રાજકોટમાં ફરજ બજાવેલા અધિકારીઓને આવતીકાલે ડીજી ઓફિસે હાજર થવા ફરમાન
આઇએએસ, આઇપીએસ અને સસ્પેન્ડ થયેલા તેમજ અગા. ફરજ બજાવી ચુકેલાની પુછપરછ થશે
રાજકોટના ટીઆરપી અગ્નિકાંડની તપાસ સીટને સોંપવામાં આવી હતી. સ્પેશ્ય ઇન્વેસ્ટીગેશન ટીમ દ્વારા આજે સરકારને તપાસનો રિપોર્ટ સોંપવામાં આવ્યો હતો. ગાંધીનગર ખાતે ગૃહમંત્રી હર્ષ સંઘવી સાથે બેઠક બાદ તમામ આઇપીએસ અને આઇએએસ અધિકારી સામે પુછપરછના આદેશ છુટયા હતા. જેથી આવતીકાલે રાજકોટમાં અગાઉ ફરજ બજાવી ચુકેલા તેમજ હાલ પોસ્ટીંગથી દૂર કરાયેલા અને સસ્પેન્ડ થયેલા સાત અધિકારીઓને આવતીકાલે હાજર થવા ડીજી ઓફિસથી તેડું આવ્યું છે.
આજે ગાંધીનગરમાં ગૃહમંત્રી હર્ષ સંઘવી સાથે સીટના વડા અને ડીજીપી વિકાસ સહાયની બેઠક મળી હતી. જેમાં અત્યાર સુધીમાં અગ્નિકાંડમાં થયેલી કામગીરી અને તપાસની પ્રક્રિયાની સમીક્ષા કરવામાં આવી હતી. આ બેઠકમાં ગૃહમંત્રી દ્વારા જવાબદાર અધિકારીઓ સામે કાર્યવાહી કરવા સુચના આપવામાં આવી હતી. જેને તાકીદથી અમલમાં મુકવામાં આવી છે અને ડીજીપી દ્વારા આઇએએસ, આઇપીએસ અધિકારીઓની તેમજ રાજકોટમાં ફરજ બજાવી ચુકેલા અને પોસ્ટીંગથી દૂર થયેલા અધિકારીઓની પુછપરછ માટે આવતીકાલે ડીજીપી ઓફિસે હાજર થવા ફરમાન કરવામાં આવ્યું છે.
અત્રે ઉલ્લેખનીય છે કે રાજકોટ અગ્નિકાંડમાં રાજકોટ મહાનગરપાલિકાના કમિશનર આનંદ પટેલ, પો.કમિશનર રાજુ ભાર્ગવ, જોઇન્ટ પોલીસ કમિશનર વિધિ ચૌધરી, ડીસીપી સુધીરકુમાર દેસાઇ તેમજ સાત જેટલા અધિકારીઓને સસ્પેન્ડ કરવામાં આવ્યા હતાં. આ તમામ અધિકારીઓને આવતીકાલે પુછપરછ માટે ડીજીપી વિકાસ સહાય દ્વારા ગાંધીનગર ખાતે હાજર થવા માટે સુચના આપવામાં આવી હતી. ઉપરાંત રાજકોટમાં અગાઉ ફરજ બજાવી ચુકેલા અધિકારીઓને પણ હાજર થવા આદેશ આપવામાં આવ્યો છે.
વધુમાં સુભાષ ત્રિવેદીએ જણાવ્યું હતું કે રાજકોટ મહાનગરપાલિકા, ફાયર વિભાગ, અને પોલીસ દ્વારા જે કંઇ કામગીરી કરવામાં આવી છે તેની પણ તપાસ કરવામાં આવી હતી અને રિપોર્ટ સોંપવામાં આવ્યો છે. ફરી આવી ઘટના ન બને તે માટે જવાબદારો સામે કડક કાર્યવાહી કરવામાં આવશે. આ તપાસ ઘણો સમય માંગી લે તેવી પરંતુ તેમાં કોઇ કચાસ રાખવામાં આવશે નહી તેવી ખાત્રી સીટ દ્વારા આપવામાં આવી હતી. વધુમાં કહ્યું હતું કે ગેમ ઝોનમાં જે અધિકારીઓએ મોજ મજા માણી છે તેને પણ છોડવામાં આવશે નહી.
ગેમ ઝોનના સંચાલકો એક આઇએએસ અધિકારીની વ્યવસ્થા લાગ્યા હતા
સૂત્રોમાંથી મળતી માહિતી મુજબ રાજકોટમાં આઇએએસ તરીકે ફરજ બજાવી ચુકેલા એક અધિકારીના દિકરાને ગેમઝોન સુધી લઇ જવા અને મુકી જવાની વ્યવસ્થા પણ ગેમઝોનના માલિક દ્વારા કરવામાં આવી હતી.
