હજ-ઉમરા સંમેલનમાં ભાગ લેવા કેન્દ્રીયમંત્રી સ્મૃતિ ઈરાની પહોંચ્યા સાઉદી અરબ

• ત્રીજા હજ અને ઉમરા સંમેલનના ઉદ્ઘાટનમાં ભાગ લીધો 
• મક્કાના ડેપ્યુટી ગવર્નર સાથે કરી વ્યાપારિક મુલાકાત 
• હજ-2024માં મુસાફરોની સુવિધાને લઈને ચર્ચા પણ કરી 

લઘુમતી બાબતોના મંત્રી સ્મૃતિ ઈરાની અને વિદેશ રાજ્ય મંત્રી વી મુરલીધરન હાલ સાઉદી અરબની મુલાકાતે છે. આ દરમિયાન સ્મૃતિ ઈરાનીએ મંગળવારે ત્રીજા હજ અને ઉમરા સંમેલનના ઉદ્ઘાટનમાં ભાગ લીધો હતો. તેની સાથે જ તેમણે મક્કા ક્ષેત્રના લેફ્ટનન્ટ ગવર્નર અને હજ અને ઉમરા મંત્રી સાથે વધુ સારા સહકાર માટે વધુ શક્યતાઓ પર ચર્ચા કરી. વિદેશ રાજ્ય મંત્રી વી મુરલીધરન પણ હાજર હતા.

લઘુમતી બાબતોના મંત્રાલયે એક નિવેદનમાં આ અંગે માહિતી આપતા જણાવ્યું છે કે ઉમરા કોન્ફરન્સના ઉદ્ઘાટન સત્રમાં શ્રેષ્ઠ વૈશ્વિક પ્રથાઓ પર વિચારો અને માહિતીની આપ-લે જોવા મળી હતી. આ ભારતીય યાત્રાળુઓ માટે હજના અનુભવને સુધારવામાં ઉપયોગી સાબિત થશે. નિવેદનમાં એમ પણ કહેવામાં આવ્યું છે કે હજ 2024 દરમિયાન ભારતીય યાત્રાળુઓ માટે સુવિધાઓ અને સેવાઓમાં સુધારો કરવા સહિત ગાઢ સહકારના અવકાશ અંગે મક્કા ક્ષેત્રના લેફ્ટનન્ટ ગવર્નર અને હજ અને ઉમરા મંત્રી સાથે પણ ચર્ચા કરવામાં આવી હતી.

સ્મૃતિ ઈરાનીએ પોસ્ટ કરીને આપી માહિતી

લઘુમતી બાબતોના મંત્રી સ્મૃતિ ઈરાનીએ પણ તેમની મુલાકાત અંગે ટ્વિટર પર ટ્વિટ કર્યું હતું. જેમાં તેમણે આમંત્રણ માટે સાઉદી હજ અને ઉમરા બાબતોના મંત્રાલયનો આભાર માન્યો હતો. તેમણે એમ પણ લખ્યું હતું કે તેમણે મક્કા ક્ષેત્રના ડેપ્યુટી ગવર્નર એચઆરએચ પ્રિન્સ સઉદ બિન મિશાલ બિન અબ્દુલ અઝીઝ અલ સાઉદ સાથે વ્યવહારિક મુલાકાત કરી હતી. આ દરમિયાન, હજ 2024 દરમિયાન ભારતીય હજ યાત્રાળુઓ માટે સુવિધાઓ અને સેવાઓ વધારવા માટે ચર્ચા કરવામાં આવી હતી.