- નરેન્દ્ર મોદી સ્ટેડિયમમાં અઢી કલાક હાઈલેવલ સમીક્ષા બેઠકમાં નિર્ણય
- હોટેલ્સના ગેસ્ટ લિસ્ટ ચેક કરવા પોલીસને ગૃહમંત્રીના આદેશો
- ગૃહમંત્રીએ સિનિયર IPS ઓફિસરો સાથે હાઈલેવલ સમીક્ષા બેઠક યોજી
ભારત- પાકીસ્તાનની ક્રિકેટ ટીમ વચ્ચે શનિવારે અમદાવાદમાં નરેન્દ્ર મોદી સ્ટેડિયમમાં યોજનારી મેચ સંદર્ભે ગૃહમંત્રી હર્ષ સંઘવીએ બુધવારે અઢી કલાક સુધી રાજ્ય પોલીસ વડા વિકાસ સહાય સહિત સિનિયર IPS ઓફિસરો સાથે હાઈલેવલ સમીક્ષા બેઠક યોજી હતી. જેમાં તેમણે મેચ પૂર્ણ થયા પછીના બીજા દિવસ અર્થાત રવિવારની રાત સુધી રાજ્યના તમામ સંવેદનશીલ ક્ષેત્રોમાં કડક પોલીસ બંદોબસ્ત ગોઠવવા આદેશ કર્યો છે. તે માટે ગુરૂવારે દરેક જિલ્લા, મહાનગરોના પોલીસ અધિક્ષકો- કમિશનરોને યોજના બનાવીને અમલમાં મુકવા કહેવાયુ છે.
રવિવારથી નવરાત્રિનો આરંભ થઈ રહ્યો છે. બે દેશો વચ્ચેની ક્રિકેટ મેચને કારણે રાજ્યમાં જે કોઈ સંવેદનશીલ વિસ્તારો છે ત્યાં કાંકરીચાળો ન થાય તે ઉદ્દેશ્યથી ગૃહમંત્રીએ પોલીસને હોટેલ્સના ગેસ્ટ લિસ્ટ ચેક કરવા, જ્યાં બંને દેશોની ક્રિકેટ ટીમોનો ઉતારો છે, કિક્રેટરોની મુવમેન્ટ છે ત્યાં પણ દરેક માણસ પર નજર રાખવા સુચના આપી છે.
ડયૂટી પરના ઓફિસરો મેચ જોતા પકડાયા તો એક્શન !
નરેન્દ્ર મોદી સ્ટેડિયમની અંદર જેમને ડયુટી સોંપાઈ છે તેવા તમામ સ્તરના પોલીસ ઓફિસરો જો આ ક્રિકેટ મેચ જોતા પકડાયા તો તેમની સામે તત્કાળ શિસ્તભંગની કાર્યવાહી થશે. બેઠકમાં ગૃહમંત્રી હર્ષ સંઘવીએ ઉચ્ચ પોલીસ ઓફિસરોને કહ્યુ કે, સ્ટેડિયમમાં સબ ઈન્સ્પેક્ટર- PSIથી નીચેના પોલીસકર્મી પાસે મોબાઈલ ફોન હોવો જોઈએ નહી.
