સંયુક્ત રાષ્ટ્રની ભારતના અર્થતંત્ર પર મોટી ભવિષ્યવાણી, 2023-2024ની સ્થિતિને લઈને બહાર પાડ્યો ડેટા

નવી દિલ્હી, તા.05 ઓક્ટોબર-2023, ગુરુવાર

ભારતની અર્થવ્યવસ્થા (Indian Economy)ની 2023 અને 2024ની સ્થિતિ અંગે સંયુક્ત રાષ્ટ્રની ટ્રેડ બૉડી અંકટાડે મહત્વનો ડેટા બહાર પાડ્યો છે. ડેટામાં ભારતની અર્થવ્યવસ્થાની મજબુત સ્થિતિ દર્શાવવાની સાથે 3 ચિંતાજનક બાબતોનો પણ ઉલ્લેખ કરાયો છે. ડેટા મુજબ ભારતની અર્થવ્યવસ્થા વિશ્વમાં હરણફાળ ગતિએ વૃદ્ધિ કરી રહી છે. આ વર્ષે પણ દેશની અર્થવ્યવસ્થા મજબુત થવાની છે. ભારતની અર્થવ્યવસ્થાને લઈ વર્લ્ડ બેંકે (World Bank) વિશ્વાસ વ્યક્ત કર્યા બાદ સંયુક્ત રાષ્ટ્રની ટ્રેડ બૉડી અંકટાડે પણ વિશ્વાસ વ્યક્ત કર્યો છે. અંકડાટે ભારતના આર્થિક વૃદ્ધિ દર (Growth Rate)નું અનુમાન વધારી દીધું છે, ઉપરાંત વૈશ્વિક સ્તરે વૃદ્ધિ દર સુસ્ત પડવાની પણ ચિંતા વ્યક્ત કરાઈ છે.

ભારતની અર્થવ્યવસ્થા 6.6 ટકાની ઝડપે આગળ વધશે : અંકડાટ

સંયુક્ત રાષ્ટ્ર કોન્ફરન્સ ઓન ટ્રેડ એન્ડ ડેવલપમેન્ટે ( UN Conference on Trade and Development – UNCTAD) વેપાર અને વિકાસ પર રિપોર્ટ જાહેર કર્યો છે. રિપોર્ટમાં અંકડાટે ભારતના આર્થિક વૃદ્ધિ દરના અનુમાનને વધારી દીધો છે. અંકડાટના અનુમાન મુજબ વર્ષ 2023માં ભારતની અર્થવ્યવસ્થા 6.6 ટકાની ઝડપે આગળ વધી શકે છે. અગાઉ અંકડાટે 6 ટકાનું અનુમાન દર્શાવ્યું હતું. ઉપરાંત ડેટામાં 3 ચિંતાજનક બાબતોનો પણ ઉલ્લેખ કરાયો છે, જેમાં વર્ષ 2024માં ભારતનો આર્થિક વૃદ્ધિ દર ઘટીને 6.2 ટકા પર આવવાની સંભાવના વ્યક્ત કરી છે, ઉપરાંત બેરજગારી અને અસમાનતા અંગે પણ ચિંતા વ્યક્ત કરી છે.

વૈશ્વિક અર્થવ્યવસ્થા ગગડશે

અંકટાડે વૈશ્વિક અર્થવ્યવસ્થા માટે આ વર્ષ સુસ્ત રહેવાની સંભાવના વ્યક્ત કરી છે. વર્ષ 2023માં વિશ્વનો આર્થિક વૃદ્ધિ દર ઘટીને 2.4 ટકા પર આવી શકે છે. જોકે આમાં આગામી વર્ષ 2024માં વધારો થઈ 2.5 ટકા પર પહોંચી શકે છે.

વર્લ્ડ બેંકે પણ ભારતીય અર્થવ્યવસ્થા પર કર્યો વિશ્વાસ

અંકડાટના ડેટાના એક દિવસ પહેલા વર્લ્ડ બેંકે પણ ભારતીય અર્થવ્યસ્થા પર વિશ્વાસ વ્યક્ત કર્યો હતો. વર્લ્ડ બેંકે વર્ષ 2023-24 એટલે કે એપ્રીલ-2023 અને માર્ચ-2024 દરમિયાન ભારતનો આર્થિક વૃદ્ધિ દર 6.3 ટકા રહેવાની સંભાવના વ્યક્ત કરી હતી. નાણાંકીય વર્ષ 2022-23માં ભારતનો આર્થિક વૃદ્ધિ દર 7.2 ટકા રહી શકે છે.