વડોદરામાં ન્યુ વી.આઇ.પી.રોડ અર્થ આઇકોન બિલ્ડિંગમાં આવેલી સેન્ટ્રલ બેન્ક ઓફ ઇન્ડિયાની બ્રાંચમાં દાગીનાનું મૂલ્યાંકન કરી અહેવાલ આપનાર સોનીએ બે ગ્રાહકો સાથે મળી ખોટા દાગીનાને સાચા હોવાનો અહેવાલ આપતા બેન્ક દ્વારા તેઓને 13.53 લાખની લોન આપવામાં આવી હતી. જે અંગે ભાંડો ફૂટતા વેલ્યૂઅર અને બે એકાઉન્ટ હોલ્ડર સામે વારસિયા પોલીસે ગુનો દાખલ કર્યો છે.
દિલીપ નટવરભાઇ સોની વેલ્યુઅર હતો
આ મામલે મળેલી જાણકારી મુજબ ન્યુ કારેલીબાગ પંચમ બ્લોસમ સિદ્ધનાથ પ્લેનેટની બાજુમાં રહેતા સૌરભ દિનેશપ્રસાદ શાહ સેન્ટ્રલ બેન્ક ઓફ ઇન્ડિયાની ન્યુ વી.આઇ.પી.રોડ બ્રાંચમાં મેનેજર તરીકે નોકરી કરે છે. તેમણે વારસિયા પોલીસ સ્ટેશનમાં ફરિયાદ નોંધાવી જણાવ્યું છે કે બ્રાંચમાં એકાઉન્ટ ધરાવતા ગ્રાહકો માટે ગોલ્ડ લોન યોજના છે. અમારી બ્રાંચમાં દિલીપ નટવરભાઇ સોની વેલ્યુઅર હતો. તેમની પટોડિયા પોળમાં શ્રીનાથજી ચેમ્બરમાં શ્રદ્ધા જ્વેલર્સ નામની દુકાન છે.
9.88 લાખની લોન આપવામાં આવી
બેન્કની શાખામાં જીજ્ઞેશ હસમુખભાઇ સોનીએ એકાઉન્ટ ખોલાવ્યું હતું. તે 519.450 ગ્રામ વજનના કિંમત રૂપિયા 16.84 લાખના દાગીના ગીરવે મૂકવા માટે આવ્યા હતા જેથી કિંમત ચકાસવા માટે દિલીપ સોનીને આપ્યા હતા. તેમણે આપેલા અહેવાલના આધારે દાગીનાની કિંમત 16.84 લાખ થઇ હતી. તેની સામે તેઓને 9.88 લાખની લોન આપવામાં આવી હતી.
3.65 લાખની લોન આપવામાં આવી
ત્યારબાદ તા.26-09-2019ના રોજ રફીક અસરફભાઇ મલેકે (રહે. કુંપાડ રોડ જલારામ તલાવડી ગામ, જંબુસર) એકાઉન્ટ ખોલાવ્યું હતું. તેમણે 3.65 લાખની લોનની માગણી કરી હતી. તેમણે 160.400 ગ્રામ દાગીના ગીરવે મૂક્યા હતા. દિલીપે આપેલા અહેવાલના આધારે દાગીનાની કિંમત 5.24 લાખ થઇ હતી. જેથી,તેઓને 3.65 લાખની લોન આપવામાં આવી હતી.
સંદિપ સોનીએ દાગીના નકલી હોવાનું જણાવ્યું
લોન યોજના મુજબ એક વર્ષની મુદ્દત પૂરી થતા સોનાના ફરીથી મૂલ્યાંકન માટે જીજ્ઞોશ સોની તથા રફીક મલેકને ફરીથી હાજર થવા નોટિસ અને રિમાઇન્ડર આપવામાં આવ્યા હતા. પરંતુ, તેઓ હાજર રહેતા ન હતા. ત્યારબાદ એક કમિટીની રચના કરી હતી. જેમાં બેન્ક અધિકારીઓ, ગોલ્ડ મૂલ્યાંકનકાર સંદિપ એચ.સોની તથા દિલીપ સોની હતા. વીડિયોગ્રાફી કરી સોનાના દાગીનાના પેકેટ ખોલી ચેક કરતા સંદિપ સોનીએ દાગીના નકલી હોવાનું જણાવ્યું હતું. આમ, દિલીપ સોનીએ ગ્રાહકો જીજ્ઞેશ તથા રફીક સાથે મળી દાગીના ખોટા હોવાનું જાણવા છતાં દાગીના શુદ્ધ હોવાનો અહેવાલ આપ્યો હતો.
આ પણ વાંચો—- SIR ઝુંબેશના ગણતરીના તબક્કામાં 5.08 કરોડ મતદારોની ચકાસણી પૂર્ણતાના આરે, 17 જિલ્લાઓમાં 100% કામગીરી
