ગુજરાત IPS એસોસિએશનના પ્રમુખ તરીકે અમદાવાદ કમિશનરની નિયુકિત
આઠમાં પગાર પંચ અંગેનો રિપોર્ટ તૈયાર કરી સરકારમાં મૂકાશે : પેટા સમિતિની રચના કરાશે
અગ્ર ગુજરાત, ગાંધીનગર
ગુજરાતના IPS એસોસિએશનના ગુજરાત ચેપ્ટરની એક મહત્વની બેઠક યોજાઈ હતી. આ બેઠકમાં ગાંધીનગર અને અમદાવાદના ઉચ્ચ પોલીસ અધિકારીઓ પ્રત્યક્ષ હાજર રહ્યા હતા, જ્યારે રાજ્યના અન્ય જિલ્લાઓના અધિકારીઓએ વીડિયો કોન્ફરન્સિંગ દ્વારા હાજરી આપી હતી. બેઠકમાં એસોસિએશનના નવા પદાધિકારીઓની વરણી અને પડતર પ્રશ્નો અંગે ચર્ચા કરવામાં આવી હતી.
બેઠકમાં અમદાવાદના પોલીસ કમિશનર જી.એસ. મલિકને સર્વાનુમતે પ્રમુખ તરીકે અને પીયૂષ પટેલને ઉપપ્રમુખ તરીકે ચૂંટવામાં આવ્યા હતા. આ ઉપરાંત, સેક્રેટરી તરીકે નિપુણા એમ. તોરાવણે અને ખજાનચી તરીકે એન.એન. ચૌધરીની નિમણૂક કરવામાં આવી છે. અશોક યાદવ, લવિના સિંહા, રવિ તેજા અને આયુષ જૈન સહિતના અધિકારીઓને કારોબારી સમિતિના સભ્ય તરીકે સ્થાન મળ્યું છે.
આ બેઠકમાં ખાસ કરીને 8મા પગાર પંચ સમક્ષ કરવાની થતી રજૂઆત અંગે વિગતવાર ચર્ચા કરવામાં આવી હતી. એસોસિએશને આ મુદ્દે એક વિગતવાર નોંધ તૈયાર કરવા માટે ખાસ ‘પેટા સમિતિ’ની રચના કરવાનો નિર્ણય લીધો છે. આ સમિતિ અધિકારીઓના વેતન અને ભથ્થા સંબંધિત પ્રશ્નોનો ડ્રાફ્ટ તૈયાર કરી સરકાર સમક્ષ રજૂ કરશે.
ઉપરાંત IPS એસોસિએશનનું એક્સ (ટ્વિટર) હેન્ડલ શરૂ કરવા કવાયત શરૂ કરવામાં આવી છે. આ ઉપરાંત સોશિયલ મીડિયા પર IPS અધિકારીઓ વિરુદ્ધ થતાં આધારહીન અને બિનઆધારભૂત આક્ષેપો સામે કાર્યવાહી કરવા અને સંબંધિત અધિકારીઓને સમર્થન આપવા નિર્ણય લેવાયો હતો.
એસોસિએશનની નવી કાર્યકારી સમિતિમાં પ્રમુખ તરીકે જી.એસ. મલિક, ઉપપ્રમુખ તરીકે પીયૂષ પટેલ, સચિવ તરીકે નિપુણા એમ. તોરાવણે અને ખજાનચી તરીકે એન.એન. ચૌધરી રહેશે. જ્યારે એક્ઝિક્યુટિવ કમિટીના સભ્યોમાં ગગનદીપ ગાંભીર, અશોક યાદવ, વિરેન્દ્ર યાદવ, વિશાલ વાઘેલા, સુનિલ જોષી, કરણરાજ વાઘેલા, પર્થરાજ ગોહિલ, રવિતેજા વસામશેટ્ટી, રાજેશ ગઢિયા, રાજદીપસિંહ ઝાલા, ઓમપ્રકાશ જાટ, વિશાખા ડબરાલ, લવિના સિન્હા અને આયુષ જૈનનો સમાવેશ થાય છે.
