ઊનાના વાસોજમાં ત્રણ પાડોશી શખ્સોએ ફોટા-ઓડિયો વાયરલ કરવાની ધમકી આપતા ગર્ભવતી મહિલાનો આપઘાત

એક તો ભાજપ સોશ્યલ મીડિયાનો કાર્યકર : મૃતક અને આરોપી વચ્ચે થયેલી વ્હોટસએપ કબ્જે કરાઇ

ઊનાના વાસોજમાં ત્રણ પાડોશી શખ્સોએ ફોટા-ઓડિયો વાયરલ કરવાની ધમકી આપતા ગર્ભવતી મહિલાનો આપઘાત

આબરૂ જવાની બીકે ગળફાંસો ખાઇ લીધો : ત્રણ માસૂમ પુત્રીએ માતાની છત્રછાંયા ગુમાવી

અગ્ર ગુજરાત, ઊના

ગીર સોમનાથ જિલ્લાના ઉના તાલુકાના વાંસોજ ગામે એક હ્રદયદ્વાવક ઘટના સામે આવી છે. પડોશમાં રહેતા ત્રણ માથાભારે શખસ દ્વારા ફોટા અને ઓડિયો રેકોર્ડિંગ વાઇરલ કરવાની ધમકી અપાતા,એક પરણિતા એ આબરૂ જવાની બીકે ફાંસો ખાઈ જીવનટૂંકાવ્યું છે. આ ઘટનામાં ચોંકાવનારી વિગત એ છે કે, મૃતક મહિલા ગર્ભવતી હતી અને તેમની ત્રણ માસૂમ પુત્રીએ માતાની છત્રછાયા ગુમાવી છે.

વાંસોજ ગામે રહેતા ભુપતભાઈ સોલંકી અને તેમના પત્ની ભાવનાબેન પોતાની ત્રણ પુત્રી સાથે શાંતિપૂર્ણ જીવન જીવી રહ્યા હતા. જોકે, તેમના પડોશમાં રહેતા ધીરુ જીવા બારૈયા, ઉમેશ જીવા બારૈયા અને સંજય જીવા બારૈયા નામના ત્રણ શખસ છેલ્લા બે મહિનાથી ભાવનાબેનને માનસિક ત્રાસ આપી રહ્યા હતા. આરોપી ઉમેશ પાસે ભાવનાબેનના કેટલાક ફોટા અને રેકોર્ડિંગ હોવાનું કહી તેને વાઇરલ કરવાની સતત ધમકીઓ આપતો હતો.

ગત તારીખ 24ના રોજ રાત્રિના આશરે 10:30 વાગ્યે, જ્યારે ભુપતભાઈ અને ભાવનાબેન ઘરે હતા અને તેમની પુત્રીઓ સુઈ ગઈ હતી, ત્યારે આ ત્રણેય શખસ તેમના ઘરે ધસી આવ્યા હતા. આરોપીઓએ દંપતીને ઘરની બહાર બોલાવી જાહેરમાં અપમાનિત કર્યા હતા અને ધમકી આપી હતી કે, તમે જોઈ લેજો, તમારી ઈજ્જત અને આબરૂ અમે કાઢી નાખીશું આ ધમકીથી ગભરાયેલા ભાવનાબેને પોતાની સામાજિક પ્રતિષ્ઠા ખરડાશે તેવા ડરથી બાજુના રૂમમાં જઈ પંખા સાથે લટકી ફાંસો ખાઈ લીધો હતો.ભાવનાબેને આત્મહત્યા જેવું આત્યંતિક પગલું ભરતા પહેલાં રાત્રે 11:47 વાગ્યે પોતાના મોબાઈલ સ્ટેટસમાં પોતાની દીકરી સાથેનો ફોટો મૂક્યો હતો. આ સ્ટેટસ કદાચ તેમની છેલ્લી સંવેદના હતી.

ઘટનાની જાણ થતા જ નવાબંદર પોલીસ કાફલો ઘટના સ્થળે દોડી ગયો હતો. મૃતકના પતિ ભુપતભાઈએ ત્રણેય આરોપી વિરુદ્ધ મરવા મજબૂર કરવા બદલ ફરિયાદ નોંધાવી છે. પોલીસે ત્વરિત કાર્યવાહી કરી ત્રણેય આરોપીની ધરપકડ કરી લીધી છે. એફ. એસ.એલ.ની ટીમે ઘટનાસ્થળે પહોંચી પુરાવા એકત્ર કર્યા છે.PSI એમ.એ. રાઠોડના જણાવ્યા અનુસાર, મૃતક અને આરોપી વચ્ચે થયેલી વ્હોટ્સએપ ચેટ કબજે કરવામાં આવી છે. આરોપીઓના મોબાઈલ ફોન પણ એફ.એસ.એલ.માં મોકલવામાં આવ્યા છે જેથી ડિલીટ કરેલા રેકોર્ડિંગ અને ડેટા રિકવર કરી શકાય.

પોલીસની ખોટી અરજી કરી દબાણ બનાવ્યું

તપાસમાં એવું પણ બહાર આવ્યું છે કે આરોપી ઉમેશે અગાઉ પોલીસમાં ખોટી અરજી કરી હતી કે ભુપત ભાઈએ તેની પાસેથી 50 હજાર રૂપિયા લીધા છે. આ બાબતે દંપતી પોલીસ સ્ટેશનમાં જવાબ આપવા પણ ગયું હતું. આરોપીના પરિવારના સભ્યોએ પણ અગાઉ ઘરે આવીને ભાવનાબેન ને ઠપકો આપી માનસિક રીતે તોડી નાખવાનો પ્રયાસ કર્યો હતો.

સામાજિક પ્રતિષ્ઠા ખરડાશે તેવા ડરથી આ રૂમમાં જઈ પંખે લટકી ફાંસો ખાધો

ભાવનાબેન એ સામાજિક પ્રતિષ્ઠા ખરડાશે તેવા ડરથી ફાંસો ખાધો હતો 50 હજાર રૂપિયા લીધા હોવાની ખોટી અરજી અને ફોટા-ઓડિયો રેકોર્ડિંગ વાઈરલ કરવાની ધમકીને તેના કારણે મારી પત્ની ભાવનાએ આ પગલું ભર્યું હોવાનું મૃતક મહિલા ના પતિ ભુપતભાઈ સોલંકી એ જણાવ્યું હતું