અમદાવાદમાં મહિલા કોન્સ્ટેબલના આપઘાત પ્રકરણમાં નવો વળાંક આવ્યો

• મહિલા કોન્સ્ટેબલના પ્રેમીએ પણ કર્યો આપઘાત
  
• આરોપી જશુ રાઠોડે પાલડીની હોટલમાં કર્યો આપઘાત
  
• વાસણા પોલીસે કથિત પ્રેમી સામે નોંધ્યો હતો ગુનો
  

અમદાવાદ શહેરની મહિલા પોલીસ કોન્સ્ટેબલે આપઘાત કર્યો હતો. જેમાં આજે મહિલા પોલીસ કોન્સ્ટેબલના પ્રેમીએ પણ આપઘાત કર્યો હોવાના સમાચાર મળી રહ્યાં છે. પાલડી પોલીસ સ્ટેશનની મહિલા કોન્સ્ટેબલની આત્મહત્યા બાદ તેના કથિત પ્રેમીએ પણ આત્મહત્યા કરી લીધી છે.

ખાનગી હોટેલમાં આત્મહત્યા કરી લીધી 

મળતી માહીત અનુસાર, આરોપી જશુ રાઠોડે ખાનગી હોટેલમાં આત્મહત્યા કરી લીધી છે. વાસણા પોલીસે કથિત પ્રેમી વિરુદ્ધ ગુનો દાખલ કર્યો હતો. એલિસબ્રિજમાં આવેલ હોટેલમાં ગળે ફાંસો ખાઈને આત્મહત્યા કરી લીધી છે. કોન્સ્ટેબલે આત્મહત્યા કરી ત્યારથી જશુ રાઠોડ ભૂગર્ભમાં ઉતરી ગયો હતો.

આત્મહત્યા પાછળ વીડિયો કોલ જવાબદાર

પાલડી પોલીસ સ્ટેશનમાં ફરજ બજાવતી મહિલા કોન્સ્ટેબલની આત્મહત્યા પાછળ વિડિયો કોલ જવાબદાર હોવાનું પોલીસ તપાસમાં સામે આવ્યું છે. જેને લઇને વાસણા પોલીસે સમગ્ર મામલે ગુનો નોંધી તપાસ હાથ ધરી છે. મહિલા કોન્સ્ટેબલે જ્યારે આત્મહત્યા કરી ત્યારે છેલ્લી વાર જસવંત સાથે વિડિયો કોલમાં વાત કરી હતી અને આત્મહત્યા બાદ જ્યારે પોલીસ ઘટનાસ્થળે પહોંચી તે સમયે પણ વિડિયોકોલ ચાલુ જ હતો. હાલ તો આરોપી ફરાર છે જેને ઝડપી પાડવા અમદાવાદ પોલીસે અલગ અલગ ટીમો બનાવીને વધુ તપાસ હાથ ધરી છે.

મહિલા કોન્સ્ટેબલે સ્યુસાઈડ નોટ લખી હતી

29 ફેબ્રુઆરીએ અમદાવાદ શહેરના વાસણા પોલીસ સ્ટેશનની હદમાં ભાડાના મકાનમાં રહેતી લલિતા પરમાર નામની મહિલા પોલીસ કોન્સ્ટેબલે આત્મહત્યા કરી હતી. જેની તપાસ કરતા વાસણા પોલીસને તેમના ઘરમાંથી મોબાઈલ ફોન અને એક સુસાઈડ નોટ મળી હતી. આ સુસાઈડ નોટમાં મહિલા કોન્સ્ટેબલે તેના પ્રેમીના કારણે આત્મહત્યા કરી હોવાનો ઉલ્લેખ કર્યો હતો. વધુમાં લલિતાએ સુસાઈડ નોટમાં તેનો પ્રેમી જસવંત રાઠોડ વિડિયો કોલ પર વાત કરવા તેમજ ફરજ પર હાજર હોય તે સમયે વારંવાર વિડિયો કોલ કરવા માટે જસવંત રાઠોડ દબાણ કરતો હોવાનો પણ ઉલ્લેખ સુસાઈડ નોટમાં કરેલો છે. મૃતક મહિલા કોન્સ્ટેબલ છેલ્લા 2 મહિનાથી પાલડી પોલીસ સ્ટેશનમાં ફરજ નિભાવતી હતી.