યુક્રેનના રાષ્ટ્રપતિ વ્લાદિમીર ઝેલેન્સકીએ અમેરિકાને સ્પષ્ટ કરી દીધું છે કે તેઓ તેમની પીઠ પાછળ થયેલા શાંતિ કરારને સ્વીકારશે નહીં. તેમણે મ્યુનિક સમિટમાં આ વાત કહી, જ્યાં યુએસ ઉપરાષ્ટ્રપતિએ પણ ભાગ લીધો હતો. ઝેલેન્સકીએ યુરોપને પોતાની સુરક્ષા માટે પોતાની સેના બનાવવાની પણ અપીલ કરી. તેમનું આ નિવેદન અમેરિકી રાષ્ટ્રપતિ ડોનાલ્ડ ટ્રમ્પની અનેક ચેતવણીઓ બાદ આવ્યું છે.
યુરોપની પોતાની સેના બનાવવા અંગે યુક્રેનિયન રાષ્ટ્રપતિએ કહ્યું કે આ કાર્ય માટે એકલા યુક્રેનિયન સેના પૂરતી નથી. યુક્રેન ક્યારેય આપણી પીઠ પાછળ થયેલા સોદાઓને સ્વીકારશે નહીં, અને આ જ નિયમ બધા યુરોપિયન દેશો પર લાગુ થવો જોઈએ તેમ તેમણે કહ્યું હતું.
ટ્રમ્પે પુતિન સાથે ફોન પર વાત કરી
ડોનાલ્ડ ટ્રમ્પે તાજેતરમાં રશિયન રાષ્ટ્રપતિ વ્લાદિમીર પુતિન સાથે યુદ્ધ સમાપ્ત કરવા અંગે ફોન પર વાતચીત કરી હતી. ફેબ્રુઆરી 2022 માં યુક્રેન પર રશિયાના હુમલા પછી આ વાતચીત પહેલી હતી. ટ્રમ્પ અને પુતિન વચ્ચેની આગામી સંભવિત બેઠક અંગે યુરોપ અને અમેરિકાના સાથીઓમાં ચિંતા વધી રહી છે, જ્યાં યુક્રેન યુદ્ધના અંત અંગે ચર્ચા કરવામાં આવશે.
પુતિન ટ્રમ્પને રશિયા બોલાવી શકે
યુક્રેને વારંવાર કહ્યું છે કે તે અમેરિકા અને યુરોપ સાથે મળીને સંયુક્ત રણનીતિ બનાવવા માંગે છે. જેની સ્થાપના પુતિન-ટ્રમ્પની બેઠક પહેલા કરવા અંગે જોર આપ્યુ છે. ઝેલેન્સકીએ એવી પણ આગાહી કરી હતી કે પુતિન 9 મેના રોજ મોસ્કોમાં યોજાનાર સમારોહમાં ટ્રમ્પને આમંત્રણ આપી શકે છે. આ દિવસે રશિયા બીજા વિશ્વયુદ્ધમાં સોવિયેતની જીતની ઉજવણી કરે છે.
ઝેલેન્સકીની યુરોપિયન નેતાઓને અપીલ
યુરોપિયન નેતાઓને સંબોધતા ઝેલેન્સકીએ સંભવિત પડકારો વિશે ચેતવણી આપવાનો પ્રયાસ કર્યો. તેમણે પ્રશ્ન કર્યો કે જો મોસ્કો ખુલ્લો કે “ફોલ્સ ફ્લેગ” હુમલો કરે તો શું તેમના સશસ્ત્ર દળો તૈયાર છે. તેમણે કહ્યું કે હવે જ્યારે આપણે આ યુદ્ધ લડી રહ્યા છીએ અને શાંતિ અને સુરક્ષાનો પાયો નાખી રહ્યા છીએ, ત્યારે આપણે યુરોપના સશસ્ત્ર દળોનું નિર્માણ કરવું જોઈએ.
