ઉત્તર પ્રદેશના બહરાઈચ જિલ્લામાં એક મોટી દુર્ઘટના બની છે. બુધવારે સાંજે સુજૌલી પોલીસ સ્ટેશન વિસ્તાર હેઠળના ભરતપુરમાં કૌડિયાલા નદીમાં એક હોડી પલટી ગઈ. અકસ્માત સમયે તેમાં લગભગ 20થી વધુ લોકો સવાર હતા. અત્યાર સુધીમાં ચાર લોકોને સુરક્ષિત રીતે બચાવી લેવામાં આવ્યા છે.
બુધવારે સાંજે લોકો હોડીમાં ઘરે પરત ફરી રહ્યા હતા
અન્ય લોકોની હજુ સુધી જાણકારી મેળવી શકાઈ નથી. હોડી પલટી જવાની માહિતી મળતાં NDRF અને SDRF ટીમોને તાત્કાલિક રાહત અને બચાવ કામગીરી માટે ઘટનાસ્થળે મોકલવામાં આવી છે. લખનૌમાં પોલીસ મુખ્યાલયના વરિષ્ઠ અધિકારીઓ જિલ્લા પોલીસ વહીવટીતંત્ર સાથે સંપર્ક જાળવી રાખીને રાહત અને બચાવ કામગીરી પર નજર રાખી રહ્યા છે. તમને જણાવી દઈએ કે બહરાઇચ જિલ્લો નેપાળ સાથે પણ સરહદ ધરાવે છે. ભરતપુર ગામ ભારત-નેપાળ સરહદની નજીક આવેલું છે. ગામની નજીક કૌડિયાલા નદી વહે છે. નદી પાર કરવાનું એકમાત્ર સાધન હોડી છે. લોકો બજારમાં અને રોજગારની શોધમાં હોડી દ્વારા મુસાફરી કરે છે. બુધવારે સાંજે લોકો હોડીમાં ઘરે પરત ફરી રહ્યા હતા. તેમાં લગભગ 20થી વધુ લોકો સવાર હતા.
હોડીએ સંતુલન ગુમાવતા દુર્ઘટના સર્જાઈ
એવું કહેવાય છે કે જ્યારે હોડી નદીની વચ્ચે પહોંચી ત્યારે અચાનક જ જોરદાર પ્રવાહને કારણે તેનું સંતુલન ગુમાવી દીધું અને તે પલટી ગઈ. આ અકસ્માત બાદ લોકોમાં હોબાળો મચી ગયો. ગામ નજીકમાં હોવાથી લોકો બૂમો સાંભળીને ઘટનાસ્થળે દોડી આવ્યા. તેમણે ચાર ગ્રામજનોને સુરક્ષિત રીતે બચાવી લીધા હતા. આ દરમિયાન સ્થાનિક પોલીસ સ્ટેશનને અકસ્માતની જાણ કરવામાં આવી હતી અને માહિતી મળતા જ પોલીસની એક ટીમ ઘટનાસ્થળે પહોંચી હતી. જિલ્લા મુખ્યાલયના વરિષ્ઠ અધિકારીઓ ઘટનાસ્થળે રવાના થયા. NDRF અને SDRFને પણ બોલાવવામાં આવ્યા છે.
