UGCના નવા નિયમ પર સુપ્રિમનો સ્ટે નવો ડ્રાફટ તૈયાર કરવા આદેશ
દેશભરમાં ઉઠેલા વિરોધ બાદ પરિપત્રની અમલવારી સ્થગિત કરાઇ : જોગવાઇનો દુરૂપયોગ થવાની ટકોર
અગ્ર ગુજરાત, નવી દિલ્હી
સુપ્રીમ કોર્ટે યુનિવર્સિટી ગ્રાન્ટ્સ કમિશન (UGC)ના નવા નિયમો પર આગામી આદેશ સુધી સ્થગિત કર્યા છે. CJI સૂર્યકાંત અને જસ્ટિસ જોયમાલ્યાની બેન્ચે કહ્યું કે આની જોગવાઈઓ અસ્પષ્ટ છે અને તેનો દુરુપયોગ થઈ શકે છે. સુપ્રીમ કોર્ટે કેન્દ્ર સરકારને નિયમોનો ડ્રાફ્ટ ફરીથી તૈયાર કરવાનો નિર્દેશ આપ્યો છે. CJI સૂર્યકાંતે કેન્દ્રને પૂછ્યું, “આપણે જાતિવિહીન સમાજની દિશામાં કેટલું હાંસલ કર્યું છે? શું હવે આપણે ઉલટી દિશામાં ચાલી રહ્યા છીએ?”
અહીં, દેશભરમાં સવર્ણ જાતિના વિદ્યાર્થીઓ અને સામાન્ય નાગરિકોનો યુનિવર્સિટી ગ્રાન્ટ્સ કમિશન (UGC)ના નવા નિયમોને લઈને વિરોધ ચાલુ છે. ગુરુવારે દિલ્હી યુનિવર્સિટીના નોર્થ કેમ્પસની બહાર વિદ્યાર્થીઓએ વિરોધ પ્રદર્શન કર્યું.
ઉત્તર પ્રદેશની લખનઉ યુનિવર્સિટીના ન્યૂ કેમ્પસમાં વિવિધ વિદ્યાર્થી સંગઠનો સાથે જોડાયેલા વિદ્યાર્થીઓ સૂત્રોચ્ચાર કરતા રસ્તા પર બેસી ગયા. વિદ્યાર્થીઓનો હોબાળો ચાલુ છે. ઘટનાસ્થળે મોટી સંખ્યામાં પોલીસ બળ તહેનાત છે. કાનપુરમાં ભરત શુક્લા નામના એક વ્યક્તિએ UGCના વિરોધમાં માથું મુંડાવીને અનોખો વિરોધ પ્રદર્શન કર્યો. આ તરફ, તમિલનાડુના મુખ્યમંત્રી એમકે સ્ટાલિને UGCના નવા નિયમોનું સમર્થન કરતા કેન્દ્રની પ્રશંસા કરી છે. સ્ટાલિને સોશિયલ મીડિયા પ્લેટફોર્મ X પર લખ્યું – UGC નિયમ 2026 ભલે મોડું ઉઠાવેલું પગલું હોય, પરંતુ ભેદભાવ અને ઉદાસીનતામાં ડૂબેલી ઉચ્ચ શિક્ષણ પ્રણાલીમાં સુધારાની દિશામાં સારો નિર્ણય છે.
