લૂંટ, અનૈતિક ધંધા માટે મોકળુ મેદાન
માત્ર લગુન રિસોર્ટ સુધી જ લાઇટીંગ, ત્યાંથી આગળ ન્યારી ડેમ સુધી ચંબલની ખીણ જેવો ભયાવહ માહોલ
અગ્ર ગુજરાત, રાજકોટ
રાજકોટની ભાગોળે અવધથી ન્યારી ડેમ જતા રસ્તા એક એવો વિસ્તાર છે કે જ્યા વસાહત વચ્ચે ચંબલની ખીણ જેવો ભયાવહ માહોલ છે. એટલુ જ નહીં, અહીં ચોક્કસ હોટલ, કાફેમાં લવરમુછિયા યુગલો માટે એકાંત માણવાની સુવિધા આપવાથી માંડી અનેક પ્રકારના ન્યૂસન્સ ખુલ્લેઆમ ચાલી રહ્યા છે. કાલાવડ મેઇન રોડથી ન્યારી-૧ ડેમ તરફ જતા રોડ પર લગુન રિસોર્ટ સુધી લાઇટીંગ પોલ છે પણ તેનાથી આગળ ન્યારી ડેમ સુધી લાઇટની કોઇ જ સુવિધા નથી. રાત્રે તો ઠીક પણ દિવસે પણ ભેંકાર ભાસતો હોય છે.
સુરજ ઢળ્યા પછી તો અહીંથી નીકળવુ જોખમરૂપ બની જાય છે. લગુન રિસોર્ટથી ન્યારી ડેમ સુધી લાઇટ નાખવામા આવે તો ન્યૂસન્સ દૂર થવાની સાથે અહીં નવી રેસીડેન્સીયલ વસાહત માટે પણ વિકાસની એક નવી દિશા ખુલે તેમ છે.
ન્યારી-૧ ડેમ તરફ જતા રોડ પર વિકાસની હદ લગુન રિસોર્ટ પાસે અટકી જાય છે. ત્યાથી આગળ માનવી વસાહત હોવા છતાં અન્ય સુવિધાની વાત તો દૂરની રહી, રોડ પર લાઇટની સુવિધા પણ આપવામા આવી નથી. આવા ભયાવહ માહોલ વચ્ચે આ રોડ પર રહેતા પરિવાર અને ત્યાથી નીકળતા લોકોની હાલત રાત્રે શું થતી હશે એ જોવા માટે મ્યુનિ. કમિશનર કમ રૂડાના ચેરમેન આનંદ પટેલે એક વખત અંગત રસ લઇ આ વિસ્તારની સાંજના સમયે અંધારૂ થઇ ગયા બાદ મુલાકાત લેવાની જરૂર છે. આ વિસ્તારમાં રહેતા પરિવારની લોકલાગણી છે.
