આવતા સોમવાર સુધીમાં ગાઝામાં થશે સીઝફાયર, ઈઝરાયેલ-હમાસ યુદ્ધને લઈને બાઈડેનનું નિવેદન

• ઈઝરાયેલ-હમાસમાં જલ્દી થઈ શકે છે યુદ્ધવિરામ
  
• બંને પક્ષ સીઝફાયર ડીલની નજીક-બાઈડેન
  
• સીઝફાયરને લઈને તારીખની કોઈ સ્પષ્ટતા નહીં
  

અમેરિકાના રાષ્ટ્રપતિ જો બાઈડેનને આશા છે કે ગાઝા પટ્ટીમાં ઈઝરાયેલ અને હમાસ વચ્ચે ચાલી રહેલું યુદ્ધ ટૂંક સમયમાં બંધ થઈ જશે. અમેરિકી રાષ્ટ્રપતિએ કહ્યું કે તેમને આશા છે કે આગામી સોમવાર સુધીમાં ઈઝરાયેલ અને હમાસ વચ્ચે યુદ્ધવિરામ થઈ શકે છે. તેમણે સ્વીકાર્યું કે બંને પક્ષો યુદ્ધવિરામ કરારની નજીક છે. ગાઝામાં યુદ્ધવિરામના પ્રશ્ન પર બાઈડેને કહ્યું, મારા રાષ્ટ્રીય સુરક્ષા સલાહકારે મને કહ્યું છે કે અમે તેની ખૂબ જ નજીક છીએ અને મને આશા છે કે આવતા સોમવાર સુધીમાં યુદ્ધવિરામ થઈ જશે. તેમણે એમ પણ કહ્યું કે અમે તેની નજીક છીએ પરંતુ તે હજુ પૂર્ણ થયું નથી. આના પર હજુ અંતિમ મહોર બાકી છે.

યુદ્ધ વિરામને લઈને પેરિસમાં યોજાઈ બેઠક

યુદ્ધવિરામને લઈને અમેરિકા, ઈજિપ્ત અને ઈઝરાયેલના ગુપ્તચર વડાઓ અને કતારના વડાપ્રધાન વચ્ચે પેરિસમાં બેઠક યોજાઈ છે. મળી રહેલી માહિતી અનુસાર આ બેઠક પછી, બાઈડેન પ્રશાસનના એક વરિષ્ઠ અધિકારીએ કહ્યું કે હમાસ ઇઝરાયલી દળોને સંપૂર્ણ રીતે પાછા ખેંચવાનો આગ્રહ કરી રહ્યું છે, જે યુદ્ધવિરામમાં સૌથી મોટો અવરોધ હતો. આ મુખ્ય અવરોધ ઉકેલાઈ ગયો છે. સોદાના પ્રથમ તબક્કા માટે હમાસે તેની સ્થિતિ નરમ કરી છે. જેના કારણે યુદ્ધવિરામની આશા છે.

આ કરાર અનેક તબક્કામાં લાગુ કરવામાં આવશે

હમાસ અને ઈઝરાયેલ વચ્ચે યુદ્ધવિરામ કરાર અનેક તબક્કામાં લાગુ કરવામાં આવશે. ઇઝરાયેલ અને હમાસ છ અઠવાડિયાના યુદ્ધવિરામ કરારમાં બંધકોને મુક્ત કરશે. હમાસ દ્વારા 40 ઈઝરાયેલી બંધકોને મુક્ત કરવામાં આવશે. ઇઝરાયેલ તેની જેલમાં બંધ સેંકડો પેલેસ્ટાઈન કેદીઓને પણ મુક્ત કરશે. વધુમાં, કેટલાક પેલેસ્ટિનિયનોને ઉત્તરી ગાઝામાં પાછા ફરવાની મંજૂરી આપવામાં આવશે અને માનવતાવાદી સહાયમાં પણ વધારો કરવામાં આવશે. હમાસ અને ઈઝરાયેલ તરફથી હજુ સુધી યુદ્ધવિરામ પર સત્તાવાર નિવેદન જારી કરવામાં આવ્યું નથી.

ઈઝરાયેલના 134 બંધકો હમાસની કેદમાં

અગાઉ હમાસે યુદ્ધવિરામ પ્રસ્તાવને ફગાવી દીધો હતો. હમાસે કોઈપણ વાટાઘાટો થાય તે પહેલા યુદ્ધને સંપૂર્ણ રીતે અટકાવવાની અને ગાઝામાંથી ઈઝરાયેલી સૈનિકોને સંપૂર્ણ પાછી ખેંચવાની માંગ કરી હતી. જોકે, હવે એ વાત સામે આવી રહી છે કે તેઓ દોઢ મહિનાના યુદ્ધવિરામ માટે રાજી થયા છે. હમાસ હજુ પણ ગાઝામાં લગભગ 100 ઈઝરાયેલી બંધકો હોવાનો દાવો કરે છે. ઈઝરાયેલના જણાવ્યા અનુસાર તેના 134 બંધકો હમાસની કેદમાં છે.