- ઈઝરાયેલના નેતાઓએ ઈમરજન્સી વોર કેબિનેટની રચના કરી
- ભૂમધ્ય સાગરમાં અમારો કાફલો પહોંચી ગયો છે, ચાલાકી નહિ: USA
- ઇઝરાયલે કરી છે હમાસનું અસ્તિત્વ ખતમ કરી નાખવાની પ્રતિજ્ઞા
ઇઝરાયલ અને હમાસ વચ્ચે છેલ્લા 6 દિવસથી ભીષણ યુદ્ધ ચાલી રહ્યું છે છે. ઇઝરાયેલ ગાઝા પટ્ટીમાં હમાસના ઠેકાણાઓ પર સતત એરસ્ટ્રાઈક કરી રહ્યું છે. આ દરમિયાન અમેરિકી રાષ્ટ્રપતિ જો બાઈડેને બુધવારે ઈરાનને કડક સ્વરમાં ચેતવણી આપી છે કે તે હમાસ અને ઈઝરાયેલ વચ્ચેના સંઘર્ષમાં સામેલ ન થાય. બીજી તરફ ઈઝરાયેલના નેતાઓએ સંયુક્ત મોરચો રજૂ કરવા ઈમરજન્સી વોર કેબિનેટની રચના કરી છે.
શનિવારે, હમાસે ગાઝા પટ્ટીમાંથી ઇઝરાયેલ પર હજારો રોકેટ છોડ્યા હતા. એટલું જ નહીં, હમાસના આતંકીઓ ઈઝરાયેલના સરહદી વિસ્તારોમાં ઘૂસી ગયા હતા અને સામાન્ય નાગરિકો પર હુમલો કર્યો હતો. આ હુમલાઓમાં 1200 લોકો માર્યા ગયા હતા. જ્યારે 2700 થી વધુ ઘાયલ થયા છે. હમાસે ઘણા ઇઝરાયલી નાગરિકોને બંધક પણ બનાવ્યા હતા. જેના જવાબમાં ઈઝરાયેલના જેટ છેલ્લા ચાર દિવસથી ગાઝા પટ્ટી પર બોમ્બમારો કરી રહ્યા છે.
બાઈડેને ઈરાનને આપી ચેતવણી
યુએસ પ્રમુખ બાઈડેને ઇઝરાયલને સમર્થન આપવાની સાથે, અમેરિકનો સહિત કેદીઓને મુક્ત કરવાની ખાતરી કરવા અને વ્યાપક યુદ્ધ ફાટી નીકળતા અટકાવવા માટે વિદેશ મંત્રી એન્ટની બ્લિંકનને ઇઝરાયેલ મોકલ્યા છે. બાઈડેને બુધવારે વોશિંગ્ટનમાં યહૂદી નેતાઓ સાથે બેઠક પણ કરી હતી. આ દરમિયાન, તેમણે કહ્યું હતું કે ઇઝરાયેલ નજીક મોકલવામાં આવેલ અમેરિકન વિમાનો અને લશ્કરી જહાજોની તૈનાતીને ઇરાન માટે સંકેત તરીકે જોવું જોઈએ, જે ઇસ્લામિક જૂથો હમાસ અને લેબનોનના હિઝબુલ્લાહનું સમર્થન કરે છે.
બાઈડેને કહ્યું કે હમાસનો આ હુમલો ક્રૂરતાનું અભિયાન છે. આ માત્ર નફરત નહીં, પરંતુ, યહૂદી લોકો વિરુદ્ધ શુદ્ધ ક્રૂરતા છે. તેમણે કહ્યું, અહી યહૂદીઓ માટે સૌથી ઘાતક દિવસ હતો. અમે ઇઝરાયલી સુરક્ષા દળોને સૈન્ય સહાયતા વાહદારી રહ્યા છે જેમાં આયરણ ડોમને ફરીથી ભરવા માટે દારૂગોળો સામેલ છે. અમે અમેરિકન કેરિયર કાફલાને પૂર્વીય ભૂમધ્ય સમુદ્રમાં તૈનાત કર્યા છે. અમે તે વિસ્તારમાં વધુ ફાઈટર પ્લેન મોકલી રહ્યા છીએ અને ઈરાનીઓને આ સ્પષ્ટ કરી દીધું છે કે તેઓ સાવધાન રહે.
આ પહેલા બુધવારે અમેરિકન સૂત્રોએ જણાવ્યું હતું કે ઈરાન કદાચ જાણતું હતું કે હમાસના આતંકવાદીઓ ઈઝરાયેલ વિરુદ્ધ ઓપરેશનની યોજના બનાવી રહ્યા છે. પરંતુ પ્રારંભિક યુએસ ગુપ્તચર અહેવાલો દર્શાવે છે કે કેટલાક ઈરાની નેતાઓ ગાઝાથી હમાસના અચાનક હુમલાથી ચોંકી ગયા હતા.
હમાસનું અસ્તિત્વ ખતમ કરી નાખીશું: ઇઝરાયેલ
ગાઝા વહીવટી તંત્રએ માહિતી આપી હતી કે ઈઝરાયેલના હવાઈ હુમલામાં 1100 લોકોના મોત થયા છે. જ્યારે 5000થી વધુ લોકો ઘાયલ થયા છે. લગભગ 535 રહેણાંક ઈમારતો ધ્વસ્ત થઈ ગઈ છે, લગભગ 2.5 લાખ લોકો બેઘર થયા છે.
બીજી તરફ ઈઝરાયેલે પણ હમાસ પર જમીની હુમલાની તૈયારી કરી લીધી છે. ઈઝરાયેલે ગાઝા નજીક ટેન્ક અને બખ્તરબંધ વાહનો તૈનાત કર્યા છે. ઇઝરાયેલના સંરક્ષણ પ્રધાન યોવ ગૈલેંટે બુધવારે હમાસની તુલના ઇસ્લામિક સ્ટેટ સાથે કરી હતી અને કહ્યું હતું કે તેનું અસ્તિત્વ ખતમ થઈ જશે. હમાસ નામની આ વસ્તુને અમે ધરતી પરથી ભૂંસી નાખીશું.
