પાદરા તાલુકાના મહલી ગામે થયેલા કરુણ અને ચકચારી મર્ડર કેસમાં પોલીસ તપાસ હવે અંતિમ તબક્કે પહોંચી છે. પ્રેમ સંબંધમાં આંધળી બનેલી સગીર વયની દીકરીએ જ પોતાના પિતાની હત્યાનું કાવતરું રચ્યું હોવાના ચોંકાવનારા ખુલાસા બાદ, પોલીસે આરોપીને સાથે રાખી ઘટનાનું ‘ક્રાઈમ રિ-કન્સ્ટ્રક્શન’ કર્યું હતું.
જમવામાં આપી ઊંઘની ગોળીઓ
પોલીસ તપાસમાં બહાર આવેલી વિગતો મુજબ, આ કોઈ આવેગમાં આવીને કરવામાં આવેલી હત્યા ન હતી, પરંતુ એક પૂર્વ આયોજિત કાવતરું હતું. સગીર દીકરી આરોપી યુવક સાથે લગ્ન કરવા માંગતી હતી, જેમાં પિતા અવરોધરૂપ બનતા હતા. આ કાંટાને રસ્તામાંથી દૂર કરવા માટે દીકરીએ જ ક્રૂરતાની હદ વટાવી હતી. હત્યાની રાત્રે દીકરીએ પોતાના પિતાના જમવામાં ઊંઘની ગોળીઓ ભેળવી દીધી હતી. પિતા ગાઢ નિદ્રામાં સરી પડ્યા બાદ આરોપીએ ઘરમાં પ્રવેશીને તીક્ષ્ણ હથિયારના ઘા ઝીંકી તેમની હત્યા કરી નાખી હતી.
પોલીસનું રિ-કન્સ્ટ્રક્શન અને પુરાવા
વડોદરા ગ્રામ્ય પોલીસે કેસની કડીઓ જોડવા માટે મુખ્ય આરોપીને મહલી ગામે લાવી આખી ઘટનાનું પુનરાવર્તન કરાવ્યું હતું. આરોપી પોતાના ઘરેથી નીકળીને કયા રસ્તેથી મૃતકના ઘર સુધી પહોંચ્યો તેનું નિરીક્ષણ કરાયું હતું. હત્યામાં વપરાયેલું ચપ્પુ આરોપીએ ક્યાં સંતાડ્યું હતું, તે જગ્યાની ઓળખ કરી પોલીસે હથિયાર કબ્જે કર્યું છે. રાત્રિના સમયે તે કેવી રીતે અંદર દાખલ થયો અને કઈ રીતે હુમલો કર્યો, તેનું કડીબદ્ધ પંચનામું કરવામાં આવ્યું હતું.
સમાજ માટે લાલબત્તી સમાન કિસ્સો
આ ઘટનાએ સમગ્ર પાદરા પંથકમાં અરેરાટી ફેલાવી દીધી છે. જે પિતાએ લાડ-કોડથી દીકરીને ઉછેરી, તે જ દીકરીએ મનગમતા પાત્ર સાથે લગ્ન કરવાની જીદમાં પિતાનો જીવ લેવામાં સાથ આપ્યો હતો. હાલ પોલીસ આ કેસમાં વધુ ટેકનિકલ અને ફોરેન્સિક પુરાવા એકત્ર કરી રહી છે, જેથી આરોપીઓને કડકમાં કડક સજા અપાવી શકાય. આ કિસ્સાથી વાલીઓમાં ચિંતા જોવા મળી છે.
