ધ્રાંગધ્રાના જીવા ગામે જૂના મનદુ:ખમાં મામાના દિકરાની હત્યા કરાવતો ભાણેજ

 ધ્રાંગધ્રાના જીવા ગામે જૂના મનદુ:ખમાં મામાના દિકરાની હત્યા કરાવતો ભાણેજ

પોલીસ ભરતીની તૈયારી કરતા યુવાનને ગાડીની ઠોકરે ચડાવી અકસ્માતમાં ખપાવવાનો પ્રયાસ : હત્યાની કલમ ઉમેરી બેની ધરપકડ

અગ્ર ગુજરાત, ધ્રાંગધ્રા

ધ્રાંગધ્રા તાલુકાના જીવા ગામ નજીક બનેલો એક વાહન અકસ્માત હત્યામાં પરિણમ્યો છે. 15 જાન્યુઆરી, 2026ના રોજ વહેલી સવારે યુવરાજસિંહ સુખદેવસિંહ ઝાલા (ઉં.વ. 29, રહે. જીવા)નું અકસ્માતમાં મોત થયું હતું. પોલીસે તપાસ કરતાં આ બનાવ હત્યાનો હોવાનું ખુલ્યું હતું અને ગણતરીના કલાકોમાં બે આરોપીઓને ઝડપી પાડવામાં આવ્યા હતા.

યુવરાજસિંહ ઝાલા સવારે 5:30 થી 6:30 વાગ્યાની આસપાસ પોલીસ ભરતીની દોડની તૈયારી માટે જીવા-ચુલી રોડ પર દોડવા નીકળ્યા હતા. તે દરમિયાન કોઈ અજાણ્યા વાહન ચાલકે તેમને ટક્કર મારી મોતને ઘાટ ઉતારી ફરાર થઈ ગયો હતો. શરૂઆતમાં આ ઘટનાને અકસ્માત તરીકે નોંધવામાં આવી હતી.

ધ્રાંગધ્રા તાલુકા પોલીસે અજાણ્યા વાહન ચાલકની શોધખોળ શરૂ કરી હતી. બનાવ સ્થળ નજીકના ગામોના સીસીટીવી ફૂટેજ તપાસતા, ચુલી ગામ તરફથી એક સફેદ બોલેરો ગાડી જીવા ગામ તરફ જતી અને થોડા સમયમાં જ પૂરઝડપે પરત ચુલી તરફ નીકળી હાઈવે તરફ શંકાસ્પદ રીતે જતી જોવા મળી હતી.

હાઈવેના સીસીટીવી ફૂટેજ તપાસતા, મોરબી જિલ્લાના હળવદના સરા ચોકડી પાસેની ચા-પાણીની હોટલના કેમેરામાં અકસ્માત કરનાર બોલેરો ગાડી અને તેમાંથી ઉતરતા બે ઈસમો દેખાયા હતા. આ ફૂટેજ જીવા અને ચુલી ગામના રહીશો તેમજ ફરિયાદીને બતાવતા, તેઓએ બે ઈસમો પૈકી એકને ફરિયાદીના ભાણેજ દિવ્યરાજસિંહ ગંભીરસિંહ જાડેજા અને બીજાને તેના મિત્ર મયુરભાઈ ઘનશ્યામભાઈ તરીકે ઓળખી બતાવ્યા હતા.

વધુ પૂછપરછમાં જાણવા મળ્યું કે મૃતક યુવરાજસિંહ અને આરોપી દિવ્યરાજસિંહ વચ્ચે અગાઉ મનદુખ હતું. દિવ્યરાજસિંહ ફરિયાદીના ઘરે જીવા ગામે રહેતો હતો ત્યારે યુવરાજસિંહ અને ફરિયાદી તેને કામ અને પરીક્ષાની તૈયારી બાબતે ઠપકો આપતા હતા, જેના કારણે તેમની વચ્ચે ઉગ્ર બોલાચાલી પણ થઈ હતી. દિવ્યરાજસિંહની ચાલચલગત સારી ન હોવા બાબતે પણ યુવરાજસિંહે તેને ઠપકો આપ્યો હતો.

આ ઉપરાંત, આરોપી દિવ્યરાજસિંહને શંકા હતી કે તેના મોટાભાઈની આત્મહત્યા પાછળ યુવરાજસિંહનો હાથ હતો. આ તમામ મનદુખ રાખીને દિવ્યરાજસિંહ ગંભીરસિંહ જાડેજા અને તેના મિત્ર મયુરભાઈ ઘનશ્યામભાઈએ યુવરાજસિંહ જ્યારે દોડવા નીકળ્યા હતા ત્યારે બોલેરો ગાડીથી ટક્કર મારી, તેમના પર ગાડી ચડાવી દઈ સ્થળ પર જ હત્યા કરી નાખી હતી. પોલીસે બંને આરોપીઓની ધરપકડ કરી વધુ તપાસ હાથ ધરી છે.