જસ્ટિન ટ્રુડોએ પીએમ પદ પરથી રાજીનામું આપ્યા બાદ કેનેડા હવે તેના નવા વડાપ્રધાનની રાહ જોઈ રહ્યું છે. સત્તાધારી લિબરલ પાર્ટીએ હવે તેના નવા નેતાની પસંદગી કરવા માટે 9 માર્ચે નેશનલ કાઉન્સિલની મહત્વપૂર્ણ બેઠક બોલાવી છે. પાર્ટીના નવા નેતા દેશના આગામી વડાપ્રધાન બનશે. ભારતીય મૂળના બે નેતાઓ સહિત અન્ય ઘણા નેતાઓ પણ નવા વડાપ્રધાન પદ માટે દાવો કરી રહ્યા છે.
પાર્ટીમાં એન્ટ્રી લેવા ભરવા પડશે 350 હજાર ડોલર
જો કે જે લોકો નવા વડાપ્રધાન બનવા માંગે છે, તેમના માટે આ પ્રયાસ મફત નહીં હોય, પરંતુ આ વખતે તેઓએ ગત વખત કરતા વધુ પૈસા ખર્ચવા પડશે. પાર્ટી સાથે જોડાયેલા સૂત્રોએ જણાવ્યું કે લિબરલ પાર્ટી સંભવિત ઉમેદવારોની એન્ટ્રી ફીમાં વધારો કરવા જઈ રહી છે. પાર્ટી પ્રવેશ ફી $350,000 નક્કી કરવા જઈ રહી છે, જે 3,00,63,477.50 રૂપિયા એટલે કે ભારતીય રૂપિયામાં લગભગ 3 કરોડ રૂપિયા થાય.
ગત વર્ષ કરતા 2.75 હજાર ડોલર વધુ
આ વખતે પાર્ટીના નેતૃત્વ માટે ઈચ્છુક લોકોની એન્ટ્રી ફી ગત વખત કરતા ઘણી વધારે છે. છેલ્લી વખતે આ ફી $75,000 રાખવામાં આવી હતી. ખાસ વાત એ છે કે ઇચ્છુક નેતાઓએ 23 જાન્યુઆરી સુધીમાં ચૂંટણી લડવાનો તેમનો ઇરાદો જાહેર કરવો પડશે અને પ્રવેશ ફી ચૂકવવાની રહેશે. આ પછી, લોકો 27 જાન્યુઆરી સુધી પાર્ટી નેતૃત્વની રેસમાં મતદાન માટે નોંધણી કરાવી શકશે.
પાર્ટીની બેઠકમાં મતદાન શરતો નક્કી કરાઇ
લિબરલ પાર્ટીની નેશનલ કાઉન્સિલની બેઠકમાં નેતૃત્વને લઈને મતદાન માટે કેટલીક શરતો પણ નક્કી કરવામાં આવી છે. પાર્ટી ફક્ત આવા કેનેડિયન નાગરિકો અને સ્થાયી નિવાસીઓને જ મતદાન કરવાની મંજૂરી આપી રહી છે જેમની ઉંમર 14 વર્ષથી વધુ છે. અગાઉ, બિન-કેનેડિયન રહેવાસીઓને લિબરલ પાર્ટી નામાંકન અને નેતૃત્વ રેસ માટે મત આપવાની મંજૂરી આપવામાં આવી હતી, જેને વિદેશી હસ્તક્ષેપ માટે “ગેટવે” તરીકે ઓળખવામાં આવે છે. પછી કેટલાક લિબરલ સાંસદોએ પાર્ટી એક્ઝિક્યુટિવને તે ચેતવણીઓ પર ધ્યાન આપવા વિનંતી કરી હતી.
ભારતીય મૂળના બે નેતાઓ પીએમ પદની રેસમાં
ભારતીય મૂળના બે નેતાઓ પણ પીએમ પદની રેસમાં ઉતરતા જોવા મળી રહ્યા છે. ભારતીય મૂળની અનિતા આનંદ બાદ હવે ચંદ્ર આર્યએ પણ પોતાનો દાવો રજૂ કર્યો છે. આર્ય લિબરલ પાર્ટીના નેતા છે અને ઓટ્ટાવાથી બે વખત સાંસદ રહી ચૂક્યા છે. આ સિવાય વિદેશ મંત્રી મેલાની જોલી, ઈનોવેશન મિનિસ્ટર ફ્રાન્કોઈસ-ફિલિપ શેમ્પેઈન, નેચરલ રિસોર્સ મિનિસ્ટર જોનાથન વિલ્કિન્સન અને એમ્પ્લોયમેન્ટ મિનિસ્ટર સ્ટીવન મેકકિનોન સહિત કેટલાય કેબિનેટ મંત્રીઓનું કહેવું છે કે તેઓ ટોચના પદની રેસમાં છે, પરંતુ તેઓએ એમ પણ કહ્યું કે તેઓ પ્રથમ નિયમો જોવા માંગે છે.
