ભારતના દિગ્ગજ બેટ્સમેન વિરાટ કોહલીએ ટેસ્ટમાંથી નિવૃત્તિ લઈને બધાને ચોંકાવી દીધા છે. તેમણે સોમવારે એક ઇન્સ્ટાગ્રામ પોસ્ટ દ્વારા પોતાના ચાહકોને નિવૃત્તિ વિશે માહિતી આપી. કોહલીએ ગયા અઠવાડિયે નિવૃત્તિ લેવાનો ઇરાદો વ્યક્ત કર્યો હતો, પરંતુ હવે તેણે તેના પર અંતિમ મહોર લગાવી દીધી છે. ત્યારે આ મામલે બીસીસીઆઇની શું પ્રતિક્રિયા આવી.. આવો જાણીએ.
BCCIએ આપી પ્રતિક્રિયા
વિરાટ કોહલીએ આખરે ટેસ્ટ ક્રિકેટમાંથી નિવૃત્તિની જાહેરાત કરી છે. આનો અર્થ એ થયો કે ભારતીય ક્રિકેટ કંટ્રોલ બોર્ડ તેમને નિવૃત્તિ લેતા રોકી શક્યું નહીં. હવે તમને આશ્ચર્ય થશે કે આવું કેમ છે? તમને જણાવી દઈએ કે થોડા દિવસો પહેલા જ વિરાટ કોહલીએ BCCI સાથે ટેસ્ટ ક્રિકેટમાંથી નિવૃત્તિ લેવા અંગે વાત કરી હતી. જોકે બોર્ડે તેમને તેના પર પુનર્વિચાર કરવા કહ્યું. પછી સમાચાર આવ્યા કે બીસીસીઆઈ પણ વિરાટને ઈંગ્લેન્ડ પ્રવાસ પર કેપ્ટન બનાવવા માંગે છે. પરંતુ વિરાટે આજે સોમવાર, 12 મેના રોજ ટેસ્ટ ક્રિકેટમાંથી નિવૃત્તિની જાહેરાત કરી.
વિરાટ કોહલીના ટેસ્ટમાંથી નિવૃત્તિ પર BCCIએ પ્રતિક્રિયા આપી છે. BCCI એ પોસ્ટ પર લખ્યું કે આભાર વિરાટ કોહલી. ટેસ્ટ ક્રિકેટમાં એક યુગનો અંત આવ્યો છે પણ વારસો હંમેશા ચાલુ રહેશે! ટીમ ઈન્ડિયાના ભૂતપૂર્વ કેપ્ટન વિરાટ કોહલીએ ટેસ્ટ ક્રિકેટમાંથી નિવૃત્તિ લઈ લીધી છે. ટીમ ઈન્ડિયામાં તેમનું યોગદાન હંમેશા યાદ રાખવામાં આવશે!”
રોહિત બાદ વિરાટ કોહલી પણ ટેસ્ટ નહીં રમે
આ પહેલા ટીમ ઈન્ડિયાના કેપ્ટન રોહિત શર્માએ ટેસ્ટ ક્રિકેટમાંથી નિવૃત્તિ લઈ લીધી હતી. હવે વિરાટ કોહલીએ પણ ટેસ્ટ ક્રિકેટને અલવિદા કહી દીધું છે. બંનેએ ઇંગ્લેન્ડ પ્રવાસ પહેલા જ ટેસ્ટમાંથી નિવૃત્તિ લઈ લીધી છે. ભારતીય ટીમને આવતા મહિને ઇંગ્લેન્ડનો પ્રવાસ કરવાનો છે. ટીમ ઈન્ડિયાને ઈંગ્લેન્ડમાં પાંચ મેચની ટેસ્ટ શ્રેણી રમવાની છે. ભારત અને ઇંગ્લેન્ડ વચ્ચે ટેસ્ટ શ્રેણી 20 જૂનથી શરૂ થશે.
આવી હતી વિરાટ કોહલીની ટેસ્ટ કારકિર્દી
2011 માં ભારત માટે ટેસ્ટ ડેબ્યૂ કરનાર વિરાટ કોહલીએ કુલ 123 ટેસ્ટ મેચ રમી છે. આ સમયગાળા દરમિયાન, કિંગ કોહલીના બેટે 46.85 ની સરેરાશથી 9230 રન બનાવ્યા. વિરાટે ટેસ્ટમાં 7 બેવડી સદી, 30 સદી અને 31 અડધી સદી ફટકારી છે. વિરાટે પોતાની છેલ્લી ટેસ્ટ મેચ 3 જાન્યુઆરી 2025ના રોજ ઓસ્ટ્રેલિયા સામે રમી હતી.
