ભારતમાં, લોરેન્સ બિશ્નોઈ અને તેની ગેંગની ચર્ચા દરેક જગ્યાએ થઈ રહી છે, પરંતુ દુનિયામાં એક એવું ગુનાહિત સિન્ડિકેટ છે જેની વાર્તા કોઈ હોલીવુડ ફિલ્મથી ઓછી નથી. જાપાનની યાકુઝા ગેંગ્સ. ખાસ કરીને, યામાગુચી-ગુમી ગેંગને વિશ્વના સૌથી જૂના અને સૌથી ખતરનાક ગુનાહિત સંગઠનોમાંની એક ગણવામાં આવે છે. આ ગેંગ દાયકાઓથી જાપાનના ગુનાખોરી જગત પર રાજ કરે છે. પરંતુ હવે આ ગેંગે તેના હરીફ સાથે વર્ષો જૂના યુદ્ધનો અંત લાવવાની જાહેરાત કરી છે.
જાપાનની સૌથી મોટી યાકુઝા ગેંગ, યામાગુચી-ગુમીએ તાજેતરમાં પોલીસ મુખ્યાલયની મુલાકાત લીધી અને એક પત્ર સુપરત કર્યો જેમાં તેમણે તેમના હરીફ કોબે યામાગુચી-ગુમી સાથેના આંતરિક સંઘર્ષનો અંત લાવવાનું વચન આપ્યું હતું. તેમણે ભવિષ્યમાં કોઈ મુશ્કેલી ઊભી નહીં કરવાની ખાતરી પણ આપી.આ લેટરને ગેંગના ત્રણ વરિષ્ઠ સભ્યો દ્વારા હ્યોગો પ્રીફેક્ચરલ પોલીસને સોંપવામાં આવ્યો હતો.
2015થી ચાલી રહી હતી લડાઈ
આ લડાઈ 2015 માં શરૂ થઈ હતી, જ્યારે યામાગુચી-ગુમીના ઘણા જૂથો અલગ થઈને કોબે યામાગુચી-ગુમીની રચના કરી હતી. આ પછી, જાપાનના ઘણા શહેરોમાં શેરીમાં ગોળીબાર, છરાબાજી અને હિંસાની ઘણી ઘટનાઓ નોંધાઈ હતી. આ સંઘર્ષોએ જાપાનમાં કાયદો અને વ્યવસ્થાને પડકાર ફેંક્યો અને પોલીસને બંને જૂથોને લડતી ગેંગ તરીકે જાહેર કરવાની ફરજ પડી, જેથી તેમના પર દેખરેખ અને નિયંત્રણો કાયદેસર રીતે કડક બનાવી શકાય.
યાકુઝા ગેંગની શક્તિ હવે પહેલા જેવી રહી નથી. 2024 માં જાપાનમાં સંગઠિત ગુનાખોરી ગેંગના મેમ્બર ઘટીને 18,800 થઈ ગઈ, જે પહેલી વાર 20,000 થી નીચે આવી ગયા. 2014 માં યામાગુચી-ગુમીના મેમ્બર 6000 હતા, જે હવે ઘટીને 3300 થઈ ગયા છે. તે જ સમયે, કોબે યામાગુચી-ગુમી પાસે ફક્ત 120 મેમ્બર બાકી છે.
હાલમાં એ સ્પષ્ટ નથી કે કોબે યામાગુચી-ગુમી આ યુદ્ધવિરામ પ્રસ્તાવ સાથે સંમત થયા છે કે નહીં. પોલીસ આના પર સતત નજર રાખી રહી છે. એવો ભય છે કે આ એકપક્ષીય ઘોષણા હોઈ શકે છે, જે કામચલાઉ શાંતિ પ્રદાન કરી શકે છે પરંતુ કાયમી ઉકેલ નહીં. જાપાનની રાષ્ટ્રીય પોલીસ એજન્સીએ પહેલાથી જ આ જૂથો દ્વારા કરવામાં આવેલી હિંસાને ગંભીર અને અણધારી ગણાવી છે.
