કોલેજના બીજા સેમેસ્ટરની પરીક્ષા એક કલાક મોડી શરૂ થઇ : વિદ્યાર્થીઓ હેરાન
છબરડાઓથી ખ્યાતનામ બનેલી સૌરાષ્ટ્ર યુનિવર્સિટીમાં વધુ એક છબરડો બહાર આવ્યો છે. સૌરાષ્ટ્ર યુનિવર્સિટીમાં કોલેજોના બીજા સેમેસ્ટરની પરીક્ષા ચાલતી હતી ત્યારે જ સર્વર બગડતાં પરીક્ષા એક કલાક મોડી થઇ હતી આ કારણે વિદ્યાર્થીઓ ખૂબ જ હેરાન અને ચિંતીત થયા હતા. સૌરાષ્ટ્ર યુનિ.ના રેઢીયાળ વહિવટ બાબતે ચોમેરથી ફરિયાદ ઉઠી છે.
સૌરાષ્ટ્ર યુનિ. દ્વારા કોલેજોમાં સેમેસ્ટર-૨ની પરીક્ષાનાં પ્રથમ દિવસે યુનિ.નું સર્વર ઠપ્પ થઈ જતાં સંખ્યાબંધ વિદ્યાર્થીઓએ પરીક્ષા કેન્દ્રમાં પ્રશ્નપેપરની રાહ જોતા બેઠા રહ્યા હતા. બપોરનાં ૨-૩૦ વાગ્યાની પરીક્ષા ૩- ૩૦ કલાકે શરૂ થઈ હતી. વરસાદને કારણે યુનિ.નાં સર્વરમાં ટેકનીકલ ક્ષતિ સર્જાતા સમયસર ઓનલાઈનપ્રશ્નપેપરો પહોંચ્યા નહી હોવાનું પરીક્ષા વિભાગે જાહેર કર્યું હતું.
સૌરાષ્ટ્ર યુનિ. સંલગ્ન કોલેજોનું નવુ શૈક્ષણિક સત્ર શરૂ થયા બાદ આજી બીએ, બીકોમ, બીએસસી સેમે-૨ની સાથે એસએસએમની પરીક્ષાનો પ્રારંભ થયો હતો. પરીક્ષા વિભાગ દ્વારા પ્રશ્નપેપરો લીક ન થાય તે માટે યુપીડીએસ સીસ્ટમ દ્વારા દરેક પરીક્ષા કેન્દ્રોને ઓનલાઈન પ્રશ્નપેપર મોકલવાની પધ્ધતિ અમલમાં મુકવામાં આવી છે. આજે બપોરે ૨-૩૦ કલાકે પરીક્ષા શરૂ થાય તેના એક કલાક પહેલાં પરીક્ષા વિભાગ દ્વારા ઓનલાઈન પ્રશ્નપેપર મોકલવાની કામગીરી શરૂ થાય તે પહેલાં જાણવા મળ્યુ હતુ કે વરસાદનાં કારણે યુનિ.નાં પરીક્ષા વિભાગનું સર્વર કામ કરતું નથી. જેનાં કારણે ઓનલાઈન પ્રશ્નપેપર મોકલી નહીં શકાય. તેથી પરીક્ષાનાં સમયમાં એક કલાકનો ફેરફાર કરી બપોરના ૨- ૩૦ના બદલે ૩-૩૦ વાગ્યાથી પેપર શરૂ કરવાની ફરજ પડી હતી. એક કલાક દરમિયાન પરીક્ષાર્થીઓના મનમાં ફરીને પ્રશ્નપેપર લીક થયુ છે કે કેમ તેવા પ્રશ્નો ઉઠયા હતા.
યુનિ. કેમ્પસનાં મેઈન બિલ્ડીંગમાં ફૂલી એરકન્ડીશન બિલ્ડીંગમાં સર્વર મુકવામાં આવ્યુ છે. બીજુ સર્વર સ્પેરમાં હોવા છતાં આજે વરસાદને લીધે ટેકનીકલ ક્ષતિ સર્જાતા યુનિ.નો પરીક્ષા વિભાગ પણ મુંઝવણમાં મુકાયો હતો. ફરીને વરસાદની સીઝનમાં આ પ્રકારની મુશ્કેલી ન સર્જાય તેની તકેદારી રાખવાની સુચના આપવામાં આવી હતી.
