નોંધાઈ છે તેમાં ધવલને આરોપી તરીકે પ્રથમ ક્રમાંકે મૂકાયો છે. તે ધવલ કોર્પોરેશનનો પ્રોપરાઇટર છે. ક્રાઈમ બ્રાન્ચના સૂત્રોએ જણાવ્યું કે ટીઆરપી ગેમ ઝોનનું લાયસન્સ તેની પેઢીના નામે લેવાયું હતું.
ક્રાઇમ બ્રાન્ચે આજે તેને રિમાન્ડની માગણી સાથે કોર્ટમાં રજૂ કર્યો હતો. ગઇકાલે રજૂ કરાયેલા આરોપીઓનાં રિમાન્ડ રિપોર્ટમાં જે ૧૪ કારણો દર્શાવાયા હતા તે જ ૧૪ કારણો ધવલના રિમાન્ડ રિપોર્ટમાં પણ ક્રાઈમ બ્રાન્ચે દર્શાવ્યા હતા. સાથોસાથ વધુ ત્રણ કારણો પણ દર્શાવ્યા હતાં. આ ત્રણ કારણોમાં ક્રાઈમ બ્રાન્ચે એવી રજૂઆત કરી હતી કે આરોપી ધવલની પોલીસ કસ્ટડીમાં રહેલા આરોપીઓ સાથે ક્રોસ પૂછપરછ કરી વધુ વિગત તથા પૂરાવા મેળવવાના છે. આરોપી નં. ૪ના નામે ટીઆરપી ગેમ ઝોનનું લાયસન્સ ધવલ કોર્પોરેશનના નામથી છે. જેથી આરોપી ગેમ ઝોનની પૂરી માહિતી જાણતો હોવાની શક્યતા છે. પરંતુ આરોપી પૂરતી માહિતી આપતો નથી. જેથી તેની કસ્ટડીની જરૂરિયાત છે. બનાવ બાદ આરોપી ક્યા હતો, કોની મદદથી જતો રહ્યો હતો. તે અંગે સંતોષકારક જવાબ આપતો ન હોવાથી તે અંગેના પૂરાવા મેળવવા પણ આરોપીની કસ્ટડીની જરૂરિયાત છે.
આ કેસમાં સ્પેશિયલ પીપી તરીકે મૂકાયેલા તુષાર ગોકાણીએ રિમાન્ડ માટે કોર્ટમાં દલીલો કરી હતી. બંને પક્ષોની દલીલો-રજૂઆતો બાદ અદાલતે આરોપી ધવલને ૧૩ દિવસના પોલીસ રિમાન્ડ પર સોંપવાનો હુકમ કર્યો હતો. ક્રાઈમ બ્રાન્ચના સૂત્રોએ જણાવ્યું કે પ્રાથમિક પૂછપરછમાં આરોપી ધવલ એમ કહી રહ્યો છે કે તે ટીઆરપી ગેમ ઝોનમાં માત્ર સ્લીપીંગ પાર્ટનર છે. દર મહિને તે પેટેના પૈસા મળી જતાં હતા. જે રકમ ૧૫ હજારની આસપાસ હોવાનું તે કહી રહ્યો છે. પરંતુ આ બાબત ગળે ઉતરે તેવી નથી. જેથી તમામ મુદ્દે તેની ઘનિષ્ઠ પૂછપરછ કરવામાં આવશે.
